ཕྱི་ལོ་ ༢༠༢༠ ཟླ་ ༣ ཚེས་ ༢༨ རེས་གཟའ་སྤེན་པ།
༄༅། །ཕྱི་ལོ་ ༢༠༢༠ ཟླ་ ༣ ཚེས་ ༢༨ རེས་གཟའ་སྤེན་པའི་ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཕྱི་དྲིལ་བོད་ཀྱི་བརྙན་འཕྲིན་བརྒྱུད་གསལ་བཤད་གནང་དོན། ཕྱི་ཚེས་ ༢༣ རེས་གཟའ་ཟླ་བའི་ཉིན་ཀངྒ་ར་ཊན་ཌ་སྨན་ཁང་དུ་རྒྱ་ནག་ཝུ་ཧན་ནས་ཁྱབ་གདལ་བྱུང་བའི་ཏོག་དབྱིབས་ནད་ཡམས་ཀྱི་རྐྱེན་པས་བོད་མི་བསྟན་འཛིན་ཆོས་འཕེལ་ལགས་འདས་གྲོངས་སུ་གྱུར་བའི་ཡིད་སྐྱོའི་གནས་ཚུལ་ཐོན་ཡོད། སྐབས་དེར་མང་ཚོགས་ནས་དེའི་ཐོག་ཐུགས་སྣང་དང་སེམས་འཚབ་ཀྱི་རྣམ་པ་མང་པོ་ཞིག་ཡོང་གི་འདུག
དེ་རིང་གནས་ཚུལ་ལེགས་པ་ཞིག་ལ། ཉེ་ཆར་འདས་གྲོངས་སུ་གྱུར་བའི་འདས་པོ་ཁོང་གིི་བཟའ་ཟླས་གཙོས་ནང་མི་དང་རོགས་པ་གསུམ་དང་། ལྡི་ལི་ནས་རྡ་སར་མོ་ཊ་གཞན་ནང་ཕེབས་མཁན་བོད་མི་གཉིས། སྣུམ་འཁོར་གཏོང་མཁན་རྒྱ་གར་བ་གཉིས་བཅས་ཏོག་དབྱིབས་ནད་ཡམས་ཀྱི་བརྟག་དཔྱད་གནང་རྗེས་དེ་རིང་གནས་ཚུལ་བཟང་བ་ཞིག་ལ་ཁོང་རྣམ་པ་ཆ་ཚང་ Negative ཐོན་པར་བརྟེན་སྨན་པས་ཝུ་ཧན་གྱི་ནད་ཡམས་མིན་འདུག་ཞེས་ཐག་ཆོད་པོའི་ཐོག་ནས་གསུང་གི་འདུག ཕྱོགས་མཚུངས་རྡ་ས་རྫོང་དཔོན་ལ་སོགས་དང་ལྷན་དུ་འབྲེལ་བ་བྱས་རྗེས་གནས་ཚུལ་ཡག་པོ་བྱུང་སོང་། ཞེས་གསུངས་སོང་།
སྤྱི་ཡོངས་ནས་ཀངྒར་ཁུལ་དུ་ཉིན་ལྟར་བརྟག་དཔྱད་བྱས་པའི་སྐབས་དེ་ཚོ་ཡང་ Negative ཡིན་པ་གསལ་འདུག
གཞན་ཡང་འདས་པོ་ཁོང་དང་ནང་མི་རྣམས་ལྡི་ལིའི་མགྲོན་ཁང་ནང་བཞུགས་པའི་སྐབས་བོད་མི་རྣམས་ཀྱི་ཐོ་གཞུང་རྣམས་འབྲེལ་ཡོད་ས་གནས་འགོ་འཛིན་སོ་སོར་ཕུལ་ཡོད་པ་ལྟར། ཞིབ་འཇུག་བྱེད་དང་བྱེད་བཞིན་པ་རེད། ད་བར་ནད་ཡམས་འགོས་བཞག་པ་དང་བྱུང་བཞག་པའི་གནས་ཚུལ་གང་ཡང་ཐོན་མ་སོང་།
ས་གནས་ཀྱི་གསར་འགོད་པ་ཞིག་གིས་གནས་ཚུལ་གསུང་སྟངས་ཐད་གོ་ནོར་བྱུང་འདུག སྐབས་དེར་གསར་འགོད་པ་ཁོང་དང་ཐད་ཀར་འབྲེལ་བ་གནང་རྗེས་གསལ་བཤད་ཞིབ་ཕྲ་གནང་ཡོད།
དོན་གཅོད་ཁང་ནས་གནས་ཚུལ་འབྱོར་དོན་ལྟར། ཨིན་ཡུལ་དུ་ཏོག་དབྱིབས་ནད་ཡམས་ཀྱི་རྐྱེན་པས་བོད་མི་རང་ལོ་ ༨༢ ཡིན་པ་ཀ་ཤོད་པ་འཇམ་དབྱངས་ཆོས་རྒྱལ་ལགས་འདས་གྲོངས་སུ་གྱུར་ཡོད། དམ་པ་ཁོང་གི་ཡབ་ནི། ༸གོང་ས་༸སྐུ་ཕྲེང་བཅུ་གསུམ་པ་ཆེན་པོ་མཆོག་དང་༸གོང་ས་༸སྐུ་ཕྲེང་བཅུ་བཞི་པ་ཆེན་པོ་མཆོག དེ་བཞིན་བོད་དོན་དང་། བོད་མིའི་ཁྲོད་ཐུགས་ཕན་གསོས་པའི་ཞབས་འདེགས་ཞུ་མྱོང་མཁན་ཞིག་ཡིན་འདུག ཁོང་ཕྱི་ལོ་ ༡༩༩༡ ལོར་ཕྱི་རྒྱལ་དུ་ཕེབས་སྟེ་ད་བར་ཨིན་ཡུལ་དུ་བཞུགས་འདུག ཚང་མས་དམ་པ་ཁོང་ལ་ཐུགས་སྨོན་གནང་རོགས།
གཞན་ཡང་གནས་ཚུལ་གོ་ཐོས་ཤིག་ལ། ཧྥ་རན་སི་དང་སུད་སི། ཨི་ཊ་ལི་ནང་ཡོད་པའི་བོད་མི་ཏོག་དབྱིབས་ཕོག་པའི་གནས་ཚུལ་གོ་བར་བརྟེན་ཚང་མས་གཟབ་གཟབ་གནང་རོགས། ཞེས་ཞུ་རྒྱུ་ཡིན།
