༢༠༢༠ ཟླ་ ༡ ཚེས་ ༢༧ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༡ ཚེས་ ༢༦ ཉིན་རྒྱ་གར་ནང་མང་གཙོའི་རྩ་ཁྲིམས་གཏན་འབེབས་ལག་བསྟར་གནང་བ་བརྒྱུད། མང་གཙོའི་རྒྱལ་ཁབ་ཞིག་ཏུ་དབུ་བརྙེས་ནས་མི་ལོ་ ༧༡ ཧྲིལ་པོ་འཁོར་བའི་དུས་ཆེན་ཁྱད་པར་ཅན་སྲུང་བརྩི་ཞུ་རྒྱུའི་ཉིན་དེར་སྲིད་སྐྱོང་བློ་བཟང་སེངྒེ་མཆོག་གིས་རྒྱ་གར་གཞུང་མང་གཉིས་ལ་འཚམ་འདྲི་གནང་དོན། རྒྱ་གར་ནི་འཛམ་གླིང་ནང་མང་གཙོ་ཡར་ཐོན་ཅན་གྱི་རྒྱལ་ཁབ་ཞིག་ཡིན་པ་དང་། འཛམ་གླིང་གཞན་གྱིས་རྒྱ་གར་གྱི་མང་གཙོའི་ལམ་སྲོལ་ལ་མིག་དཔེ་ལྟ་དགོས། དེ་རིང་ནི་རྒྱ་གར་ནང་མང་གཙོའི་རྩ་ཁྲིམས་གཏན་འབེབ་ལག་བསྟར་གནང་ནས་བགྲང་བྱ་ ༧༡ ཧྲིལ་པོ་འཁོར་བའི་ཉིན་མོ་ཞིག་ཡིན། དེར་བརྟེན་རྒྱ་གར་གྱིས་དགའ་སྤྲོའི་ངང་སྲུང་བརྩི་ཞུ་བཞིན་པའི་བསྐལ་བཟང་གྱི་ཉིན་མོ་འདིར་ངས་འཛམ་གླིང་ས་ཕྱོགས་གང་སར་གནས་འཁོད་བོད་མི་ཡོང་ས་ཀྱི་ཚབ་ཞུས་ནས་རྒྱ་གར་གཞུང་མང་གཉིས་ལ་འཚམ་འདྲི་བཀྲ་ཤིས་བདེ་ལེགས་ཞུ་རྒྱུ་ཡིན།
རྒྱ་གར་ནང་མང་གཙོའི་ལམ་ནས་འོས་འདེམས་བྱེད་སྐབས་འོས་འཕེན་རྒྱུར་འོས་ཆོས་ཚང་མཁན་མི་འབོར་ས་ཡ་ ༦༠༠ ཡོད། གྲངས་འབོར་དེ་ནི་ཨ་རི་དང་ཡུ་རོབ། ཨུ་རུ་སུ་བཅས་ཚང་མ་བསྡོམས་པའི་འོས་གྲངས་ལས་ཀྱང་མང་བ་ཆགས་ཡོད། དེར་བརྟེན་མང་གཙོའི་རིང་ལུགས་ནི་རྒྱ་གར་ནང་གནའ་རབས་ནས་དར་སྲོལ་ཡོད་པའི་གཏིང་ཚུགས་པའི་ལམ་ལུགས་བཟང་པོ་ཞིག་ཡིན་ཞིང་། རིང་ལུགས་དེའི་འོག་ནས་རྒྱ་གར་ནང་གནའ་སྔ་མོ་ནས་ཆོས་དང་མི་རིགས། སྐད་ཡིག་སོགས་སྣ་མང་སྤྱི་ཚོགས་འཆམ་མཐུན་ངང་མཉམ་གནས་བྱ་རྒྱུའི་གོམས་གཤིས་བཟང་པོ་ཞིག་ད་བར་རྒྱུན་འཛིན་ཐུབ་པ་བྱུང་ཡོད། རྒྱ་གར་གྱི་གནའ་རབས་གོམས་གཤིས་བཟང་པོ་དེར་ང་ཚོ་བོད་མི་ཚོས་ཁ་མིག་ཡར་ལྟ་བྱེད་དགོས། བོད་མིར་མཚོན་ན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་གསོལ་སྩལ་མཛད་པའི་ཡང་དག་པའི་མང་གཙོའི་ལམ་བཟང་ཐོག་ཤར་བསྐྱོད་ཐོག་ཆོལ་གསུམ་གོང་བུ་གཅིག་གྱུར་བྱ་རྒྱུའི་ཆོད་སེམས་རྒྱུན་བཅངས་དགོས་གལ་ཤིན་ཏུ་ཆེ། མཐའ་དོན་ངས་སླར་ཡང་རྒྱ་གར་གཞུང་མང་གཉིས་ནས་ད་བར་བོད་མི་བཙན་བྱོལ་བ་ཚོར་མཐུན་འགྱུར་རོགས་རམ་རྒྱ་ཆེ་གནང་དང་གནང་མུས་ལ་སྙིང་ཁུང་རུས་པའི་གཏིང་ནས་བཀའ་དྲིན་རྗེས་དྲེན་ཞུ་རྒྱུ་དང་། རྒྱ་གར་རྒྱལ་ཁབ་ཆེན་པོ་འདི་ཉིད་གོང་ནས་གོང་དུ་འཕེལ་བར་བཀྲ་ཤིས་སྨོན་འདུན་ཞུ་རྒྱུ་ཡིན། ཐུགས་རྗེ་ཆེ། ཞེས་གཞུངས།
དེ་ཉིན་རྡ་སའི་ཉེན་རྟོག་ཐང་ཆེན་དུ་མང་གཙོའི་དུས་ཆེན་ཐེངས་ ༧༡ མཛད་སྒོར་མགྲོན་འབོད་ལྟར་དཔལ་འབྱོར་བཀའ་བློན་ཀརྨ་ཡེ་ཤེས་མཆོག་དང་། རྡ་ས་ས་གནས་འགོ་འཛིན་ཀུན་དགའ་ཚེ་རིང་ལགས། ཟུང་དྲུང་རྣམ་རྒྱལ་ལེགས་བཤད་ལགས་ཕེབས་ཡོད་པ་བཅས།།
པར་པ་བསྟན་འཛིན་ཕན་བདེ་ལགས།
