ཕྱི་ལོ་ ༢༠༢༠ ཟླ་ ༢ ཚེས་ ༧ རེས་གཟའ་པ་སངས།

༄༅། །འདི་གའི་ཆེད་གཉེར་གསར་འགོད་པ་སྐལ་བཟང་བདེ་སྐྱིད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༢ ཚེས་ ༧ རེས་གཟའ་པ་སངས་ཉིན་རྒྱ་གར་བྱང་ཕྱོགས་སུ་རྟེན་གཞི་བྱས་པའི་ཧར་པ་སྤུར་འོདད་རྒུ་གཡུ་རྒྱལ་གླིང་བོད་མིའི་གཞིས་ཆགས་ཀྱི་ཉེ་འདབས་སུ་ཡོད་པའི་ཧར་པ་སྤུར་གཏན་ཉིན་སློབ་གྲྭའི་སློབ་ཟུར་གྱི་གོ་སྒྲིག་འོག ཧར་སྤུར་གཏན་ཉིན་སློབ་གྲྭའི་རྩེད་ཐང་དུ་ཧར་སྤུར་སློབ་གྲྭ་དབུ་བརྙེས་ཏེ་ལོ་ངོ་ ༥༠ ཧྲིལ་པོ་འཁོར་བའི་དུས་དྲན་མཛད་སྒོ་སྲུང་བརྩི་གཟབ་རྒྱས་ཞུས་སོང་།

དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༤༥ ཐོག་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཆེ་བསྟོད་སྐུ་མགྲོན་བོད་མིའི་སྒྲིག་འཛུགས་ཀྱི་ཆེས་མཐོའི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་དང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག དྭང་སློབ་ཨང་ ༢༢ ཀྱི་དམག་སྤྱི་སྐུ་ཞབས་ཨ་ཤིཤ་ཨ་ཧུ་ཇ་ Ashish Ahuja མཆོག ཧར་པ་སྤུར་གཏན་ཉིན་སློབ་གྲྭའི་སློབ་སྤྱི་ཨེ་པི་སིངྒ་ AP Singh ལགས། དེ་བཞིན་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་བླ་བྲང་འཕགས་པ་ཚེ་རིང་མཆོག་དང་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག ཧར་པ་སྤུར་གཏན་ཉིན་སློབ་གྲྭའི་སློབ་ཟུར་ཁྱོན་མི་གྲངས་ ༡༦༠ དང་དེ་དག་གི་ཕ་མ། སློབ་ཕྲུག་གྲངས་ ༤༧༠ ཡོད་པའི་ཁོངས་ནས་བོད་ཕྲུག་ཁྱོན་གྲངས་ ༤༠ ཙམ་བཅས་ཚང་འཛོམས་ཀྱིས་ཐོག་མར་བོད་ཀྱི་ཟློས་གར་ཚོགས་པས་བོད་ལུགས་སྲོལ་རྒྱུན་གྱི་ལམ་ནས་ཕེབས་བསུའི་སྣེ་ལེན་ཞུས་ཡོད། 

དེ་རྗེས་མཛད་སྒོའི་སྐུ་མགྲོན་གཙོ་བོ་མཆོག་གིས་གཙོས་ཆེ་བསྟོད་སྐུ་མགྲོན་སོགས་ཀྱིས་སྣང་གསལ་མར་མེ་ཞལ་ཕྱེ་གནང་གྲུབ་མཚམས་འཕགས་བོད་གཉིས་ཀྱི་རྒྱལ་གླུ་དབྱངས་སུ་གྱེར་རྗེས་སློབ་ཟུར་རྣམས་ནས་ ༼ ལྔ་བཅུ་དུས་སྟོན། ༽ ཞེས་པའི་མཉམ་གཞས་འབུལ་ཡོད། མཉམ་གཞས་ཀྱི་གཞས་ཚིག་དང་གདངས་ཨ་རི་མི་ནི་སོ་ཊར་རྟེན་གཞི་བྱས་པའི་སློབ་གྲྭའི་སློབ་ཟུར་ཕུན་ཚོགས་རྡོ་རྗེ་ལགས་ཀྱིས་བཟོ་སྒྲིག་གནང་འདུག 

དེ་ནས་སློབ་གྲྭའི་ཚོགས་གཙོ་ཟུར་པ་སྤྱི་འཐུས་བློ་བཟང་ཡེ་ཤེས་ལགས་ཀྱིས་དུས་སྟོན་མཛད་སྒོའི་གོ་སྒྲིག་ཚོགས་ཆུང་གི་ཚོགས་གཙོ་བཀྲ་ཤིས་ལེགས་ཆུང་ལགས་ཀྱི་གསུང་འཕྲིན་སྒྲོགས་སྦྱང་གནང་དོན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་། རྒྱ་གར་གཞུང་མང་གཉིས་ཀྱི་བོད་དོན་དང་བོད་མིར་རྒྱབ་སྐྱོར་དང་མཐུན་འགྱུར་རོགས་རམ་གནང་བར་ངས་ཐུགས་རྗེ་ཆེ་ཞུ་རྒྱུ་ཡིན། ཕྱོགས་མཚུངས་དྭང་སློབ་དམག་སྒར་ ༢༢ ནས་སློབ་གྲྭར་མཐུན་འགྱུར་དང་ལས་བྱེད་ཡོངས་ཀྱི་སེམས་ཤུགས་ལ་བརྟེན་ནས་ད་ཐེངས་སློབ་གྲྭ་ནས་སློབ་ཕྲུག་མང་པོ་ཞིག་སྤྱི་ཚོགས་ནང་ཞབས་འདེགས་ཞུ་བཞིན་ཡོད། ཅེས་སོགས་གསུངས་རྗེས་ཚོགས་གཞོན་ཚེ་བརྟན་མགོན་པོ་ལགས་ཀྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསུང་འཕྲིན་སྒྲོགས་སྦྱང་ཞུས།

དེ་ནས་ཧར་པ་སྤུར་གཏན་ཉིན་སློབ་གྲྭའི་སློབ་སྤྱི་ཨེ་པི་སིངྒ་ལགས་ཀྱིས་འཚམས་འདྲི་དང་འབྲེལ་སློབ་གྲྭའི་ལས་དོན་བྱེད་ཕྱོགས་སོགས་ཀྱི་སྐོར་ལ་ངོ་སྤྲོད་གནང་གྲུབ་མཚམས་ཆེ་བསྟོད་སྐུ་མགྲོན་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་གསུང་བཤད་གནང་དོན། ཧར་པ་སྤུར་གཏན་ཉིན་སློབ་གྲྭ་ཆེས་ཐོག་མར་གསར་བཙུགས་གནང་བའི་སྐབས་ཀྱི་ལས་བྱེད་ཚང་མ་ད་ཆ་བཀའ་དྲིན་ཆེན་པོ་ཆགས་ཀྱི་ཡོད་པ་མ་ཟད། ཕྱི་ལོ་ ༡༩༧༠ ནས་ད་བར་སློབ་གྲྭའི་ལས་དོན་ཐད་ཕྱག་ལས་གནང་མཁན་ཡོངས་ལ་ངས་བཀའ་དྲིན་བླ་མེད་དུ་ཆེ་ཞེས་ཞུ་རྒྱུ་ཡིན། 

སློབ་གྲྭ་འདི་ནི་སློབ་གྲྭ་གཞན་ལྟར་ཆེན་པོ་མེད་ཀྱང་གྲུབ་འབྲས་ཧ་ཅང་ཡག་པོ་བྱུང་ཡོད། དཔེར་ན། བོད་མིའི་སྒྲིག་འཛུགས་སམ་བོད་པའི་སྤྱི་ཚོགས་ནང་སློབ་གྲྭ་འདི་ནས་མཐར་སོན་པའི་སློབ་ཕྲུག་མང་དག་ཅིག་ཞབས་འདེགས་ཞུ་བཞིན་ཡོད། ངས་དུས་ཚོད་དེ་དང་བསྟུན་སློབ་གྲྭའི་སློབ་ཟུར་དང་གོ་སྒྲིག་གནང་མཁན་ཡོངས་ལ་བསྔགས་བརྗོད་ཞུ་རྒྱུ་ཡིན།

མ་འོངས་པར་འཛམ་གླིང་འདི་བཞིན་ཚུལ་དང་མཐུན་པར་ཡོང་དགོས་ཀྱི་ཡོད་པ་བརྟེན། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གཡོལ་དུ་མེད་པའི་ཐུགས་འགན་དམ་བཅའ་བཞིའི་ཐོག་ལ་རྒན་གཞོན་དབྱེར་མེད་ཐོག་ནས་དོ་སྣང་དང་སྦྲགས་སློབ་སྦྱོང་གནང་དགོས་ཀྱི་ཡོད། འགྲོ་བ་མི་ཚང་མ་བདེ་སྐྱིད་འདོད་ཀྱི་ཡོད་པ་དང་སྡུག་བསྔལ་འདོད་ཀྱི་མེད། བདེ་སྐྱིད་འདོད་པར་བདེ་སྐྱིད་སྒྲུབ་རྒྱུའི་བྱ་བ་བརྩམས་དགོས། ཅེས་སོགས་ཀྱི་གསུང་བཤད་གནང་།

དེ་རྗེས་སློབ་གྲྭའི་དགེ་རྒན་ཟུར་པ་ཆེས་མཐོའི་ཁྲིམས་ཞིབ་པ་ཆེ་བ་དྭགས་པོ་བསོད་ནམས་ནོར་བུ་མཆོག་གིས་གསུང་དོན། ང་རང་དེ་སྔོན་སློབ་གྲྭ་འདིའི་དགེ་རྒན་ཡིན་པར་བརྟེན། སློབ་གྲྭའི་ལོ་ངོ་ ༥༠ འཁོར་བའི་དུས་སྟོན་མཛད་སྒོར་བཅར་རྒྱུ་བྱུང་བར་ཧ་ཅང་དགའ་པོ་བྱུང་།  དུས་སྟོན་དེ་ལྟ་བུ་སྲུང་བརྩི་ཞུ་རྒྱུ་གལ་ཆེན་པོ་ཆགས་ཀྱི་ཡོད། ཕྱི་ལོ་ ༡༩༨༠ ཙམ་ལ་སློབ་གྲྭའི་མཐུན་འགྱུར་ཡག་པོ་མེད་ཀྱང་། སློབ་གྲྭའི་ལས་བྱེད་དང་དགེ་རྒན་རྣམས་ཀྱི་སེམས་ཤུགས། དེ་བཞིན་སློབ་ཕྲུག་རྣམས་ཀྱི་སློབ་སྦྱོང་བརྩོན་འགྲུས་ལ་བརྟེན་ནས་ད་ཆ་བོད་པའི་སྤྱི་ཚོགས་ནང་འགོ་ཁྲིད་ཀྱི་ལས་ཁུར་ལ་སོགས་གནང་བཞིན་ཡོད། ད་ཆ་སློབ་གྲྭའི་ནང་རྒྱ་གར་སློབ་ཕྲུག་མང་པོ་ཞིག་ཡོད་སྟབས། ངས་ཁྱེད་རྣམ་ཚོར་ཞུ་རྒྱུར། སློབ་སྦྱོང་གནང་རྗེས་མཐར་མི་བཟང་པོ་ཞིག་ཆགས་དགོས་པ་དང་། ཕྱོགས་མཚུངས་སྤྱི་ཚོགས་ཞབས་འདེགས་ཞུ་དགོས། ཅེས་སོགས་ཀྱི་གསུང་བཤད་གནང་། 

དེ་ནས་དྭང་སློབ་ཨང་ ༢༢ ཀྱི་དམག་སྤྱི་སྐུ་ཞབས་ཨ་ཤིཤ་ཨ་ཧུ་ཇ་མཆོག་གིས་ཧར་པ་སྤུར་གཏན་ཉིན་སློབ་གྲྭའི་འཛིན་སྐྱོང་སྟངས་འཛིན་བྱེད་མཁན་ནི་དབུས་བོད་སློབ་འཛིན་ཚོགས་ཡིན་པ་དང་། ཉལ་ཁང་གི་ལས་དོན་འགན་ཁུར་གནང་མཁན་དམག་སྒར་ཡིན་སྐོར་སོགས་ངོ་སྤྲོད་གནང་བ་མ་ཟད། དྭང་སློབ་ཨང་ ༢༢ ཀྱི་དམག་མི་ཡོངས་ནས་ཉལ་ཁང་གི་མཐུན་འགྱུར་ཐོག་འགྲོ་གྲོན་གནང་བཞིན་ཡོད་པ་དང་། མ་འོངས་པ་དམག་སྒར་གྱི་ངོས་ནས་དེ་དེ་བཞིན་མཐུན་འགྱུར་སོགས་གནང་རྒྱུ་ཡིན་སྐོར་སོགས་གསུངས། 

དེ་རྗེས་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་འཚམས་འདྲི་དང་འབྲེལ་གསུང་དོན། སློབ་ཕྲུག་ཟུར་པ་རྣམས་ནས་དུས་སྟོན་གྱི་མཛད་སྒོ་གྲ་སྒྲིག་ཡག་པོ་གནང་འདུག དམིགས་བསལ་སློབ་གྲྭ་འདི་ནི་དམག་སྒར་དང་འབྲེལ་བ་ཡོད་སྟབས། དམག་སྒར་ཧ་ཅང་བཀའ་དྲིན་ཆེན་པོ་རེད། དམག་སྒར་ནས་དམག་སྤྱི་དང་མདའ་དཔོན་སོགས་མང་པོ་ཕེབས་འདུག སློབ་གྲྭ་གསར་བཙུགས་གནང་སྐབས་དམག་སྒར་ནས་སྐུ་ལས་མང་པོ་བསྐྱོན་ཡོད། དེ་རིང་ཧར་པ་སྤུར་གཏན་ཉིན་སློབ་གྲྭ་དབུ་བརྙེས་ཏེ་ལོ་ངོ་ ༥༠ འཁོར་བའི་དུས་སྟོན་ཐོག་སློབ་ཟུར་རྣམ་པས་དགེ་ལས་ཟུར་པ་རྣམས་ལ་ལེགས་གསོའི་ཕྱག་རྟགས་འབུལ་བར་བསྔགས་བརྗོད་ཞུ་རྒྱུ་ཡིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་དང་མི་ཐོག་རྒན་པ་རྣམས་ཀྱིས་སྐུ་ལས། དགེ་ལས་རྣམས་ཀྱི་སེམས་ཤུགས་ལ་བརྟེན་ནས་ད་ཆ་ང་ཚོ་འཛམ་གླིང་གཞན་གྱི་མི་དང་ལྷན་དུ་དཔུང་པ་འདྲ་མཉམ་ཐོག་འགྲོ་ཐུབ་ཀྱི་ཡོད། 

བོད་མིའི་སྒྲིག་འཛུགས་ཀྱིས་ཤེས་ཡོན་གལ་ཆེ་རྩི་བཞིན་ཡོད་པར་བརྟེན། ཤེས་རིག་ལས་ཁུངས་ནས་ཕྱི་ལོ་ ༢༠༡༡ ནས་བཟུང་ད་བར་སློབ་ཡོན་འགྲོ་གྲོན་ལྡབ་གསུམ་སྤར་ཡོད། ཤེས་ཡོན་སློབ་སྦྱོང་ཙམ་མ་ཟད་བཟང་སྤྱོད་གོང་འཕེལ་ལ་སོགས་ཀྱི་ཐོག་ལའང་དོ་སྣང་བྱེད་དགོས། ཅེས་དང་།

གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མི་རྣམས་ནས་བོད་དོན་འཐབ་རྩོད་ཐོག་གླེང་སློང་བྱེད་དགོས་པའི་འགན་ཡོད་པ་མ་ཟད། ངེས་པར་དུ་དོ་སྣང་བྱེད་དགོས། སྤྱི་ཚོགས་ནང་གི་རྙོག་གླེང་རྣམས་ལ་དོན་མེད་མགོ་འཐོམས་ནས་སྡོད་རྒྱུ་མེད། བོད་མི་ནང་ཁུལ་མཐུན་སྒྲིལ་བྱེད་དགོས། བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་དགོངས་གཞིར་བཟུང་སྒྲུབ་དགོས། ཅེས་སོགས་ཀྱི་གསུང་བཤད་གནང་རྗེས་གོ་སྒྲིག་ཚོགས་ཆུང་གི་ཚོགས་མི་བསྟན་འཛིན་ཀུན་བཟང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་གྲོལ། 

ཐེངས་འདིའི་མཛད་སྒོའི་ཐོག་དཔལ་ལྡན་སྲིད་སྐྱོང་མཆོག་གིས་དགེ་ལས་ཟུར་པ་རྣམས་ལ་ལེགས་གསོའི་ཕྱག་རྟགས་འབུལ་བ་དང་། བོད་ཀྱི་ཟློས་གར་ཚོགས་པ་དང་། སློབ་ཟུར་རྣམ་པ། དེ་བཞིན་སློབ་ཕྲུག་ལ་སོགས་ཀྱིས་གཞས་སྣ་འཁྲབ་སྟོན་གནང་ཡོད་པ་བཅས། །

                                                                                                                                                                                                  པར་པ་བསྟན་འཛིན་ཕན་བདེ་ལགས།