ཕྱི་ལོ་ ༢༠༢༠ ཟླ་ ༢ ཚེས་ ༦ རེས་གཟའ་ཕུར་བུ།

༄༅། །ཕྱི་ལོ་ ༢༠༢༠ ཟླ་ ༢ ཚེས་ ༥ ཉིན་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཁེ་ན་ཌའི་རྒྱལ་ས་ཨོ་ཊ་ཝའི་ནང་གྲོས་ཚོགས་འཐུས་མི་ཁག་གཅིག་དང་། ཉམས་ཞིབ་ལྟེ་གནས་ཁང་གི་ཉམས་ཞིབ་པ། དེ་བཞིན་རྒྱལ་སྤྱིའི་གཞུང་འབྲེལ་སྐུ་ཚབ་གནད་ཡོད་མི་སྣ་ཁག་བཅས་དང་ཐུག་འཕྲད་གནང་ཡོད།

དེ་ཡང་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་དང་ཁེ་ན་ཌའི་བོད་དོན་རྒྱབ་སྐྱོར་ཚོགས་པའི་ Canada Tibet Committee འགན་འཛིན་ཤེས་རབ་མཐར་ཕྱིན་ལགས་རྣམ་གཉིས་ཀྱིས་ཉིན་གྲངས་གཉིས་རིང་ཁེ་ན་ཌའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཨ་རིབ་ཝི་རཱ་ནི་ Arif Virani མཆོག་གིས་གཙོས་ཁེ་ན་ཌའི་གྲོས་ཚོགས་འཐུས་མི་གྲངས་ ༢༥ ལྷག་དང་ཐུག་འཕྲད་ཀྱིས་བོད་ནང་གི་འགྲོ་བ་མིའི་ཐོབ་ཐང་དང་རང་དབང་གི་གནས་སྟངས་ཡར་རྒྱས་ཡོང་བར་གྲོས་ཚོགས་འཐུས་མི་རྣམས་ནས་རྒྱབ་སྐྱོར་གནང་དགོས་པའི་འབོད་སྐུལ་ཞུས་ཡོད།

སྐབས་དེར་ཁེ་ན་ཌའི་གྲོས་ཚོགས་འཐུས་མི་རྣམས་ནས་རྒྱ་ནག་གཞུང་གིས་བོད་ནང་མི་རིགས་དབྱེ་འབྱེད་ཀྱི་སྲིད་བྱུས་ལག་བསྟར་བྱས་དང་བྱེད་བཞིན་པར་མཐའ་གཅིག་ཏུ་ངོ་རྒོལ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་སྐུ་ཚབ་དང་རྒྱ་ནག་གཞུང་གི་དབར་བོད་རྒྱ་གྲོས་མོལ་བསྐྱར་གསོ་ཡོང་བར་རྒྱབ་སྐྱོར་གནང་རྒྱུའི་ཁས་ལེན་གནང་ཡོད། གཞན་ཡང་དངོས་གྲུབ་ཚེ་རིང་ལགས་དང་ཤེས་རབ་མཐར་ཕྱིན་ལགས་རྣམ་གཉིས་ཀྱིས་ཁེ་ན་ཌའི་རྒྱལ་ས་ཨོ་ཊ་ཝའི་ནང་རྟེན་གཞི་བྱས་པའི་ཐེ་ཝན་གྱི་གཞུང་ཚབ་ཆེན་མོ་སྐུ་ཞབས་ཝིན་སི་ཊོན་ཝན་ཡི་ཁྲིན་ Mr Winston Wen-yi Chen ལགས་དང་། དེ་བཞིན་ཁེ་ན་ཌའི་གཞུང་དང་གཞུང་འབྲེལ་མ་ཡིན་པའི་ཚོགས་པ་ཁག་གི་གནད་ཡོད་མི་སྣ་ཁག་གཅིག་དང་ཐུག་འཕྲད་གནང་ཡོད་པ་བཅས།།