ཕྱི་ལོ་ ༢༠༢༠ ཟླ་ ༢ ཚེས་ ༦ རེས་གཟའ་ཕུར་བུ།
༄༅། །ལོ་ལྟར་འཛམ་གླིང་མཉམ་འབྲེལ་རྒྱལ་ཚོགས་སུ་ཕྱི་ཟླ་ ༢ བདུན་ཕྲག་དང་པོའི་ནང་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་ཞེས་པའི་དུས་དྲན་སྲུང་བརྩི་ཞུ་ཡི་ཡོད་པ་ལྟར། འདི་ལོའི་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་དེ་བཞིན་ཕྱི་ལོ་ ༢༠༢༠ ཟླ་ ༢ ཚེས་ ༤ ཉིན་སུད་སིའི་ཇི་ནི་ཝ་གྲོང་ཁྱེར་ནང་རྟེན་གཞི་བྱས་པའི་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚོགས་ཁང་དུ་སྲུང་བརྩི་ཞུས་ཡོད་པ་དང་། ཐེངས་འདིའི་དུས་དྲན་སྲུང་བརྩིའི་སྐབས་བརྗོད་གཞི་གཙོ་བོ་ནི། སེམས་འགུལ་ཐེབས་པའི་ཐུན་མོང་གི་ལས་འགུལ་སྤེལ་བར་བསྒྱུར་བཅོས་ཀྱི་ཟམ་པ་བསྐྲུན་ Building Bridges for Change- Inspiring Collective Action ཞེས་པ་དེ་ཡིན་ཞིང་། བོད་མིའི་སྒྲིག་འཛུགས་ཀྱི་སུད་སིའི་སྐུ་ཚབ་དོན་གཅོད་ཁང་གི་ལས་བྱེད་འཕྲིན་ལས་ཆོས་སྐྱིད་ལགས་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་དུས་དྲན་སྲུང་བརྩིའི་ཐོག་ཆེད་ཕེབས་ཀྱིས་གསུང་བཤད་གནང་ཡོད།
སྐབས་དེར་འཕྲིན་ལས་ཆོས་སྐྱིད་ལགས་ཀྱིས། ཆོས་དད་རང་དབང་ནི་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཡོངས་ཁྱབ་གསལ་བསྒྲགས་ནང་གི་གལ་ཆེན་ཞིག་ཡིན་པ་དང་། རྒྱ་ནག་གཞུང་གིས་བོད་ནང་གི་ཆོས་དད་རང་དབང་ལ་རྩིས་མེད་རྡོག་རོལ་བཏང་བ་དེ་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ་རེད། ཅེས་དང་། རྒྱ་ནག་གཞུང་གིས་བོད་པའི་སློབ་ཕྲུག་ཚོར་དབྱར་ཁའི་གུང་གསེང་སྐབས་ཆོས་ལུགས་ཀྱི་བྱེད་སྒོ་ཁག་ལ་ཞུགས་མི་ཆོག་པའི་བཀའ་རྒྱ་བཏང་བ་དང་། དེ་བཞིན་རྒྱ་གཞུང་གིས་བོད་མི་རྒས་ཡོལ་ཐོན་པའི་ལས་བྱེད་རྣམས་དགོན་སྡེ་དང་གནས་རྟེན་སོགས་ལ་གནས་སྐོར་དུ་འགྲོ་མི་ཆོག་པའི་བཀག་སྡོམ་བྱས་པ་སོགས་ནི་གཞི་རྩའི་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་བཏང་བ་རེད། ཅེས་གསུང་།
གཞན་ཡང་འཕྲིན་ལས་ཆོས་སྐྱིད་ལགས་ཀྱིས། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཆོས་ལུགས་ནང་ཁུལ་མཐུན་སྒྲིལ་དང་གཞི་རྩའི་འགྲོ་བ་མིའི་རིན་ཐང་གོང་མཐོར་སྤེལ་སླད་ཚན་རིག་དང་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་བགྲོ་གླེང་དང་གོ་བསྡུར་སྦྱངས་བཤད་མཛད་དང་མཛད་བཞིན་ཡོད་པ་དང་། དེ་བཞིན་གཞོན་སྐྱེས་ཚོར་དམིགས་ཏེ་སྤྱི་ཚོགས་དང་ཚོར་ཤེས། བཟང་སྤྱོད་ཀྱི་སློབ་གསོ་དང་འབྲེལ་བའི་བསླབ་གཞིའམ་ཆོས་ལུགས་ལ་མ་བརྟེན་པའི་བཟང་སྤྱོད་གོང་སྤེལ་གཏོང་ཐབས་ཀྱི་བསླབ་གཞི་ Social, Emotional, and Ethical Learning དབུ་འབྱེད་མཛད་ཡོད་པ་སོགས་ཀྱི་སྐོར་གསུངས།
དེ་ཡང་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་ཞེས་པ་ནི། འཛམ་གླིང་ནང་འཆམ་མཐུན་དང་འཚེ་མེད་ཞི་བ་གོང་མཐོར་སྤེལ་བའི་ཕྱིར་ཕྱི་ལོ་ ༢༠༡༠ ཟླ་ ༩ ཚེས་ ༢༣ ཉིན་འཛམ་གླིང་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་ཐོག་འཇོར་ཌན་Jordan གྱི་རྒྱལ་པོ་ཨཕ་ཌུ་ལཱ་ H.M. King Abdullah II མཆོག་གིས་གྲོས་འཆར་བཏོན་གནང་བ་དང་། ཕྱི་ལོ་ ༢༠༡༠ ཟླ་ ༡༠ ཚེས་ ༢༠ ཉིན་རྒྱལ་ཚོགས་སུ་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་ཞེས་སྤྱི་མོས་ཀྱིས་གཏན་འབེབས་གནང་བ་ནས་བཟུང་ལོ་ལྟར་ཕྱི་ཟླ་ ༢ བདུན་ཕྲག་དང་པོའི་ནང་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་ཞེས་རྒྱལ་ཚོགས་སུ་སྲུང་བརྩི་ཞུ་བཞིན་ཡོད།
ཐེངས་འདིའི་འཛམ་གླིང་ཆོས་ལུགས་ནང་ཁུལ་མཐུན་སྒྲིལ་གྱི་གཟའ་འཁོར་ཞེས་པའི་ཚོགས་འདུ་འདི་ཉིད་གཞུང་འབྲེལ་མ་ཡིན་པའི་ཚོགས་པ་ Foundation for GAIA དང་། དེ་བཞིན་ Alliance on Global Concerns སོགས་ཀྱིས་གོ་སྒྲིག་གནང་ཡོད་པ་བཅས།།
