ཕྱི་ལོ་ ༢༠༢༠ ཟླ་ ༣ ཚེས་ ༣ རེས་གཟའ་མིག་དམར།
༄༅། །ཕྱི་ལོ་ ༢༠༢༠ ཟླ་ ༢ ཚེས་ ༢༩ ཉིན་ཏེ་བོད་ཚེས་ ༦ ཉིན་ཨ་རི་ནིའུ་ཡོག་དང་ནིའུ་ཇར་སིའི་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་སྤྱི་ཁང་ཕུན་ཚོགས་སྡེ་བཞི་ནང་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དབུ་བཞུགས་བོད་ཀྱི་ལོ་གསར་སྲུང་བརྩིའི་མཛད་སྒོ་ཞིག་ཚོགས་ཡོད།
དེ་ཡང་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས། ས་གནས་ཀྱི་དཔོན་རིགས་ཁག་གཅིག དེ་བཞིན་བོད་མི་མང་ཚོགས་སོགས་ལྷན་འཛོམས་ཀྱིས་ལོ་གསར་སྲུང་བརྩི་ཞུས་འདུག
སྐབས་དེར་དཔལ་ལྡན་སྲིད་སྐྱོང་མཆོག་གིས་བོད་རྒྱལ་ལོ་ ༢༡༤༧ རབ་གནས་ལྕགས་བྱི་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲི་དང་འབྲེལ་བོད་མི་རྣམས་ནས་བོད་དོན་འཐབ་རྩོད་ཐོག་གླེང་སློང་བྱེད་དགོས་པའི་འགན་ཡོད་པ་མ་ཟད། ངེས་པར་དུ་དོ་སྣང་བྱེད་དགོས་པ་དང་། བོད་མི་ནང་ཁུལ་མཐུན་སྒྲིལ་དགོས་རྒྱུ་ཧ་ཅང་གལ་ཆེན་པོ་ཡིན་སྐོར་དང་། བོད་མི་རྣམས་ནས་བོད་དོན་དང་བོད་ཀྱི་ཐུན་མིན་ཆོས་དང་རིག་གཞུང་། སྐད་ཡིག་ཐད་འགན་ཡོད་པའི་ཐོག་ནས་ཤུགས་སྣོན་རྒྱག་དགོས་པ། ལྔ་དང་ལྔ་བཅུའི་འཆར་སྣང་སོགས་ཀྱི་སྐོར་གསུང་བཤད་གནང་འདུག
མཛད་སྒོར་ཕེབས་པའི་གྲོས་ཚོགས་གོང་མའི་ཚོགས་མི་སོགས་ནས་ལོ་གསར་ལ་འཚམས་འདྲི་དང་འབྲེལ་བོད་དོན་སླད་མུ་མཐུད་རྒྱབ་སྐྱོར་གནང་རྒྱུའི་ཞལ་བཞེས་ཀྱང་གནང་འདུག་པ་བཅས། །
