ཕྱི་ལོ་ ༢༠༢༠ ཟླ་ ༢ ཚེས་ ༢༣ རེས་གཟའ་ཉི་མ།
༄༅། །ཕྱི་ལོ་ ༢༠༢༠ ཟླ་ ༢ ཚེས་ ༢༤ ཉིན་ཨ་རིའི་སྲིད་འཛིན་ཌོ་ནལ་ཌི་ཊི་རམ་ཕི་ Donald Trump མཆོག་རྒྱ་གར་ནང་ཐེངས་དང་པོ་རྒྱལ་དོན་འཚམས་གཟིགས་གནང་གི་ཡོད་པ་དང་བསྟུན། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་སྲིད་འཛིན་མཆོག་གི་རྒྱལ་དོན་འཚམས་གཟིགས་ལ་སྙིང་ཁོང་རུས་པའི་གཏིང་ནས་དགའ་བསུ་གནང་ཡོད།
དེ་ཡང་ཨ་རིའི་ཕོ་བྲང་དཀར་པོས་གསལ་བསྒྲགས་སྤེལ་བ་ལྟར་ན། ཨ་རིའི་སྲིད་འཛིན་ཌོ་ནལ་ཌི་ཊི་རམ་ཕི་མཆོག་དང་སྐུ་ཟླ་ལྕམ་སྐུ་མེ་ལཱ་ནི་ཡ་ཊི་རམ་ཕི་ Melania Trump མཆོག་རྣམ་གཉིས་རྒྱ་གར་གྱི་རྒྱལ་ས་ལྡི་ལི་དང་གུ་ཇུ་རཱཏ་ Gujurat མངའ་སྡེའི་གྲོང་ཁྱེར་ཨེམ་དྷ་བྷཐ་ Aahmedabad ནང་ཉིན་གྲངས་གཉིས་རིང་རྒྱལ་དོན་འཚམས་གཟིགས་གནང་གི་ཡོད་པ་རེད།
བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་བོད་མིིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་ཨ་རིའི་སྲིད་འཛིན་ཌོ་ནལ་ཌི་ཊི་རམ་ཕི་མཆོག་དང་སྐུ་ཟླ་ལྕམ་སྐུ་མེ་ལཱ་ནི་ཡ་ཊི་རམ་ཕི་མཆོག་རྣམ་གཉིས་ཀྱི་རྒྱལ་དོན་འཚམས་གཟིགས་ལ་དགའ་བསུ་ཞུས་པ་དང་སྦྲགས། ཨ་རིའི་གཞུང་ནས་བོད་དོན་དང་བོད་མི་ཚོའི་སླད་ཚད་མཐོའི་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་། ལྷག་པར་ཨ་རིའི་གཞུང་གིས་བོད་དོན་བདེན་མཐའ་གསལ་བར་གཉིས་སྨན་དབུ་མའི་ལམ་གྱི་སྲིད་བྱུས་དང་བོད་ནང་གི་ཆོས་དད་རང་དབང་ལ་རྒྱབ་སྐྱོར་གནང་དང་གནང་བཞིན་པར་ཐུགས་རྗེ་ཆེ་ཞུས་ཡོད།
བོད་ནང་གི་གནས་སྟངས་ཉིན་རེ་བཞིན་ཇེ་སྡུག་ཏུ་འགྲོ་བཞིན་ཡོད་པ་ཨ་རི་གཞུང་གིས་ངོས་འཛིན་དུ་ཨ་རིའི་གྲོས་ཚོགས་འོག་མའི་ནང་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་རྣམ་པས་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པར་ཚད་མཐོའི་མང་མོས་ཀྱིས་རྒྱབ་སྐྱོར་ཐོབ་པ་ནི་བོད་མི་རྣམས་ལ་མཚོན་ན་སེམས་ཤུགས་འཕར་མ་བསྐྱེད་ཡོད།
སླར་ཡང་ངས་ཨ་རིའི་སྲིད་འཛིན་མཆོག་གིས་དབུས་ཨ་རིའི་གཞུང་ལ་ཐུགས་རྗེ་ཞུས་པ་དང་སྦྲགས། སྲིད་འཛིན་མཆོག་གི་དབུ་ཁྲིད་འོག་ཨ་རིའི་གཞུང་ནས་མུ་མཐུད་བོད་དོན་ལ་རྒྱབ་སྐྱོར་དང་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པ་ལག་བསྟར་གནང་བའི་རེ་སྐུལ་ཞུ་རྒྱུ་ཡིན།
ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི་བྷུ་ཤི་ George H.W. Bush དམ་པ་དེ་ཉིད་མཆོག་དང་། ཨ་རིའི་སྲིད་འཛིན་ཟུར་པ་སྐུ་ཞབས་ཇོར་ཇི་བྷུ་ཤི་ George W. Bush མཆོག ཨ་རིའི་སྲིད་འཛིན་ཟུར་པ་སྐུ་ཞབས་བྷི་རག་ཨོ་བྷ་མ་ Barack Obama མཆོག་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་ཞུས་ཡོད། ཕྱི་རྒྱལ་ཁབ་ཁག་གི་ནང་ནས་ཨ་རིའི་ནང་བོད་མིའི་མི་འབོར་མང་ཤོས་ཆགས་ཡོད། ཐེངས་འདིའི་ཨ་རིའི་སྲིད་འཛིན་རྒྱལ་དོན་འཚམས་གཟིགས་ཀྱིས་ཨ་རི་དང་རྒྱ་གར་གཉིས་དབར་འཐབ་ཇུས་ཀྱི་ཕྱག་སྦྲེལ་སྔར་ལས་ལྷག་དམ་ཟབ་ཡོང་བ་དང་། ལྷག་པར་ཨ་རི་དང་རྒྱ་གར་གྱི་མི་མང་གི་འབྲེལ་ལམ་ཡར་ངོའི་ཟླ་ལྟར་གོང་ནས་གོང་དུ་འཕེལ་བའི་རེ་བ་ཡོད། ཅེས་གསུངས།།
