ཆོས་རིག་བཀའ་བློན་མཆོག་དཔལ་གཤེན་བསྟན་སྨན་རིའི་གླིང་དུ་སྐབས་ ༢༠ པའི་དགེ་བཤེས་མཚན་རྟགས་ཀྱི་མཛད་སྒོའི་སྐུ་མགྲོན་གཙོ་བོར་ངོ་ཕེབས་གནང་བ།

གསར་ལས་ཁང་གི་གསར་འགོད་པས།

༢༠༢༠-༠༣-༡༡

ཕྱི་ལོ་ ༢༠༢༠ ཟླ་ ༣ ཚེས་ ༡༡ རེས་གཟའ་ལྷག་པ།

༄༅། །འདི་གར་བོད་མིའི་སྒྲིག་འཛུགས་ཀྱི་ཆོས་རིག་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༣ ཚེས་ ༡༠ ཉིན་ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག་བོན་གཞིས་ཌོ་ལན་ཇིར་རྟེན་གཞི་བྱས་པའི་དཔལ་གཤེན་བསྟན་སྨན་རིའི་གླིང་དགོན་དུ་སྐབས་ ༢༠ པའི་དགེ་བཤེས་མཚན་རྟགས་ཀྱི་མཛད་སྒོའི་སྐུ་མགྲོན་གཙོ་བོར་ངོ་ཕེབས་གནང་ཡོད།

དེ་ཡང་ཐོག་མར་སྔ་དྲོ་ཆུ་ཚོད་ ༩ ཐོག་བཀའ་བློན་མཆོག་གིས་ཞྭ་དཀར་བསྟན་པའི་གཙུག་རྒྱན་༧སྐྱབས་རྗེ་རྒྱལ་བ་སྨན་རིའི་ཁྲི་འཛིན་རིན་པོ་ཆེ་མཆོག་ལ་འཚམས་ཞུའི་མཇལ་ཕྱག་ཕུལ་བ་དང་། དེ་རྗེས་རིན་པོ་མཆོག་དང་ལྷན་སྔ་དྲོའི་བཀའ་རམས་པ་རྣམ་པའི་བཀྲ་ཤིས་པའི་དམ་བཅར་ལྷན་ཞུགས་གནང་ཡོད། མཛད་སྒོའི་ཐོག་དཔལ་གཤེན་བསྟན་སྨན་རིའི་གླིང་དགོན་གྱི་དགེ་འདུན་པ་རིམ་པས་དགེ་བཤེས་ཀྱི་མཚན་རྟགས་བཞེས་མཁན་རྣམས་ལ་བཀྲ་ཤིས་རྟེན་འབྲེལ་གྱི་སྨོན་ཚིགས་མཆོད་པ་ཕུལ་ཡོད།

ཉིན་རྒྱབ་མཛད་སྒོ་དངོས་གཞིའི་ཐོག་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་བཀའ་རམས་པ་བཅུ་དྲུག་ལ་དགེ་བའི་བཤེས་གཉེན་གྱི་མཚན་གསོལ་བ་དང་སྦྲགས་དགེ་བཤེས་ཀྱི་ཕྱག་འཁྱེར་གསོལ་སྩལ་གནང་ཡོད།

སྐུ་མགྲོན་གཙོ་བོ་ཆོས་རིག་བཀའ་བློན་མཆོག་གིས་ཐོག་མར་དགེ་བཤེས་གསར་ཐོན་རྣམ་པས་གཡུང་དྲུང་བོན་གྱི་གཞུང་ཆེན་ཁག་ལ་གསན་བསམ་སློབ་གཉེར་མཐར་ཕྱིན་པ་གནང་སྟེ་དེ་རིང་༧སྐྱབས་རྗེ་སྨན་རིའི་ཁྲི་འཛིན་དྲུང་དུ་དགེ་བཤེས་ཀྱི་མཚན་རྟགས་ཐོབ་པར་འཚམས་འདྲི་དང་སྦྲགས་ཁོང་རྣམ་པར་གཡུང་དྲུང་བོན་གྱི་བསྟན་པ་འཛིན་སྐྱོང་སྤེལ་གསུམ་དང་། སྤྱི་ཚོགས་ཞབས་ཞུ་གྲུབ་པའི་དུས་ལ་སླེབས་ཡོད་སྟབས་ཚང་མས་རང་འཁུར་དང་དུ་བླངས་ཏེ་ཞབས་ཞུ་གྲུབ་ཐུབ་པ་གནང་རྒྱུ་དང་། ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོས་དབུས་རང་རང་སོ་སོའི་ཆོས་བརྒྱུད་ཁག་གི་བསྟན་བདག་དབུ་ཁྲིད་བླ་ཆེན་རྣམ་པའི་བཀའ་དང་དགོངས་པ་བཞིན་བསྟན་པའི་བྱ་བ་གྲུབ་ཐུབ་པ་གནང་རྒྱུ་གལ་ཆེ་ཡིན་པའི་སྐོར་སོགས་ཀྱི་གསུང་བཤད་གནང་།

མཛད་སྒོར་ལྷན་ཞུགས་གནང་མཁན་ཆོས་བརྒྱུད་སྤྱི་འཐུས་དགེ་བཤེས་སྨོན་ལམ་མཐར་ཕྱིན་ལགས་དང་། སྤྱི་འཐུས་བ་ར་ཚེ་དབང་བཀྲ་ཤིས་ལགས། བོན་གཞིས་ས་གནས་འགོ་འཛིན། ས་གནས་འཐུས་མིའི་ཚོགས་གཙོ། ས་གནས་རང་བདེན་ཚོགས་གཙོ། བོད་ཀྱི་བོན་པོ་ཚོགས་པའི་ཚོགས་གཞོན། བོན་གཞིས་སམ་བྷོ་ཊའི་སློབ་སྤྱི། དེ་བཞིན་སློབ་ཕྲུག་དང་། མི་མང་བཅས་ཕེབས་ཡོད། །

གསར་གནས།