ཕྱི་ལོ་ ༢༠༢༠ ཟླ་ ༣ ཚེས་ ༡༢ རེས་གཟའ་ཕུར་བུ།
༄༅། །བོད་མིའི་གསུམ་བཅུའི་དུས་དྲན་ཐེངས་དྲུག་ཅུ་རེ་གཅིག་པའི་ཐོག་ཨ་རིའི་གྲོས་ཚོགས་འོག་མའི་ཚོགས་གཙོ་དང་མང་གཙོ་ཚོགས་པའི་དབུ་ཁྲིད་ལྕམ་སྐུ་ནེན་སི་པེ་ལོ་སི་ Nancy Pelosi མཆོག་གིས་བོད་དང་བོད་མིར་རྒྱབ་སྐྱོར་གྱི་བསྒྲགས་གཏམ་ཞིག་སྤེལ་བའི་ནང་འཁོད་དོན།
དེ་རིང་བོད་མིའི་གསུམ་བཅུའི་དུས་དྲན་ཐེངས་ ༦༡ ཐོག་ང་ཚོས་རང་དབང་གི་དོན་དུ་ཚེ་སྲོག་བློས་གཏོང་གནང་མཁན་རྒྱལ་གཅེས་པ་རྣམས་ལ་གུས་འདུད་ཞུ་རྒྱུ་ཡིན། ཉིན་མོ་འདི་ནི་བོད་མི་ཚོས་རྒྱ་ནག་གི་དྲག་གནོན་ཅན་གྱི་སྲིད་བྱུས་ལས་གྲོལ་ཏེ། ཞི་བདེ་དང་རང་སྲིད་རང་སྐྱོང་། བརྟན་ལྷིང་གི་འཚོ་བར་རོལ་རྒྱུའི་མངོན་འདོད་གསལ་བར་བྱེད་པའི་ཉིན་མོ་ཞིག་ཀྱང་ཡིན།
རྒྱ་ནག་གཞུང་གིས་གདུག་རྩུབ་ཆེན་པོས་བོད་མི་ཕོ་མོ་རྒན་གཞོན་ཙམ་མ་ཟད། ཕྲུ་གུ་ཚུན་ཆད་ཀྱི་ཆོས་དད་རང་དབང་དང་ཐུན་མིན་རིག་གཞུང་རྒྱུན་འཛིན་བྱ་རྒྱུའི་ཐོབ་ཐང་། དེ་བཞིན་སྨྲ་བརྗོད་རང་དབང་འཕྲོག་པ་དེར་འཛམ་གླིང་མི་མང་ཚོས་མཐའ་གཅིག་ཏུ་ངོ་རྒོལ་བྱ་རྒྱུའི་འགན་འཁྲི་ཡོད་པ་རེད། བོད་མི་ཚོས་རྒྱ་ནག་གཞུང་གི་དྲག་གནོན་ཅན་གྱི་སྲིད་བྱུས་འོག་ལོ་ངོ་བཅུ་ཕྲག་མང་པོའི་རིང་དཀའ་སྡུག་ཚད་མེད་མྱངས་དང་མྱོང་བཞིན་ཡོད་ཀྱང་། རང་གི་ཆོས་དད་མ་བརླག་ཅིང་། བཟང་ཕྱོགས་ཀྱི་རེ་བ་ནམ་ཡང་མ་དོར་བར་བོད་དོན་བདེན་མཐའ་གསལ་ཆེད་དང་། བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་བསྐྱར་གསོའི་ལས་འགུལ་ཐོག་འབད་བརྩོན་མུ་མཐུད་གནང་བཞིན་པ་དེ་ནི་ཞི་བདེར་དགའ་བའི་འཛམ་གླིང་མི་མང་ཚོའི་སྙིང་སྟོབས་འཕེལ་གཞིར་གྱུར།
སྤྱི་ནོར་༸གོང་ས་༸སྐྱསབ་མགོན་ཏཱ་ལའི་བླ་མ་མཆོག་གིས་ཉིན་ལྟར་རིས་མེད་བཟང་སྤྱོད་ཀྱི་གོ་བསྐོན་སློབ་གསོའི་བཀའ་སློབ་བསྩལ་བ་དེས་ང་ཚོར་བྱ་བ་བཟང་པོ་ཞིག་བྱ་རྒྱུར་དགེ་སྐུལ་བྱེད་བཞིན་ཡོད། ཀུན་སློང་དེའི་འོག་ནས་བདུན་ཕྲག་འགའ་ཤས་གོང་དུ། ཨ་རིའི་གྲོས་ཚོགས་འོག་མའི་ནང་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་ Tibetan Policy and Support Act གཏན་འབེབས་གནང་ཡོད། སྲིད་བྱུས་དེ་བརྒྱུད་ང་ཚོས་མང་གཙོ་དང་སྤྱི་མཐུན་ཚོགས་པ་ཐུན་མོང་ཐོག བོད་མིར་རྒྱབ་སྐྱོར་གྱི་རྣམ་པ་བསྐྱར་དུ་གསལ་འདོན་བྱས་པ་དང་སྦྲགས། འབྱུང་འགྱུར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་༸སྐུའི་ཡང་སྲིད་ཐག་གཅོད་ཞུ་རྒྱུའི་ཐོབ་ཐང་དེ་བོད་མི་ནང་པ་ཚོའི་ཆོས་ཕྱོགས་ཀྱི་དབུ་ཁྲིད་ཁོ་ནས་ཐག་གཅོད་ཞུ་རྒྱུ་ལས་རྒྱ་ནག་གཞུང་ལ་ཐོབ་ཐང་རྩ་བ་ནས་མེད། ཅེས་པའི་སྲིད་བྱུས་ལངས་ཕྱོགས་དེ་ཨ་རིའི་གཞུང་གིས་རྒྱུན་སྐྱོང་གནང་བཞིན་ཡོད་པ་གསལ་འདོན་བྱས་ཡོད། བོད་མི་ཚོར་གུས་བཀུར་ཆེ་མཐོང་ཞུ་འོས་པ་ཞིག་ཡིན་སྟབས། ང་ཚོས་བོད་མིའི་མངོན་འདོད་ཀྱི་འབོད་སྒྲར་རྒྱབ་སྐྱོར་ཐོག བོད་མི་ཕོ་མོ་རྒན་གཞོན་ཚང་མའི་མདུན་ལམ་བཟང་པོ་ཞིག་ཡོང་རྒྱུར་མུ་མཐུད་ལས་འགུལ་སྤེལ་རྒྱུ་ཡིན། ཞེས་འཁོད་འདུག ། ཨིན་ཡིག་ནས་བོད་སྒྱུར་ཞུས་པས་ཨིན་ཡིག་ལ་རྩ་འཛིན་གནང་རོགས།
