ཕྱི་ལོ་ ༢༠༢༠ ཟླ་ ༢ ཚེས་ ༡༨ རེས་གཟའ་ཕུར་བུ། 

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨོ་སི་ཊི་རི་ཡའི་ཊེ་རོལ་ Tyrol མངའ་སྡེའི་རྒྱལ་ས་ཨིན་སི་བྷི་རག་ Innsbruck ནང་རྟེན་གཞི་བྱས་པའི་ཨིན་སི་བྷི་རག་མཐོ་སློབ་ཁང་ University of Innsbruck’s Winter School གི་དགུན་ཁའི་སློབ་དུས་དབུ་འབྱེད་མཛད་སྒོའི་ཐོག་གཙོ་བོ་བོད་མིའི་སྒྲིག་འཛུགས་ཀྱི་དབུ་མའི་ལམ་གྱི་སྲིད་བྱུས་དང་བོད་རིགས་ཡོངས་ལ་མིང་དོན་མཚུངས་པའི་རང་སྐྱོང་ཡོང་ཐབས་སྐོར་གསུང་བཤད་གནང་ཡོད།

དེ་ཡང་དཔལ་ལྡན་སྲིད་སྐྱོང་མཆོག་གིས། རྒྱ་ནག་གཞུང་གིས་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་དང་མི་རིགས་ས་གནས་རང་སྐྱོང་གི་བཅའ་ཁྲིམས་སུ་གསལ་བའི་རང་སྐྱོང་གི་ཆ་རྐྱེན་དང་། དེ་བཞིན་རྒྱ་ཡིག་དང་བོད་ཡིག་གཉིས་ཀ་བཀོལ་སྤྱོད་ཆོག་པའི་སྲིད་བྱུས་རྣམས་ཇི་བཞིན་ལག་བསྟར་བྱེད་ཀྱི་མེད་པ་མ་ཟད། རྒྱ་ནག་གཞུང་གིས་བོད་ཀྱི་སྐད་ཡིག་ཐོབ་ཐང་རྩོད་ལེན་པ་བཀྲ་ཤིས་དབང་ཕྱུག་ལགས་མི་དཀར་ལ་ཞྭ་ནག་གཡོག་སྟེ་རྒྱལ་ཁབ་ཁ་བྲལ་གྱི་བསྙོན་དཀྲི་བཙན་འགེལ་གྱིས་བཙོན་འཇུག་ཁྲིམས་ཐག་བཅད་ཡོད། མི་རིགས་ཤིག་གི་སྐད་ཡིག་གཏོར་བཤིག་བཏང་བ་ནི་མི་རིགས་ཤིག་གི་ངོ་བོ་གཏོར་བཤིག་བཏང་བ་རེད། ཅེས་དང་།

གཞན་ཡང་དཔལ་ལྡན་སྲིད་སྐྱོང་མཆོག་གིས་བོད་མིའི་སྒྲིག་འཛུགས་ཀྱི་ངོས་ནས་བོད་ཀྱི་སྐད་ཡིག་མི་ཉམས་གོང་འཕེལ་གཏོང་ཆེད་ཤེས་ཡོན་སྲིད་བྱུས་ལག་བསྟར་གནང་བ་དང་། བོད་མིའི་སྒྲིག་འཛུགས་ཀྱིས་ལས་དོན་རྣམས་ཕྱི་གསལ་ནང་གསལ་དུ་ལག་བསྟར་གནང་བཞིན་པ། བོད་མིའི་སྒྲིག་འཛུགས་ཀྱི་མཐར་ཐུག་དམིགས་ཡུལ་གཙོ་བོ་ནི་བོད་མིའི་ཆོས་དང་རིག་གཞུང་། སྐད་ཡིག ངོ་བོ་བཅས་སྲུང་སྐྱོབ་དང་བོད་ནང་རང་དབང་སླར་གསོ་བྱ་རྒྱུ་དེ་ཡིན། རྒྱ་ནག་སྟོབས་ཆེན་རྒྱལ་ཁབ་ཡིན་ཡང་རྒྱ་ནག་གཞུང་གིས་མུ་མཐུད་རྒྱལ་སྤྱིའི་དངུལ་ཁང་ནས་བུ་ལོན་གཡར་ནས་འཛམ་གླིང་མཉམ་འབྲེལ་རྒྱལ་ཚོགས་ལ་ཞལ་འདེབས་སུ་སྤྲད་དེ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་སྒྲིག་འཛུགས་མ་ལག་དང་། འགྲོ་བ་མིའི་ཐོབ་ཐང་གི་འགྲེལ་བཤད་ཀྱི་ཁ་ཕྱོགས་ལམ་ལོག་ཏུ་སྒྱུར་ཐབས་བྱེད་བཞིན་ཡོད། ཅེས་དང་།

ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཨིན་སི་བྷི་རག་མཐོ་སློབ་ཁང་གི་སློབ་སྤྱི་སྐུ་ཞབས་མུལ་ཊི་ཊིལ་མན་ prof.Dr.H.C.Mult Tilmann Mark ལགས་ཀྱིས་གཙོས་སློབ་དཔོན་ཁག་གཅིག་དང་ཐུག་འཕྲད་གནང་ཡོད་པ་བཅས། །