ཕྱི་ལོ་ ༢༠༢༠ ཟླ་ ༣ ཚེས་ ༡༦ རེས་གཟའ་ཟླ་བ།
༄༅། །སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པ་ཕྱི་ལོ་ ༢༠༢༠ ཟླ་ ༣ ཚེས་ ༡༧ ནས་ ༢༧ བར་ལས་དུས་ཉིན་གྲངས་བཅུའི་རིང་བོད་མིའི་སྒྲིག་འཛུགས་ཀྱི་བསྟི་གནས་རྡ་ས་གངས་ཅན་སྐྱིད་གཤོངས་ཀྱི་གྲོས་ཚོགས་ཁང་དུ་ཚུགས་གཏན་འཁེལ་ཡོད་ནའང་། རྒྱ་ནག་ཝུ་ཧན་གྲོང་ཁྱེར་ནས་ཐོག་མར་འགོ་བཙུགས་ཏེ་ད་ཆ་འཛམ་གླིང་ས་ཕྱོགས་གང་སར་ཏོག་དབྱིབས་ཅན་གྱི་གློ་ནད་ནད་ཡམས་ཁྱབ་བརྡལ་དུ་འགྲོ་བཞིན་པའི་རྐྱེན་གྱིས་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པ་ཉིན་གྲངས་གཅིག་རིང་མ་གཏོགས་མི་འཚོགས་རྒྱུའི་ཐག་གཅོད་གནང་འདུག
དེ་ཡང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གསུང་དོན། སྤྱིར་སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པ་ཕྱི་ལོ་ ༢༠༢༠ ཟླ་ ༣ ཚེས་ ༡༧ ནས་ ༢༧ བར་ལས་དུས་ཉིན་གྲངས་བཅུའི་རིང་འཚོགས་རྒྱུ་རེད། འོན་ཀྱང་འཛམ་གླིང་ཡོངས་ལ་ཏོག་དབྱིབས་དུག་ནད་རྐྱེན་པས་ཉིན་གྲངས་གཅིག་མ་གཏོགས་འཚོགས་རྒྱུ་མིན་པའི་ཐག་གཅོད་ཞུས་པ་ཡིན།
བཙན་བྱོལ་བོད་མིའི་བཅའ་ཁྲིམས་ནང་ཟླ་དྲུག་ནང་ཚུན་གྲོས་ཚོགས་ཚོགས་དུས་རེ་ཚོགས་དགོས་པ་དང་། ཕྱི་ཟླ་ ༤ ཚེས་ ༡ ནས་སྔོན་རྩིས་བཀའ་འཁྲོལ་མེད་པར་བརྟེན་ཉིན་གྲངས་གཅིག་རིང་གྲོས་ཚོགས་ཚོགས་དགོས་པའི་གནས་སྟངས་འདི་ལྟར་ཆགས་ཡོད། ལས་རིམ་ནང་མྱ་ངན་རྗེས་དྲན་གྱི་གྲོས་ཆོད་གྲོས་འཆར་གཉིས་དང་། གདུང་སེམས་མཉམ་སྐྱེའི་གྲོས་ཆོད་གྲོས་འཆར་གཅིག སྔོན་རྩིས་གཏོང་ལེན་གཏན་འབེབས་གནང་རྒྱུ་བཅས་ལས་མེད། ཅེས་གསུངས། །
