ཕྱི་ལོ་ ༢༠༢༠ ཟླ་ ༢ ཚེས་ ༣ རེས་གཟའ་ཟླ་བ། 

༄༅། །ཕྱི་ལོ་ ༢༠༢༠ ཟླ་ ༢ ཚེས་ ༡ ནས་ ༢ བར་ལྡི་ལི་བོད་སྒར་བསམ་ཡས་གླིང་བོད་མིའི་ས་གནས་འགོ་འཛིན་ལས་ཁུངས་དང་ལྡི་ལི་བོད་ཁང་གཉིས་ཀྱི་གོ་སྒྲིག་འོག་ལྡི་ལི་བོད་སྒར་བསམ་ཡས་གླིང་དུ་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ཚོགས་འདུ་ཚོགས་ཡོད་པ་དང་། ཚོགས་འདུའི་ཐོག་རྒྱ་གར་གྱི་མཐོ་སློབ་ཁག་གཅིག་གི་སློབ་མ་གྲངས་ ༡༥༠ ལྷག་མཉམ་ཞུགས་གནང་ཡོད།

དེ་ཡང་ཚོགས་འདུ་དབུ་འབྱེད་ཀྱི་མཛད་སྒོའི་ཐོག་ལྡི་ལི་སྐུ་ཚབ་དོན་གཅོད་འབྲོང་ཆུང་དངོས་གྲུབ་ལགས་ཀྱིས། ཆོས་དད་ཡོད་མེད་ལ་མ་ལྟོས་པར་ནང་སེམས་ཀྱི་རིན་ཐང་བྱམས་པ་དང་སྙིང་རྗེ་ནི་འགྲོ་བ་མི་ཚང་མར་གལ་ཆེན་པོ་ཆགས་ཡོད། དུས་རབས་ ༢༠ ནི་མི་གསོད་ཁྲག་སྦྱོར་གྱི་དུས་རབས་ཤིག་ཏུ་གྱུར་ཡོད་པ་དང་། དུས་རབས་ ༢༡ ནི་ཞི་བདེ་དང་གྲོས་མོལ་གྱི་དུས་རབས་ཤིག་ལ་བསྒྱུར་དགོས། ཞི་བདེ་དང་གྲོས་མོལ་གྱི་དུས་རབས་ཤིག་ཡོང་བར་ཤེས་ཡོན་བརྒྱུད་གཞི་རྩའི་འགྲོ་བ་མིའི་བསམ་བློ་གཏོང་སྟངས་ལ་འགྱུར་བ་གཏོང་དགོས་ཞེས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བཀའ་སློབ་ལུང་འདྲེན་གྱིས་གསུང་བཤད་གནང་ཡོད།

གཞན་ཡང་ཚོགས་འདུ་དབུ་འབྱེད་ཀྱི་མཛད་སྒོའི་ཐོག་ཤཱིཝ་ནཱ་ཌར་མཐོ་སློབ་ཁང་ Shiv Nadar University གི་སློབ་དཔོན་སྐུ་ཞབས་ཀ་ཝེ་རི་གྷིལ་ Dr Kaveri Gill ལགས་དང་མཁས་དབང་སྐུ་ཞབས་ཝ་ཧི་དི་Prof. Saddiq Wahid ལགས། ལྡི་ལི་བོད་ཁང་གི་ངེས་སྟོན་པ་དགེ་བཤེས་རྡོ་རྗེ་དགྲ་འདུལ་ལགས་བཅས་ནས་གསུང་བཤད་གནང་ཡོད།  ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་ཚོགས་འདུ་དངོས་གཞིའི་ཐོག་མཁས་དབང་ཁག་གཅིག་གིས་གཏམ་བཤད་ལྷུག་པོར་གནང་ཡོད་པ་བཅས།།