ཕྱི་ལོ་ ༢༠༢༠ ཟླ་ ༢ ཚེས་ ༢༧ རེས་གཟའ་ཕུར་བུ།

༄༅། །འདི་གར་ཨོ་སི་ཀྲོ་ལི་ཡ་སྐུ་ཚབ་དོན་གཅོད་ལས་ཁུངས་ནས་བཏང་གནས་ནང་འཁོད་དོན། ཨོ་སི་ཀྲོ་ལི་ཡ་རྒྱལ་ཁབ་ཀྱི་རིག་གཞུང་སྣ་མང་དུས་ཆེན་ལོ་སྟར་ཆགས་རྒྱལ་ས་ཁེན་བྷེ་རར་འཚོགས་བཞིན་པ་ལྟར། ད་ལོའི་དུས་ཆེན་དེ་བཞིན་ཕྱི་ཟླ་ ༢ ཚེས་ ༢༡ ནས་ ༢༣ བར་ཉིན་གསུམ་རིང་རྒྱལ་ས་ཁེན་བྷེ་རར་ཚོགས་ཡོད་པ་དང་། འཛམ་གླིང་ས་ཕྱོགས་གང་ས་ནས་ཕེབས་པའི་མི་རིགས་སྣ་མང་གིས་སོ་སོའི་ཆོས་དང་རིག་གཞུང་། ཡུལ་སྲོལ་གོམས་གཤིས། ཟས་རིགས་སོགས་ངོམས་སྟོན་བྱས་སྲོལ་ཡོད་པ་ལྟར། ཨོ་སི་ཀྲོ་ལི་ཡ་སྐུ་ཚབ་དོན་གཅོད་ལས་ཁུངས་དང་། ཨེ་སི་ཊི་ (ACT) བོད་རིགས་མཐུན་ཚོགས་ཀྱང་དུས་ཆེན་དེར་མཉམ་ཞུགས་བྱས་ཡོད།

སྐུ་ཚབ་དོན་གཅོད་ལས་ཁུངས་ནས་ནམ་རྒྱུན་ལྟར་ཁྲོམ་གཞུང་དཀྱིལ་དུ་གུར་ཁང་གླས་ཏེ། ནང་དུ་བོད་ཀྱི་དགོན་པའི་བཟོ་དབྱིབས་ལྟར་སྐུ་རྟེན་དང་ཐང་ཀ སྤྱི་ནོར་༧གོང་ས་༸སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་བྱས་ཏེ། མཆོད་པ་སྣ་མིན་དང་ཡོན་ཆབ་ཕུལ་བ་དང་། མདུན་ཅོག་སྟེང་དུ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་གསུང་རྩོམ་གྱིས་གཙོས་བོད་ཀྱི་ཆོས་དང་རིག་གཞུང་ངོ་སྤྲོད་ཀྱི་དཔེ་དེབ་འདྲ་མིན་ཨིན་ཡིག་དང་རྒྱ་ཡིག་དུ་ཡོད་པ་རིན་མེད་འགྲེམས་སྤེལ་དང་འབྲེལ། ཉིན་འཁྱོངས་སྐུ་ཚབ་དོན་གཅོད་ཀྱིས་གཙོས་ལས་བྱེད་དང་བཅས་པའི་ངོ་སྤྲོད་གནང་བར། མི་ཚོགས་མང་པོ་འདུས་ཏེ་དཔེ་དེབ་འཁྱེར་བ་དང་། དྲི་བ་བཀོད་པ་སོགས་དྲིལ་བསྒྲགས་ཀྱི་ལས་དོན་ཕུན་སུམ་ཚོགས་པ་བྱུང་ཡོད།

ཨེ་སི་ཊི་བོད་རིགས་མཐུན་ཚོགས་ནས་ཉིན་གསུམ་རིང་བོད་ཀྱི་ཐུན་མིན་ཟས་རིགས་མོག་མོག་བཟོ་ཚོང་ཀྱི་ལས་གཞི་སྤེལ་ཏེ། ཉིན་ལྟར་བོད་ཀྱི་མོག་མོག་ཚོང་སར་མི་ཚོགས་ཆེ་ཤོས་ཆགས་པ་དང་། ཡུལ་གཞན་འབྲུག་པ་དང་བལ་ཡུལ་སོགས་ནས་ཀྱང་དེང་སང་མོག་མོག་ཚོང་བཞིན་ཡོད་ཀྱང་། བོད་པའི་མོག་མོག་ཅེས་པ་མོག་རྡོག་ཆེ་ལ་དྲི་ཞིམ་ཆེ་བ། ཁུ་བ་ཡོད་པ་བཅས་མཚན་སྙན་ཆེ་ཤོས་འགྲན་ཟླ་བྲལ་བར་གྱུར་ཏེ་བོད་རིགས་མཐུན་ཚོགས་ཀྱི་དཔལ་འབྱོར་འདུ་འགོད་ལའང་ཕན་པའི་གོ་གཉིས་ཆོད་ཀྱི་ལས་གཞི་ཞིག་ཆགས་ཡོད། 

རིག་གཞུང་དུས་སྟོན་དེར་མི་རིགས་སོ་སོའི་རིག་གཞུང་འཁྲབ་སྟོན་བྱ་རྒྱུ་ནི་མི་རིགས་སོ་སོ་ངོམས་བྱེད་ཀྱི་ལེ་ཚན་གལ་ཆེན་ཞིག་ཡིན་ཅིང་། རྒྱ་དཀར་ནག་མཚོན་མི་རིགས་ཆེ་བ་སོགས་ཀྱིས་འགྲོ་སོང་ཕོན་ཆེ་བཏང་སྟེ་ཉིན་གསུམ་རིང་འཁྲབ་སྟོན་འདྲ་མིན་དང་། གཞུང་ཚབ་དངོས་སུ་འབྱོར་ཏེ་གཏམ་བཤད་སྤེལ་བ་སོགས་ངོ་སྤྲོད་ཤུགས་ཆེ་བྱེད་བཞིན་ཡོད་ཀྱང་། ཐབ་ཆུང་ཆུང་མེ་ཚ་པོ་ཞེས་པའི་དཔེ་ལྟར། བོད་རིགས་མཐུན་ཚོགས་ནས་སྨན་ཤར་བུ་མོ་ཚོས་མཛེས་པའི་གར་སྟབས་དང་། ན་ཆུང་ཕྲུ་གུ་ཚོས་སྙན་པའི་གླུ་དབྱངས་། སྟག་ཤར་གཞོན་ནུ་ཚོས་བརྗིད་ཉམས་ལྡན་པའི་བཀྲ་ཤིས་ཤོད་པ་སོགས། གཞན་ལ་འགྲམ་མཆུ་ལྡང་མི་དགོས་པའི་འཁྲབ་གཞུང་ཕུན་སུམ་ཚོགས་པ་འཁྲབ་སྟོན་བྱས་པར། མི་རིགས་གཞན་ཚོས་དགའ་བའི་རྣམ་འགྱུར་ཁེངས་ཏེ་གཟིགས་མོར་ཕེབས་ཡོད། 

ད་ཐེངས་རིག་གཞུང་སྣ་མང་གི་དུས་ཆེ་དེ་ནི་སྐབས་ ༢༤ པ་ཆགས་ཀྱི་ཡོད་པ་དང་། ཨོ་གླིང་གཞུང་གིས་བསྡོམས་རྩིས་གནང་བར་བལྟས་ན་ཁྱོན་བསྡོམས་མི་འབོར་གཉིས་འབུམ་ལྷག་མཉམ་ཞུགས་གནང་ཡོད་འདུག །