དཔལ་ལྡན་སྲིད་སྐྱོང་མཆོག་ལྡེ་ར་ལྡུན་དུ་ཕེབས་འབྱོར་བྱུང་བ།

གསར་ལས་ཁང་གི་གསར་འགོད་པས།

༢༠༢༠-༠༢-༠༦

ཕྱི་ལོ་ ༢༠༢༠ ཟླ་ ༢ ཚེས་ ༦ རེས་གཟའ་ཕུར་བུ།

༄༅། །བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཕྱི་ལོ་ ༢༠༢༠ ཟླ་ ༢ ཚེས་ ༦ རེས་གཟའ་ཕུར་བུའི་ཉིན་གྱི་ཕྱི་དྲོ་ཆུ་ཚོད་ ༦ ཙམ་ལ་རྒྱ་གར་བྱང་ཕྱོགས་ལྡེ་ར་ལྡུན་གནམ་ཐང་དུ་ཕེབས་འབྱོར་སྐབས་བདེ་སྐྱིད་གླིང་བོད་མིའི་གཞིས་ཆགས་ཀྱི་ས་གནས་འགོ་འཛིན་ནོར་བུ་ལགས་དང་ས་འཐུས་རྣམ་པ། ཧར་པ་སྤུར་འདོད་རྒུ་གཡུ་རྒྱལ་གླིང་གཞིས་ཆགས་ཀྱི་ས་གནས་འགོ་འཛིན་ཚུལ་ཁྲིམས་རྡོ་རྗེ་ལགས། དེ་བཞིན་མ་སུ་རི་བོད་ཁྱིམ་སྤྱི་ཁྱབ་འགན་འཛིན་ཀརྨ་ཆུང་བདག་ལགས་ཀྱིས་གཙོས་དྲུང་ཆེ་ལས་རོགས་བཅས་ནས་ཕེབས་བསུའི་སྣེ་ལེན་ཞུས་ཡོད།

དེ་ཡང་དཔལ་ལྡན་སྲིད་སྐྱོང་མཆོག་སང་ཕྱི་ཚེས་ ༧ རེས་གཟའ་པ་སངས་ཉིན་ཧར་པ་སྤུར་གཏན་ཉིན་སློབ་གྲྭ་དབུ་བརྙེས་ཏེ་ལོ་ངོ་ ༥༠ ཧྲིལ་པོ་འཁོར་བའི་དུས་སྟོན་མཛད་སྒོའི་ཐོག་སྐུ་མགྲོན་གཙོ་བོར་མགྲོན་འབོད་ལྟར་ཆེད་ཕེབས་གནང་རྒྱུ་ཡིན།

སྤྱིར་ཧར་པ་སྤུར་སློབ་གྲྭ་ནི་ཕྱི་ལོ་ ༡༩༧༠ ཟླ་ ༧ ཚེས་ ༡ ཉིན་ཅག་ར་ཏ་ chakrata དང་སློབ་དམག་སྒར་སློབ་གྲྭ་ SFF Children School ཞེས་པའི་མཚན་བྱང་འོག་ཐོག་མར་འགོ་བཙུགས་གནང་ཡོད། ཕྱིས་སུ་ཕྱི་ལོ་ ༡༩༨༠ ཟླ་ ༧ ཚེས་ ༡ ཉིན་ཧར་པ་སྤུར་ས་གནས་སུ་གནས་སྤོས་ཀྱིས་ཧར་པར་སྤུར་གཏན་ཉིན་སློབ་གྲྭ་ཞེས་འབོད་ཀྱི་ཡོད། སྐབས་དེར་སློབ་ཕྲུག་ཁྱོན་ ༣༠༠་་་་་༤༠༠ ཙམ་ཡོད་འདུག་ཀྱང་ད་ཆ་སློབ་ཕྲུག་ཁྱོན་བསྡོམས་ ༤༧༠ ཡོད་འདུག ཐེངས་འདིའི་དུས་སྟོན་མཛད་སྒོའི་ཐོག་མཐུན་འགྱུར་གནང་མཁན་ཧར་པ་སྤུར་གཏན་ཉིན་སློབ་གྲྭའི་སློབ་ཟུར་དང་དམག་སྒར་བཅས་ཡིན་འདུག་པ་བཅས། །