ཕྱི་ལོ་ ༢༠༢༠ ཟླ་ ༣ ཚེས་ ༡༡ རེས་གཟའ་ལྷག་པ།
༄༅། །བོད་རང་དབང་སྒེར་ལངས་བྱས་ནས་མི་ལོ་ ༦༡ འཁོར་བའི་གསུམ་བཅུའི་དུས་དྲན་དང་འབྲེལ། ཨ་རིའི་གྲོས་ཚོགས་འཐུས་མི་སྐུ་ཞབས་ཇིམ་མེག་གྷོ་ཝན་ Jim McGovern མཆོག་གིས་བསྒྲགས་གཏམ་ཞིག་སྤེལ་བའི་ནང་འཁོད་དོན། དེ་རིང་འཛམ་གླིང་ས་ཕྱོགས་གང་སར་གནས་པའི་བོད་མི་ཚོས་བོད་རང་དབང་སྒེར་ལངས་བྱས་ནས་མི་ལོ་ ༦༡ འཁོར་བའི་གསུམ་བཅུའི་དུས་དྲན་སྲུང་བརྩི་ཞུ་ཡི་ཡོད་པ་དང་། ཕྱི་ཟླ་ ༣ ཚེས་ ༡༠ ཉིན་བོད་མི་མང་པོའི་ཚེ་སྲོག་ཤོར་ཡོད་པ་མ་ཟད། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་དབུས་བོད་མི་སྟོང་ཕྲག་མང་པོ་རང་ཡུལ་བཞག་ནས་བཙན་བྱོལ་དུ་འགྲོ་དགོས་བྱུང་ཡོད།
འདི་ག་ཨ་རིའི་ལུང་པ་ནང་བོད་མི་ཚོས་གསུམ་བཅུའི་དུས་དྲན་སྲུང་བརྩི་ཞུ་ཡི་ཡོད་པ་ལྟར་འཛམ་གླིང་གི་རྒྱལ་ཁབ་མང་པོའི་ནང་བོད་མི་མང་ཚོགས་ནས་གསུམ་བཅུའི་དུས་དྲན་སྲུང་བརྩི་ཞུ་ཡི་ཡོད། ཡིན་ཡང་བོད་དང་བལ་ཡུལ་ནང་གི་བོད་མི་ཚོས་མཉམ་འཛོམས་ཀྱིས་གསུམ་བཅུའི་དུས་དྲན་སྲུང་བརྩི་ཞུ་ཐུབ་ཀྱི་མེད། རྒྱུ་མཚན་ནི་རྒྱ་ནག་གཞུང་གིས་བོད་མི་ཚོར་བཀག་སྡོམ་གྱིས་རང་གི་ལོ་རྒྱུས་ཕྱིར་དྲན་བྱེད་འཇུག་གི་མེད། དེར་བརྟེན་འཛམ་གླིང་ས་ཕྱོགས་གང་སར་གནས་པའི་བོད་མི་ཚོས་སྐད་འབོད་རྒྱག་དགོས་པ་གལ་ཆེན་པོ་ཆགས་ཡོད། སྐད་འབོད་རྒྱག་མི་ཐུབ་པའི་བོད་མི་ཚོའི་ཆེད་དུ་ང་ཚོས་སྣེ་ཁྲིད་དེ་དུས་དྲན་སྲུང་བརྩི་དང་། སྐད་འབོད་རྒྱག་པ། རྗེས་དྲན་ཞུ་རྒྱུ་ཡིན་མིན་དེ་ང་ཚོའི་རང་དབང་རེད།
དེ་རིང་ཕྲན་རང་ཉིད་འཛམ་གླིང་གང་སར་གནས་པའི་བོད་མི་ཚོའི་འཐབ་རྩོད་ལ་རྒྱབ་སྐྱོར་ཞུ་རྒྱུ་མ་ཟད། བོད་ནང་གི་བོད་མི་ཚོས་གཞི་རྩའི་འགྲོ་བ་མིའི་ཐོབ་ཐང་དང་། སྨྲ་བརྗོད་རང་དབང་། སྐད་ཡིག་སློབ་ཁྲིད་རང་དབང་། བོད་མིའི་རིག་གཞུང་དང་ས་ཆུ་སྲུང་སྐྱོབ་རང་དབང་། འགྲུལ་བཞུད་རང་དབང་། ཆོས་དད་རང་དབང་། རང་གི་བླ་མའི་ཡང་སྲིད་ངོས་འཛིན་གྱི་རང་དབང་བཅས་ལོངས་སུ་སྤྱོད་ཐུབ་པའི་སླད་རྒྱབ་སྐྱོར་ཞུ་རྒྱུ་ཡིན།
ངས་ད་ལྟ་འབད་བརྩོན་ཞུ་བཞིན་པ་ནི། ཕྱི་ལོ་ ༢༠༡༩ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་བཏོན་པ་དེ་རེད། དེར་ཨ་རིའི་གྲོས་འོག་མའི་ནང་ཨ་རིའི་གྲོས་ཚོགས་ཀྱི་མང་གཙོ་དང་སྤྱི་མཐུན་ཚོགས་པ་གཉིས་ཀས་ཐུན་མོང་ཐོག་རྒྱབ་སྐྱོར་གནང་ཡོད། ད་ལྟའི་ཆར་ཨ་རིའི་གྲོས་ཚོགས་གོང་མའི་ནང་ནས་རྒྱབ་སྐྱོར་འཐོབ་ཐབས་བྱེད་རྒྱུ་དེ་རེད། ཕྱི་ལོ་ ༢༠༡༩ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་དེ་ཨ་རིའི་ཁྲིམས་སུ་གཏན་འབེབས་བཟོ་རྒྱུ་དེ་གལ་ཆེན་པོ་ཆགས་ཡོད་པ་དང་། བོད་མི་ནང་པའི་དབུ་ཁྲིད་དང་ལྷག་པར་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་མ་འོངས་ཡང་སྲིད་དེ་བོད་མི་ནང་པའི་ཚོགས་སྡེ་ཁག་ནས་ཐག་གཅོད་བྱ་དགོས། རྒྱ་ནག་གི་ལས་བྱེད་སུ་གང་གིས་གནད་དོན་དེའི་ཐད་ཐེ་གཏོགས་བྱས་ཚེ་ཨ་རིའི་གཞུང་གིས་དོ་བདག་འབྲེལ་ཡོད་རྣམས་ལ་དཔལ་འབྱོར་དང་མཐོང་མཆན་སོགས་ཀྱི་བཀའ་ཆད་གནང་གི་རེད།
ཕྱི་ལོ་ ༢༠༡༩ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་དེས་ང་ཚོའི་མཐུན་གྲོགས་རྒྱལ་ཁབ་ཚོ་དང་ལྷན་བོད་ལ་མིང་དོན་མཚུངས་པའི་རང་སྲིད་རང་སྐྱོང་འཐོབ་ཐབས་དང་། བོད་མཐོ་སྒང་གི་ཁོར་ཡུག་དང་གཙང་པོ་དེ་དག་སྲུང་སྐྱོབ་བྱེད་པར་རམ་འདེགས་ཞུ་ཐུབ། ཁྲིམས་འཆར་གསར་པ་དེས་ཨ་རི་གཞུང་གིས་བོད་ཀྱི་རྒྱལ་ས་ལྷ་སར་གཞུང་ཚབ་ལས་ཁུངས་ Consulate ཞིག་གསར་འཛུགས་གནང་མ་ཐུབ་པར་རྒྱ་ནག་གཞུང་གིས་ཨ་རིའི་ནང་གཞུང་ཚབ་ལས་ཁུངས་གསར་འཛུགས་བྱ་མི་ཆོག་པའི་བཀའ་ཁྱབ་གནང་རྒྱུ་དང་། དེ་བཞིན་བཙན་བྱོལ་བོད་མིའི་མང་གཙོའི་སྒྲིག་འཛུགས་ཚགས་ཚུད་དང་འཕེལ་རྒྱས་སུ་འགྲོ་བཞིན་པར་ངོས་འཛིན་གནང་གི་ཡོད།
ཕྱོགས་གཅིག་ནས་ང་ཚོ་ཚང་མས་ཕྱི་ལོ་ ༢༠༡༩ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་དེ་གྲོས་ཚོགས་གོང་མའི་ནང་རྒྱབ་སྐྱོར་འཐོབ་ཐབས་སུ་གསུམ་བཅུའི་དུས་དྲན་སྲུང་བརྩི་ཞུ་ཡི་ཡོད། ན་ནིང་ལོར་ཨ་རིའི་གྲོས་ཚོགས་གོང་འོག་གི་འཐུས་མི་ཚོས་སྤྱི་མོས་ཐོག་ནས་བོད་དུ་རང་དབང་ཐོག་ཕར་འགྲོ་ཚུར་འོང་ཆོག་པའི་ཁྲིམས་འཆར་ Reciprocal Access to Tibet Act ཁྲིམས་སུ་གཏན་འབེབས་གནང་ཐུབ་ཡོད། དེ་བཞིན་ད་ལོ་ཡང་ང་ཚོས་ཕྱི་ལོ་ ༢༠༡༩ ལོའི་བོད་ཀྱི་སྲིད་བྱུས་དང་རྒྱབ་སྐྱོར་གྱི་ཁྲིམས་འཆར་གསར་པ་དེར་གྲོས་ཚོགས་གོང་མའི་ནང་རྒྱབ་སྐྱོར་གྱིས་ཁྲིམས་སུ་གཏན་འབེབས་བཟོ་དགོས།
ང་ཚོས་ངེས་པར་དུ་མུ་མཐུད་རྒྱ་ནག་གཞུང་ལ་གར་སོང་ཆ་མེད་དུ་གྱུར་བའི་ཀུན་གཟིགས་པཎ་ཆེན་རིན་པོ་ཆེ་མཆོག་གིས་དབུས་བོད་མིའི་ཆབ་སྲིད་བཙོན་པ་ཡོངས་རྫོགས་གློད་བཀྲོལ་དགོས་པའི་འབོད་སྐུལ་གནང་རྒྱུ་དང་། བོད་མིའི་ཆབ་སྲིད་བཙོན་པ་ཡོངས་རྫོགས་བདེ་འཇགས་དང་གློད་བཀྲོལ་མ་འཐོབ་པར་དུ་ང་ཚོ་སུ་གང་ལྷོད་ལྷོད་བྱས་ནས་ངལ་གསོ་རྒྱག་རྒྱུ་མེད།
བཙན་དབང་འོག་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་རང་ཡུལ་བཞག་ནས་མི་ཡུལ་དུ་བཙན་བྱོལ་ལ་ཆིབས་སྒྱུར་བསྐྱངས་དགོས་བྱུང་བ་ནས་བཟུང་ད་བར་མི་ལོ་ ༦༡ འགྲོ་བཞིན་ཡོད། མི་ལོ་ ༦༡ ནི་དུས་ཚོད་རིང་པོ་རེད། འོན་ཀྱང་ངས་བོད་དོན་ཆེད་རྒྱབ་སྐྱོར་བྱེད་རྒྱུ་དེ་མཚམས་འཇོག་བྱེད་ཀྱི་མིན། རྒྱུ་མཚན་ནི་འཛམ་གླིང་གི་ས་ཕྱོགས་གང་སར་གནས་པའི་བོད་མི་ཚོས་སྙིང་སྟོབས་ཆེ་བསྐྱེད་ཀྱིས་མུ་མཐུད་བོད་དོན་སླད་འཐབ་རྩོད་གནང་དང་གནང་བཞིན་ཡོད། ང་ཚོས་བོད་དོན་སླད་སྔར་ལས་ལྷག་འཐབ་རྩོད་རྒྱུན་སྐྱོང་མཐར་སྐྱེལ་བྱེད་དགོས། ཐུགས་རྗེ་ཆེ།
