ཕྱི་ལོ་ ༢༠༢༠ ཟླ་ ༣ ཚེས་ ༡༢ རེས་གཟའ་ཕུར་བུ། 

༄༅། །ཕྱི་ལོ་ ༢༠༢༠ ཟླ་ ༣ ཚེས་ ༡༠ ཉིན་གྱི་སྔ་དྲོ་ཆུ་ཚོད་ ༡༠ ཐོག་མེག་སེ་ཁོ་བོད་དོན་རྒྱབ་སྐྱོར་ཚོགས་པས་ Tibet Mx Support Group རྒྱ་ནག་གི་བཙན་དབང་འོག་ཡོད་པའི་གཞིས་ལུས་བོད་རིགས་སྤུན་ཟླ་ཡོངས་ཀྱི་སྙིང་སྟོབས་ལ་རྗེས་སུ་ཡི་རང་དང་། བོད་ཀྱི་རྒྱལ་གླུ་བཏང་སྟེ་མེག་སེ་ཁོའི་རྒྱ་ནག་གཞུང་ཚབ་ཁང་གི་མདུན་དུ་ཆུ་ཚོད་གཉིས་རིང་བོད་ལ་རང་དབང་དགོས། གར་སོང་ཆ་མེད་དུ་གྱུར་བའི་ཀུན་གཟིགས་པཎ་ཆེན་རིན་པོ་ཆེ་མཆོག་གློད་བཀྲོལ་གཏོང་དགོས་ཞེས་ཞི་བའི་ངོ་རྒོལ་གྱིས་སྐད་འབོད་གནང་ཡོད།

ཐེངས་འདིའི་ལས་འགུལ་ནང་མེག་སེ་ཁོ་བོད་དོན་རྒྱབ་སྐྱོར་ཚོགས་པའི་ཚོགས་མི་ ༡༠ ཙམ་འདུ་འཛོམས་ཐོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་མིའི་སྒྲིག་འཛུགས་ཀྱི་མངོན་འདོད་བསྒྲུབ་ཆེད་ཞི་བའི་ངང་བོད་དོན་སླད་འཐབ་རྩོད་གནང་རྒྱུ་ཡིན་པའི་ཁས་ལེན་གནང་འདུག          མེག་སེ་ཁོ་བོད་དོན་རྒྱབ་སྐྱོར་ཚོགས་པ་ནི། མེག་སེ་ཁོའི་དང་བླངས་པ་ཁག་གཅིག་གིས་མེག་སེ་ཁོའི་ནང་གསར་འཛུགས་གནང་བ་ཞིག་རེད། །