ཕྱི་ལོ་ ༢༠༢༠ ཟླ་ ༢ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༢༠ ཟླ་ ༢ ཚེས་ ༡༨ རེས་གཟའ་མིག་དམར་ཉིན་གྱི་ཉིན་རྒྱབ་ཨ་རིའི་ཕྱི་སྲིད་ལྷན་ཁང་ནས་བོད་ཀྱི་ལོ་གསར་སྲུང་བརྩིའི་མཛད་སྒོ་ཞིག་ཚོགས་ཡོད་པ་དང་། མཛད་སྒོའི་ཐོག་ཨ་རིའི་ཕྱི་སྲིད་ལྷན་ཁང་གི་ཤར་ཨེ་ཤི་ཡ་དང་ཞི་བདེ་རྒྱ་མཚོའི་ས་ཁུལ་ལས་དོན་ཚན་པའི་དྲུང་ཆེ་ལས་རོགས་ཌེ་ཝི་ཌི་སི་ཊིལ་ཝེལ་ David Stilwell མཆོག་ཆེད་ཕེབས་ཀྱིས་གཞིས་བྱེས་བོད་མི་ཡོངས་ལ་བོད་རབ་གནས་ལྕགས་བྱི་ལོའི་གནམ་ལོ་གསར་དུ་བཞད་པའི་དགའ་སྟོན་ལ་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་སྦྲགས་བོད་ནང་གི་བོད་མིའི་ཆོས་དད་རང་དབང་ལ་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད།
བྱང་ཨ་རིའི་སྐུ་ཚབ་དོན་དངོས་གྲུབ་ཚེ་རིང་ལགས་ཀྱིས་ཨ་རིའི་ཕྱི་སྲིད་དྲུང་ཆེ་མ་ཡི་ཀི་པོམ་པེའོ་ Mike Pompeo མཆོག་གིས་དབུས་ཨ་རིའི་དམིགས་བསལ་འབྲེལ་མཐུད་ལས་ཁང་གི་ལས་བྱེད་དང་ཨ་རིའི་རྒྱལ་ས་མངའ་ཁུལ་གྱི་བོད་རིགས་སྤྱི་མཐུན་ཚོགས་པའི་ལས་བྱེད་ཡོངས་ལ་ལོ་གསར་སྲུང་བརྩིའི་མཛད་སྒོ་གོ་སྒྲིག་གནང་བར་ཐུགས་རྗེ་ཆེ་ཞུས་པ་དང་འབྲེལ། བོད་ཀྱི་ལོ་གསར་སྲུང་བརྩིའི་རྒྱབ་ལྗོངས་ཀྱི་ལོ་རྒྱུས་སྐོར་ངོ་སྤྲོད་དང་བོད་ནང་གི་ཛ་དྲག་གི་གནས་སྟངས། གཞིས་ལུས་བོད་རིགས་སྤུན་ཟླ་ཚོའི་སྙིང་སྟོབས་ལ་རྗེས་སུ་ཡི་རངས་དང་བསྔགས་བརྗོད་ཞུས་ཡོད།
གཞན་ཡང་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ཨ་རིའི་ནེའུ་ཡོག་གྲོང་ཁྱེར་ནང་རྟེན་གཞི་བྱས་པའི་རྒྱལ་མོའི་མི་མང་དཔེ་མཛོད་ཁང་ Queens Public Library དུ་འགྲེམས་སྟོན་གྱི་ལམ་ནས་བོད་ཀྱི་དངོས་ཡོད་གནས་སྟངས་ལ་འཁྱོག་བཤད་ཀྱི་དྲིལ་བསྒྲགས་སྤེལ་ནས་མི་མང་ལ་མགོ་སྐོར་གཏོང་གི་ཡོད་པ་དེར་ཨ་རིར་གནས་སྡོད་བོད་མི་བརྒྱ་ཕྲག་བརྒལ་བས་ངོ་རྒོལ་གནང་བར་རྗེས་སུ་ཡི་རངས་ཞུས་ཡོད། ཕྱོགས་མཚུངས་དངོས་གྲུབ་ཚེ་རིང་ལགས་ཀྱིས་ཨ་རི་གཞུང་ལ་བོད་དོན་དམིགས་བསལ་འབྲེལ་མཐུད་པ་མགྱོགས་མྱུར་བསྐོ་གཞག་གནང་དགོས་པའི་འབོད་སྐུལ་ཞུས་ཡོད།
ཐེངས་འདིའི་ལོ་གསར་མཛད་སྒོའི་ཐོག་ཨ་རིའི་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་ཡོ་ཧོ་ Ted Yoho མཆོག་དང་། ཨ་རིའི་ལྷོ་དབུས་ཨེ་ཤི་ཡའི་ལས་དོན་ཚོགས་ཆུང་གི་དྲུང་ཆེའི་ལས་རོགས་གཞོན་པ་ཐོ་མ་སི་ Thomas Vajda མཆོག ཨ་རིའི་མི་འབོར་དང་སྐྱབས་བཅོལ། གཞིས་སྤོ་ལས་དོན་ཚན་པའི་དྲུང་ཆེ་ལས་རོགས་གཞོན་པ་རི་ཆར་ཌི་ Richard Albright མཆོག ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཁང་གི་ཆེས་མཐོའི་སྐུ་ཚབ་བྷི་རོན་བྷད་ཀི་ Brownback མཆོག ཨ་རིའི་མང་གཙོ་དང་འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ཚན་པའི་དྲུང་ཆེ་ལས་རོགས་རོ་བྷར་ཊི་ Robert Destro མཆོག་བཅས་མཉམ་ཞུགས་གནང་ཡོད་པ་བཅས།།
