ཕྱི་ལོ་ ༢༠༢༠ ཟླ་ ༡ ཚེས་ ༨ རེས་གཟའ་ལྷག་པ། 

༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༠ ཟླ་ ༡ ཚེས་ ༨ རེས་གཟའ་ལྷག་པ་ཉིན་གྱི་ཕྱེད་ཡོལ་ཆུ་ཚོད་ ༡།༣༠ ཙམ་ལ་བྷི་ཧཱར་མངའ་སྡེའི་སྤྱི་ཁྱབ་བློན་ཆེན་ནི་ཏི་ཤི་ཀུ་མཱར་ Nitish Kumar མཆོག་གིས་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུས་འདུག

སྐབས་དེར་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། དུས་རབས་བརྒྱ་ཕྲག་འགའ་ཤས་རིང་རྒྱ་གར་གྱི་དཔལ་ནཱ་ལེནྡྲ་རིག་གཞུང་ལྟེ་གནས་དེ་སློབ་གཉེར་ཁང་རྩེ་ཕུད་བྱས་ནས་བསྡད་ཡོད། གཙུག་ལག་ཁང་དེ་ནས་མཁས་གྲུབ་གཉིས་ལྡན་གྱི་སྐྱེས་བུ་དམ་པ་བསམ་གྱིས་མི་ཁྱབ་པ་དུ་མ་བྱུང་ཡོད། ཁོང་རྣམས་ནི་ཆོས་ཙམ་མིན་པར་སྤྱིར་སྟངས་ཤེས་ཡོན་གྱི་ཆ་ནས་ཀྱང་ཧ་ཅང་མཁས་པ་ཆེན་པོ་རེད། ཐེངས་འདིར་གནས་མཆོག་རྡོ་རྗེ་གདན་དུ་བཀའ་ཆོས་བྱས་པ་རེད། བཀའ་ཆོས་རིང་དེར་མངའ་སྡེའི་གཞུང་མང་གཉིས་ནས་མཐུན་འགྱུར་རོགས་རམ་ཧ་ཅང་གནང་བྱུང་། ཐུགས་རྗེ་ཆེ།  སླར་ཡང་མཇལ་ཡོང་། ཞེས་བཀའ་སློབ་སྩལ།  ཐེངས་འདིར་དབུ་ཁྲིད་རྣམ་གཉིས་མཇལ་འཕྲད་སྐབས་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་ཀྱང་ལྷན་བཅར་ཞུས་འདུག

དེ་ཡང་གོང་ཚེས་ཉིན་གྱི་སྔ་དྲོ་ཏཱ་ལའི་བླ་མའི་དགེ་རྩ་ཚོགས་པའི་ངོས་ནས་གནས་མཆོག་རྡོ་རྗེ་གདན་གྱི་དུས་འཁོར་གསུང་ཆོས་ར་བའི་ནང་རྡོར་གདན་ཁུལ་དུ་ཡོད་པའི་དབུལ་ཕོངས་དབང་པོ་སྐྱོན་ཅན་ཚོར་ཧིན་སྒོར་ ༢༠༠ རེ་དང་གཞན་ཚོར་ཧིན་སྒོར་ ༡༠༠ གསོལ་རས་གནང་འདུག  ཕྱོགས་མཚུངས་ཉམ་ཐག་དེ་དག་ལ་ཉིན་གུང་གི་ཞལ་ལག་ཀྱང་གོ་སྒྲིག་གནང་ཡོད་པ་བཅས། །