ཕྱི་ལོ་ ༢༠༢༠ ཟླ་ ༢ ཚེས་ ༡༣ རེས་གཟའ་ཕུར་བུ།
༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཨ་རིའི་རྒྱལ་ས་ཝ་ཤིན་ཊོན་དུ་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་སྐུ་ནེན་སི་པི་ལོ་སི་ Nancy Pelosi མཆོག་གི་ལས་ཁུངས་སུ་ལྕམ་སྐུ་མཆོག་དང་ཐུག་འཕྲད་གནང་ཡོད་པ་དང་། སྐབས་དེར་དཔལ་ལྡན་སྲིད་སྐྱོང་མཆོག་གིས་ལྕམ་སྐུ་མཆོག་ནི་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་བོད་དོན་ལ་ལོ་མང་རིང་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན་པ་དང་། ལྷག་པར་ལྕམ་སྐུ་མཆོག་གིས་ཨ་རིའི་གྲོས་ཚོགས་འོག་མའི་ནང་༢༠༡༩ ལོར་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པར་ Tibetan Policy and support Act 2019 རྒྱབ་སྐྱོར་ཤུགས་ཆེ་གནང་བར་ཐུགས་རྗེ་ཆེ་ཞུས་ཡོད།
སྐབས་དེར་བྱང་ཨ་རིའི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས་ལྕམ་སྐུ་ནེན་སི་པི་ལོ་སི་མཆོག་ལ་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་འཁྲུངས་སྐར་དུས་ཆེན་མཛད་སྒོ་ཁེ་པི་ཊོལ་ཧིལ་ Capitol Hill དུ་སྲུང་བརྩི་ཞུ་རྒྱུ་ཡིན་སྟབས། མགོན་པོ་གང་ཉིད་མཆོག་གི་སྐུའི་འཁྲུངས་སྐར་དུས་ཆེན་གྱི་མཛད་སྒོར་ངེས་ཕེབས་ཡོང་བའི་མགྲོན་འབོད་ཞུས་པ་ལྟར་ལྕམ་སྐུ་མཆོག་གིས་ཞལ་བཞེས་གནང་ཡོད། ཕྱོགས་མཚུངས་དཔལ་ལྡན་སྲིད་སྐྱོང་མཆོག་གིས་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་མང་མོས་ནང་ཁྲིམས་པའི་སྐུ་ཚབ་ Majority Whip སྐུ་ཞབས་ཇིམ་ Jim Clyburn མཆོག་གིས་བོད་དོན་རྒྱབ་སྐྱོར་གྱི་བསྐྱར་ཞིབ་ཁྲིམས་འཆར་གསར་པ་བཏོན་པར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་ཡོད། དེ་བཞིན་ཨ་རིའི་གྲོས་ཚོགས་གོང་མའི་གྲོས་ཚོགས་འཐུས་མི་སྐུ་ཞབས་བྷོབ་ཁེ་སེ་ Bob Casey མཆོག་གིས་བོད་དོན་རྒྱབ་སྐྱོར་སྲིད་བྱུས་ཀྱི་ཁྲིམས་འཆར་ལ་རྒྱབ་སྐྱོར་གནང་རྒྱུའི་ཞལ་བཞེས་གནང་ཡོད་པ་མ་ཟད།
རྒྱ་ནག་གཞུང་གིས་འགྲོ་བ་མིའི་ཐོབ་ཐང་ལ་རྩིས་མེད་རྡོག་རོལ་དང་དྲང་བདེན་མ་ཡིན་པའི་ཚོང་ལས་སྲིད་བྱུས་ལག་བསྟར་བྱས་དང་བྱེད་བཞིན་པར་སྐྱོན་བརྗོད་གནང་ཡོད། དཔལ་ལྡན་སྲིད་སྐྱོང་མཆོག་གིས་གྲོས་ཚོགས་འཐུས་མི་མཆོག་ལ་རྒྱ་ནག་གཞུང་གིས་ཐབས་ལམ་འདྲ་མིན་བརྒྱུད་བོད་ནང་དྲག་གནོན་བྱས་དང་བྱེད་བཞིན་པ་སོགས་ཀྱི་སྐོར་འགྲེལ་བརྗོད་གནང་སྐབས། སྐུ་ཞབས་བྷོབ་ཁེ་སེ་མཆོག་གིས་རྒྱ་ནག་གཞུང་གིས་བོད་ནང་དེ་ལྟ་བུའི་མི་རིགས་དབྱེ་འབྱེད་དང་དྲག་གནོན་ཅན་གྱི་སྲིད་བྱུས་ལག་བསྟར་བྱེད་བཞིན་པ་ནི་བསམ་ཡུལ་ལས་འདས་པ་ཞིག་རེད། ཅེས་གསུངས། གཞན་ཡང་དཔལ་ལྡན་སྲིད་སྐྱོང་མཆོག་གིས་ལྷོ་དབུས་ཨེ་ཤི་ཡའི་དྲུང་ཆེ་ལས་རོགས་ཀྱི་ལས་ཚབ་ཨ་ལི་སི་ཝེ་ལི་སི་ Alice Wells མཆོག་དང་ཐུག་འཕྲད་ཀྱིས་རྒྱ་ནག་གི་གནོན་ཤུགས་བལ་ཡུལ་ནང་སླེབས་པའི་རྐྱེན་གྱིས་བལ་ཡུལ་ནང་གི་བཙན་བྱོལ་བོད་མི་ཚོར་དཀའ་ངལ་འཕྲད་བཞིན་པའི་སྐོར་གསུངས་ཡོད་པ་བཅས།།
