ཕྱི་ལོ་ ༢༠༢༠ ཟླ་ ༡ ཚེས་ ༢༤ རེས་གཟའ་པ་སངས། 

༄༅། །འདི་གར་སིམ་ལ་སྤྱི་ཁྱབ་ལས་ཁུངས་ནས་བཏང་གནས་ནང་འཁོད་དོན།  ཕྱི་ལོ་ ༢༠༢༠ ཟླ་ ༡ ཚེས་ ༡༨ ཉིན་ཧི་མཱ་ཅལ་མངའ་སྡེའི་གྲོས་ཚོགས་ཀྱི་ཚོགས་གཙོ་ཌོག་ཊར་རཱ་ཇིབ་སྦིན་དལ་ Dr. Rajeev Bindal མཆོག་ལ་ཧི་མཱ་ཅལ་མངའ་སྡེའི་བྷི་ཇེ་པི་ཆབ་སྲིད་ཚོགས་པའི་ཚོགས་གཙོར་སྤྱི་མོས་བསྐོ་གཞག་བྱུང་བར་ཕྱི་ཚེས་ ༢༤ ཉིན་སིམ་སྤྱི་བསྟན་འཛིན་ནོར་བུ་ལགས་ཀྱིས་སྣེ་ཁྲིད་འོག སིམ་ལ་ས་གནས་འཐུས་ཚོགས་ཀྱི་རྒྱུན་ལས་དང་། རྡོ་བྲག་དགོན་པའི་སྐུ་ཚབ། དེ་བཞིན་སྤྱི་ཁྱབ་ལས་ཁུངས་ཀྱི་ལས་བྱེད་བཅས་ཀྱིས་འབྲེལ་ཡོད་ཧི་མཱ་ཅལ་མངའ་སྡེའི་བྷི་ཇེ་པི་ཆབ་སྲིད་ཚོགས་པའི་སྤྱི་ཁྱབ་ཡིག་ཚང་དུ་བཅར་ནས་ཚོགས་གཙོ་གསར་པར་འཚམས་འདྲི་ཞུས་པ་མ་ཟད།  བྷི་ཇེ་པི་ཆབ་སྲིད་ཚོགས་པའི་ཚོགས་གཞོན་དུ་བསྐོ་གཞག་གནང་བ་སྐུ་ཞབས་གྷ་ནེ་ཤ་དཏྟ་ Shri Ganesh Dutt མཆོག་ལའང་མཇལ་འཕྲད་ཀྱིས་འཚམས་འདྲི་ཞུས་འདུག 

མཇལ་འཕྲད་སྐབས་བོད་མིའི་སྐུ་ཚབ་རྣམ་པས་དཔལ་ལྡན་བོད་མི་མང་སྤྱི་འཐུས་ཚོགས་གཙོ་མཆོག་གི་འཚམས་འདྲིའི་གནས་ཡིག་དང་། མཇལ་དར། དེ་བཞིན་ཕྱག་རྟགས་བཅས་ཕུལ་བ་མ་ཟད། བྷི་ཇེ་པི་ཆབ་སྲིད་ཚོགས་པས་སྣེ་ཁྲིད་པའི་དབུས་དང་མངའ་སྡེའི་གཞུང་གིས་བོད་མིའི་བདེ་སྡུག་ལ་ད་བར་ཐུགས་ཁུར་ཆེ་བཞེས་ཀྱིས་མཐུན་འགྱུར་རོགས་རམ་གང་ལེགས་གནང་བར་ཐུགས་རྗེ་ཆེ་ཞུས་པ་དང་། སླད་ཀྱང་བོད་མིའི་བདེ་དོན་ཆེད་ཐུགས་ཁུར་ཆེ་བཞེས་གནང་དགོས་པའི་རེ་སྐུལ་ཤུགས་ཆེ་ཞུས་པར་དེ་ལྟར་གནང་རྒྱུའི་ཞལ་བཞེས་ཀྱང་གནང་འདུག  སིམ་སྤྱི་ནས་སྐབས་དེར་དབུ་ཁྲིད་རྣམ་གཉིས་ལ་མ་འོངས་པར་ལས་ཡུན་རིང་ལས་དོན་གང་ཅིར་བྱ་བ་ལམ་ལྷོངས་ཡོང་བའི་སྨོན་འདུན་ཡང་ཞུས་པར་དབུ་ཁྲིད་རྣམ་གཉིས་ཐུགས་ཚོར་ཆེན་པོ་བྱུང་འདུག་པ་བཅས། །