ཕྱི་ལོ་ ༢༠༢༠ ཟླ་ ༢ ཚེས་ ༢༧ རེས་གཟའ་ཕུར་བུ།
༄༅། །འདི་གར་ཐེ་ཝན་བོད་ཀྱི་སྐུ་ཚབ་དོན་ཁང་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༢ ཚེས་ ༢༥ སྟེ་བོད་ཀྱི་ལོ་གསར་ཚེས་གཉིས་ཉིན་ཐེ་ཝན་དོན་གཅོད་ཟླ་བ་ཚེ་རིང་ལགས་དང་། དྲུང་ཆེ་བསོད་ནམས་རྡོ་རྗེ་ལགས་རྣམ་གཉིས་ཐེ་ཝན་གྲོས་ཚོགས་འཐུས་མི་སྐུ་ཞབས་ཕེརེ་ཌི་ལིན་ལགས་ཀྱི་ཡིག་ཚང་གསར་པའི་ནང་བཅར་ཏེ་མཇལ་འཕྲད་དང་ཁོང་ཉིད་བསྐྱར་དུ་འདེམས་ཐོན་བྱུང་བར་འཚམས་འདྲིའི་བཀྲ་ཤིས་བདེ་ལེགས་ཞུས་པ་དང་། དོན་གཅོད་ཟླ་བ་ཚེ་རིང་ལགས་ཀྱིས་གསུངས་དོན་དེ་རིང་མཇལ་འཕྲད་ཞུ་དོན་གཙོ་བོ་དོན་ཚན་ཆེ་བ་གཉིས་ཡོད། དོན་ཚན་གཅིག་ནི་ཐེ་ཝན་གྱི་འོས་བསྡུ་ཆེན་མོ་གྲུབ་ནས་སྐབས་བཅུ་པའི་གྲོས་ཚོགས་ཆགས་ཡོད་ཅིང་། དེའི་ནང་འཐུས་མི་ཁག་གཅིག་རྙིང་པ་དང་ཁག་གཅིག་གསར་པ་སླེབས་ཡོད་པས། སྐབས་དགུ་པའི་གྲོས་ཚོགས་སྐབས་སྐུ་ཉིད་ཀྱིས་གཙོ་འགན་བཞེས་ཏེ་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་བཙུགས་ཐུབ་པ་བྱུང་ཡོད་པས། ད་ཆ་སྔར་བཞིན་སྐབས་བཅུ་པའི་གྲོས་ཚོགས་ནང་སྲིད་དོན་ཚོགས་པ་འདྲ་མིན་ལས་གྲུབ་པའི་ཐེ་ཝན་གྲོས་ཚོགས་བོད་དོན་རྒྱབ་སྐྱོར་ཚོགས་པ་འཛུགས་གནང་ཡོང་བ་དང་།
དོན་ཚན་གཞན་ཞིག་ནི་འཛམ་གླིང་ཡུལ་གྲུ་ཁག་གི་གྲོས་ཚོགས་ནང་བོད་དོན་སྐོར་གྱི་གྲོས་ཆོད་བཞག་གི་ཡོད། དཔེར་ན་༧གོང་ས་མཆོག་གི་ཡང་སྲིད་དགོས་མིན་བོད་མི་རང་ནས་ཐག་གཅོད་བྱེད་དབང་ཡོད་པ་ལས་རྒྱ་ནག་དམར་པོའི་སྲིད་གཞུང་ལ་ཐེ་བྱུས་བྱེད་པའི་དབང་ཚད་མེད་པ་སོགས་ཀྱི་གྲོས་ཆོད་རིམ་པ་བཞག་ཡོད་པས། ཐེ་ཝན་གྲོས་ཚོགས་ནང་དེ་ལྟར་གྲོས་ཆོད་འཇོག་ཐབས་ལ་འབད་བརྩོན་གནང་རོགས་ཞུས་པས། གྲོས་ཚོགས་འཐུས་མི་སྐུ་ཞབས་ཕེརེ་ཌི་ལིན་ལགས་ཀྱིས་ཉིན་ཤས་ནང་ཐེ་ཝན་གྲོས་ཚོགས་ཀྱི་འཐུས་མི་ཡོངས་ལ་ཡི་གེ་བཏང་ནས་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ནང་མཉམ་ཞུགས་ཡོང་བ་ཞུས་ནས་གང་མགྱོགས་ཚོགས་པ་འཛུགས་ཐུབ་པ་ཞུ་གི་ཡིན། གྲོས་ཚོགས་བོད་དོན་རྒྱབ་སྐྱོར་ཚོགས་ཆུང་བཙུག་རྗེས་རིམ་པས་གྲོས་ཚོགས་ནང་བོད་དོན་གྱི་གྲོས་ཆོད་དང་། ཐེ་ཝན་གྲོས་ཚོགས་ཀྱི་མིང་ཐོག་རྒྱལ་སྤྱིའི་ཐོག་བོད་དོན་རྒྱབ་སྐྱོར་གྱི་ཚོགས་འདུ་དང་། ལས་འགུལ་ཁག་ནང་མཉམ་ཞུགས་ཐུབ་པ་བྱེད་ཀྱི་ཡིན་སོགས་གསུངས།
མཇལ་འཕྲད་གྲུབ་རྗེས་ཧོང་ཀོང་གྲོང་ཁྱེར་སློབ་ཆེན་དགེ་ཆེ་ཟུར་པ་སྐུ་ཞབས་ལིའུ་ཧན་ཁྲིང་ལགས་ཀྱིས་ལོ་བཅུ་ཙམ་རིང་ཉམས་ཞིབ་ཀྱིས་རྩོམ་བྲིས་གནང་བ་༼རྒྱ་ནག་གི་གཞུང་འབྲེལ་ཡིག་ཆ་ལས་བོད་ནི་རྒྱ་ནག་གི་ཆ་ཤས་ཤིག་མིན་པའི་ར་སྤྲོད་༽ཅེས་པའི་དཔེ་དེབ་ཕྱག་རྟགས་སུ་ཕུལ་ཡོད་ོཔ་བཅས། །
