ཕྱི་ལོ་ ༢༠༢༠ ཟླ་ ༢ ཚེས་ ༢༠ རེས་གཟའ་ཕུར་བུ། 

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཨ་རི་རྒྱ་ས་ཝ་ཤིང་ཊོན་ Washington DC དུ་གཞུང་འབྲེལ་ཕྱོགས་ཕེབས་གནང་སྟེ། ཨ་རིའི་ཕྱི་སྲིད་ལས་ཁུངས་ཀྱི་ཆེས་མཐོའི་གནད་ཡོད་མི་སྣ་ཁག་གཅིག་དང་། དེ་བཞིན་གྲོས་ཚོགས་ཀྱི་ལས་བྱེད་དང་ཐུག་འཕྲད་ཀྱིས་ད་ལྟའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པ་སྐོར་གོ་བསྡུར་ཤུགས་ཆེ་གནང་ཡོད།

ཕྱོགས་མཚུངས་བྱང་ཨ་རིའི་སྐུ་ཚབ་དོན་ཁང་གིས་ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ལས་བྱེད་དང་། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་མར་ཁོ་རུ་བྷིའོ་ Marco Rubio Sen. Marco Rubio མཆོག་གི་ཕྱི་སྲིད་སློབ་སྟོན་པ། ལྕམ་སྐུ་ནེན་སི་པི་ལོ་སི་ Nancy Pelosi མཆོག་གི་སློབ་སྟོན་པ་བགྲེས་པ་བཅས་ལ་གྲོས་ཚོགས་འོག་མ་ནང་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པར་ཚད་མཐོའི་མང་མོས་ཐོག་ནས་རྒྱབ་སྐྱོར་ཤུགས་ཆེ་ཐོབ་པར་དགའ་སྟོན་གྱི་ཉིན་གུང་གསོལ་ཚིགས་ཤིག་གོ་སྒྲིག་གནང་སྟེ། དཔལ་ལྡན་སྲིད་སྐྱོང་མཆོག་དང་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་རྣམ་གཉིས་ཀྱིས་གོང་གི་ཁྲིམས་འཆར་རྒྱབ་སྐྱོར་ཤུགས་ཆེར་གནང་བར་ཐུགས་རྗེ་ཆེ་ཞུས་ཡོད།

དེ་རྗེས་དཔལ་ལྡན་སྲིད་སྐྱོང་མཆོག་གིས་ཨ་རིའི་ཕྱི་སྲིད་ལྷན་ཁང་གི་མང་གཙོ་དང་། འགྲོ་བ་མིའི་ཐོབ་ཐང་། ངལ་རྩོལ་གོང་འཕེལ་ལས་དོན་ཚན་པའི་དྲུང་ཆེ་ལས་རོགས་གཞོན་པ་གཙོ་བོ་སྐུ་ཞབས་སི་ཁི་ཊི་ Scott Busby མཆོག་དང་ཐུག་འཕྲད་ཀྱིས་ད་ལྟའི་བོད་ནང་གི་མི་ཛ་དྲག་གནས་སྟངས་དང་། བོད་དང་རྒྱ་ནག་གཉིས་ཀྱི་ས་བབ་ཆགས་ཚུལ་སོགས་ཀྱི་སྐོར་ལ་གླེང་སློང་གནང་ཡོད་པ་མ་ཟད། གོང་ཚེས་ཉིན་གྱི་སྔ་དྲོར་དཔལ་ལྡན་སྲིད་སྐྱོང་མཆོག་གིས་ཨེ་ཤེ་ཡ་རང་དབང་རླུང་འཕྲིན་ཁང་གི་བཅར་འདྲི་དང་ལེན་གནང་ཡོད།

གཞན་ཡང་དཔལ་ལྡན་སྲིད་སྐྱོང་མཆོག་ལ་ཨ་རིའི་ཝིར་ཇི་ནི་ཡ་མངའ་སྡེའི་ Virginia ནང་དུ་ཡོད་པའི་ཝིར་ཇི་ནི་ཡ་ཁྲིམས་ཀྱི་མཐོ་སློབ་ཁང་ནས་མགྲོན་འབོད་ཞུས་པ་ལྟར་ཕྱི་ཚེས་ ༢༡ ཉིན་ཝིར་ཇི་ནི་ཡ་ཁྲིམས་ཀྱི་མཐོ་སློབ་ཁང་དུ་གསུང་བཤད་གནང་རྒྱུ་ཡིན་འདུག་པ་བཅས། །