ཕྱི་ལོ་ ༢༠༢༠ ཟླ་ ༣ ཚེས་ ༡༦ རེས་གཟའ་ཟླ་བ། 

༄༅། །ཕྱི་ལོ་ ༢༠༢༠ ཟླ་ ༢ ཚེས་ ༢༧ ཉིན་མེངྒ་ལོར་མཐོ་སློབ་ཀྱི་སློབ་མ་བཀྲ་ཤིས་ལྷ་མོ་ལགས་ཀྱིས་དཔེ་མཛོད་རབ་འབྱམས་པ་དང་བརྡ་འཕྲིན་ཚན་རིག་ Master of Library and Information Science ཀྱི་སློབ་ཚན་ནང་བརྒྱ་ཆ་མཐོ་ཤོས་བླངས་ཏེ་མཐོ་སློབ་ཀྱི་བསླབ་པ་མཐར་སོན་པའི་མཛད་སྒོ་ཐེངས་ ༣༨ ཐོག་རྩེ་ཕུད་ཨང་དང་པོའི་གསེར་གྱི་གཟེངས་རྟགས་དང་ལེགས་སྐྱེས་ཐོབ་པར་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་བུ་མོ་བཀྲ་ཤིས་ལྷ་མོ་ལགས་དང་ནང་མི་ཡོངས་ལ་དགའ་བསུའི་འཚམས་འདྲི་དང་འབྲེལ། རྒྱ་གར་དང་ཕྱི་རྒྱལ་ཡུ་གྲུ་ཁག་ཏུ་སློབ་སྦྱོང་གནང་བཞིན་པའི་བོད་རིགས་སློབ་མ་རྣམས་ནས་ཀྱང་ཁོང་གི་གྲུབ་འབྲས་བཟང་པོའི་བརྒྱུད་ནས་སེམས་སྐུལ་ཐེབས་དགོས་པའི་འབོད་སྐུལ་གནང་འདུག

སྐབས་དེར་ཁོ་མོས། འདས་པའི་ལོ་ངོ་གཉིས་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ཀྱིས་གཙོས་ཕྲན་ལ་རྒྱབ་སྐྱོར་གནང་མཁན་ཡོངས་ལ་ཐུགས་རྗེ་ཆེ་ཞུ་རྒྱུ་ཡིན།  ཁྱེད་རྣམས་ཀྱིས་རྒྱབ་སྐྱོར་ལ་བརྟེན་ནས་གྲུབ་འབྲས་བཟང་པོ་ཐོན་ཐུབ་པ་བྱུང་ཡོད། ཅེས་གསུང་།

སྤྱིར་བཀྲ་ཤིས་ལྷ་མོ་ལགས་ནི། ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་ནས་ཡིན་པ་དང་། ཕྱི་ལོ་ ༢༠༡༧ ཟླ་ ༥ ནང་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་ནས་སློབ་དཔོན་དང་ཕྱི་ལོ་ ༢༠༡༩ ཟླ་ ༧ ནང་མངྒེ་ལོར་མཐོ་སློབ་ནས་དཔེ་མཛོད་རབ་འབྱམས་པ་དང་བརྡ་འཕྲིན་ཚན་རིག་ཐོན་རྗེས་ད་ཆ་ཝཱ་ཎ་དབུས་བོད་ཀྱི་ཆེས་མཐོའི་གཙུག་ལག་སློབ་གཉེར་ཁང་གི་ཞི་བ་འཚོ་དཔེ་མཛོད་ཁང་དུ་ཕྱག་ལས་གནང་བཞིན་ཡོད་པ་བཅས། །