རྡ་སའི་བོད་མི་ཚོས་ཏོག་དབྱིབས་རིམས་ནད་དེར་ཡིད་གཟབ་གནང་རོགས།

གསར་ལས་ཁང་གི་གསར་འགོད་པས།

༢༠༢༠-༠༢-༠༤

ཕྱི་ལོ་ ༢༠༢༠ ཟླ་ ༢ ཚེས་ ༤ རེས་གཟའ་མིག་དམར།

༄༅། །འདི་གར་སིམ་སྤྱི་ལས་ཁུངས་ནས་བཏང་གནས་ནང་འཁོད་དོན། ཧི་མཱ་ཅལ་མངའ་སྡེ་གཞུང་གི་སྤྱི་ཁྱབ་དྲུང་ཆེ་ཟུར་པ་སྐུ་ཞབས་ཤྲི་ཀནྟ་སྦལ་སྡི་ Shrikant Baldi མཆོག་བགྲེས་ཡོལ་ཕེབས་པར་བརྟེན་ཁོང་གི་ཚབ་ཏུ་ཕྱི་ལོ་ ༢༠༢༠ ཟླ་ ༠༡ ཚེས་ ༠༡ ཉིན་ནས་སྐུ་ཞབས་ཨ་ནིལ་ཀུ་མཱར་ཁཱ་ཅི་ Anil Kumar མཆོག་ལ་ཧི་མཱ་ཅལ་མངའ་སྡེ་གཞུང་གི་སྤྱི་ཁྱབ་དྲུང་ཆེར་བསྐོ་གཞག་གནང་ཡོད། ཕྱི་ལོ་ ༢༠༢༠ ཟླ་ ༠༢ ཚེས་ ༠༤ ཉིན་སིམ་ལ་སྤྱི་ཁྱབ་བསྟན་འཛིན་ནོར་བུ་ལགས་ཀྱིས་སྣེ་འཁྲིད་འོག་སིམ་ལ་ས་གནས་རྡོ་བྲག་དགོན་པའི་སྐུ་ཚབ་དང་། ཇོ་ནང་དགོན་པའི་སྐུ་ཚབ། དེ་བཞིན་སྤྱི་ཁྱབ་ལས་ཁུངས་ཀྱི་ལས་བྱེད་བཅས་ནས་སྤྱི་ཁྱབ་དྲུང་ཆེ་གསར་པར་འཚམས་ཞུའི་མཇལ་དར་དང་ཕྱག་རྟགས་བཅས་ཕུལ་འདུག

སྐབས་དེར་སིམ་སྤྱིས་སྤྱི་ཁྱབ་དྲུང་ཆེ་གོང་མ་རིམ་ཕེབས་རྣམས་ནས་ད་བར་འདི་ག་ལས་ཁུངས་བརྒྱུད་ཧི་མཱ་ཅལ་ཁུལ་གནས་སྡོད་བོད་མིར་མཐུན་རྐྱེན་སྦྱོར་སྤྲོད་དང་འབྲེལ་མཐུན་འགྱུར་རམ་འདེགས་གང་ཐུབ་གནང་སྐྱོང་ཡོང་བའི་རེ་སྐུལ་ཞུས་པ་ལྟར། མཐུན་འགྱུར་རོགས་རམ་དང་རྒྱབ་སྐྱོར་ཧ་ཅང་གནང་བ་དེ་དག་མུ་མཐུད་ཐུགས་ཁུར་ཆེ་བཞེས་གནང་དགོས་པའི་འབོད་སྐུལ་ཤུགས་ཆེ་ཞུས་པ་དང་སྦྲགས། དྲུང་ཆེ་མཆོག་གི་ལས་ཡུན་རིང་ལས་དོན་ཐམས་ཅད་བྱ་བ་ལམ་ལྷོང་ཡོང་བ་དང་བསམ་དོན་ཡིད་བཞིན་དུ་འགྲུབ་པའི་སྨོན་འདུན་ཡང་ཞུས་འདུག

སྤྱི་ཁྱབ་དྲུང་ཆེ་མཆོག་གིས་བར་ལམ་རྒྱ་ནག་བརྒྱུད་འཛམ་གླིང་གང་སར་ཁྱབ་གདལ་འགྲོ་བཞིན་པའི་ཏོག་དབྱིབས་ནད་ཡམས་ Corona Virus ཞེས་པའི་ཐོག་ཐུགས་འཚབ་རྒྱ་ཆེ་གནང་བཞིན་ཡོད་པ་མ་ཟད། རྡ་རམ་ས་ལ་དེ་བཞིན་སྤྱི་ནོར་༸གོང་ས་༸སྐྱབས་མཆོན་ཆེན་པོ་མཆོག་གི་བཞུགས་སྒར་ཡིན་པ་མ་ཟད། བོད་མིའི་སྒྲིག་འཛུགས་ཀྱི་བལྟི་གནས་ཀྱང་ཡིན་པས་རྒྱ་ནག་སྐམ་ས་ཆེན་མོ་དང་། བོད་ཁུལ། དེ་བཞིན་འཛམ་གླིང་ཡུལ་གྲུ་གང་ས་ནས་ཆོས་ཞུ་བ་དང་། གནས་མཇལ་བ་མང་དག་ཡོང་མུས་ཡིན་པས་རྡ་ས་གནས་སྡོད་བོད་མི་དང་། ཡུལ་མི། ལྷག་པར་མགོན་པོ་མཆོག་གི་སྐུ་ཁམས་སོགས་ཀྱི་ཐོག་མངའ་སྡེའི་གཞུང་གི་ངོས་ནས་ཐུགས་འཁུར་ཆེ་བཞེས་གནང་མུས་ཡིན་པ་མ་ཟད། གནས་སྡོད་བོད་མིའི་སྒྲིག་འཛུགས་དང་། བོད་མི་ཡོངས་ནས་ནད་ཡམས་དེའི་ཐོག་ངེས་པར་དུ་དོགས་ཟོན་གནང་དགོས་པའི་ལམ་སྟོན་རྒྱ་ཆེ་གནང་འདུག།