ཕྱི་ལོ་ ༢༠༢༠ ཟླ་ ༢ ཚེས་ ༡༩ རེས་གཟའ་ལྷག་པ།
༄༅། །ཕྱི་ལོ་ ༢༠༢༠ ཟླ་ ༢ ཚེས་ ༡༧ རེས་གཟའ་ཟླ་བའི་ཉིན་ཀོ་ལི་གྷལ་དོན་ལྡན་གླིང་བོད་མིའི་གཞིས་ཆགས་སུ་ཨ་རིའི་རོགས་ཚོགས་ USAID དང་། ཨ་རི་ནིའུ་ཡོག་དང་ནིའུ་ཇར་སི་ཁུལ་གནས་སྡོད་ཀོ་ལི་གྷལ་དོན་ལྡན་གླིང་གཞིས་ཁོངས་ནས་ཡིན་པའི་བོད་མི་རྣམས་ཀྱིས་མཐུན་འགྱུར་རོགས་རམ་འོག་ལུས་སྦྱོང་ཁང་ལེགས་པར་གྲུབ་པའི་དབུ་འབྱེད་མཛད་སྒོ་ཞིག་ཚོགས་གནང་ཡོད།
དེ་ཡང་དབུ་འབྱེད་མཛད་སྒོའི་སྐུ་མགྲོན་གཙོ་བོ་ལྷོ་སྤྱི་ཆོས་འཕེལ་ཐུབ་བསྟན་ལགས་དང་། ས་གནས་འགོ་འཛིན་དགེ་ལེགས་འབྱུང་གནས་ལགས། ས་གནས་འཐུས་ཚོགས་ཀྱི་ཚོགས་གཙོ། ས་གནས་རང་བདེན་ཚོགས་གཙོ། མཉམ་འབྲེལ་ཚོགས་གཙོ། དགོན་སྡེ་ཁག་གི་སྐུ་ཚབ། གཞིས་གྲོང་ཁག་གི་བརྒྱ་དཔོན་དང་སྤྱི་མི། ན་གཞོན་རྩེད་འགྲན་ཚོགས་པའི་འཐུས་མི་སོགས་གཞུང་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་བཅས་མཉམ་འཛོམས་ཀྱིས་ཐོག་མར་ལྷོ་སྤྱི་ཆོས་འཔེལ་ཐུབ་བསྟན་ལགས་ཀྱིས་ལུས་སྦྱོང་ཁང་དབུ་འབྱེད་གནང་སྟེ། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་འཆར་སྣང་སྐོར་ངོ་སྤྲོད་དང་སྦྲགས། བོད་མིའི་སྒྲིག་འཛུགས་ནང་སྲིད་ལས་ཁུངས་ནས་རང་ཁ་རང་གསོ་དང་རྒྱུན་སྐྱོང་ཞེས་པའི་ལས་གཞིའི་འོག ཨར་པོའི་ལས་གཞི་དང་། ལུས་སྦྱོང་ཁང་ལ་སོགས་ཀྱི་ལས་འཆར་ཐོག་ལག་ལེན་བསྟར་བཞིན་ཡོད་སྐོར་དང་།
ཕྱོགས་མཚུངས་ལུས་སྦྱོང་ཁང་དེའི་བརྒྱུད་ཀོ་ལི་གྷལ་དོན་ལྡན་གླིང་བོད་མི་རྣམས་ཀྱི་ལུས་སེམས་གཉིས་ཀར་ཕན་ཐོགས་ཆེན་པོ་ཡོང་རྒྱུ་ཡིན་སྐོར་དང་། ལུས་སྦྱོང་ཁང་དེ་བཞིན་བདག་གཅེས་ཡག་པོ་བརྒྱག་དགོས་སྐོར་སོགས་གསུངས།
དེ་ནས་ས་གནས་འགོ་འཛིན་གྱིས་གོང་གི་ལས་འཆར་ཐོག་མཐུན་འགྱུར་གནང་མཁན་སོགས་ཀྱི་སྐོར་ངོ་སྤྲོད་གནང་རྗེས་ས་འཐུས་ཚོགས་གཙོས་ས་གནས་འགོ་འཛིན་གྱིས་ལས་གཞིར་སེམས་ཤུགས་ཀྱི་ངང་ནས་ལས་དོན་སྤེལ་བར་ཐུགས་རྗེ་ཆེ་ཞུས་པ་དང་། ཕྱོགས་མཚུངས་ལྷོ་སྤྱིས་སྟངས་འཛིན་འོག་རྒྱ་གར་ལྷོ་ཕྱོགས་སུ་ཡོད་པའི་བོད་མིའི་གཞིས་ཆགས་ལྔ་ཚགས་ཚུད་ངང་གནས་བཞིན་པར་བསྔགས་བརྗོད་གནང་ཡོད་པ་བཅས། །
