ཕྱི་ལོ་ ༢༠༢༠ ཟླ་ ༡ ཚེས་ ༢༩ རེས་གཟའ་ལྷག་པ།
༄༅། །ཕྱི་ལོ་ ༢༠༢༠ ཟླ་ ༡ ཚེས་ ༢༦ ཉིན་བོད་མིའི་སྒྲིག་འཛུགས་ཀྱི་ཤེས་རིག་བཀའ་བློན་མཆོག་ཀོ་ལེ་གྷལ་དོན་ལྡན་གླིང་གཞིས་ཆགས་སུ་ཕེབས་འབྱོར་སྐབས་ས་གནས་འགོ་འཛིན་ལས་ཁུངས་དང་། གཞུང་དང་གཞུང་འབྲེལ་མ་ཡིན་པའི་ཚོགས་པ། དགོན་པའི་སྐུ་ཚབ་བཅས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད། དེ་ཡང་ཕྱི་ཚེས་ ༢༧ ཉིན་བཀའ་བློན་མཆོག་ས་གནས་སམ་བྷོ་ཊ་སློབ་གྲྭར་ཆེད་ཕེབས་ཀྱིས་ཤེས་ཡོན་དང་འཕྲོད་བསྟེན་གྱི་གལ་གནད་སྐོར་གསུང་བཤད་གནང་རྗེས་སློབ་གྲྭའི་འཛིན་གྲྭའི་ནང་རྟོག་ཞིབ་གནང་སྟེ་སློབ་ཕྲུག་ཚོ་དང་མཉམ་བཀའ་མོལ་ལྷུག་པོར་གནང་།
དགོང་དྲོ་བཀའ་བློན་མཆོག་གིས་སློབ་གྲྭའི་དགེ་རྒན་དང་ལས་བྱེད་རྣམས་ལ་དགེ་རྒན་གྱི་ཆེད་ལས་ཡར་རྒྱས་དང་སློབ་ཁྲིད་ཀྱི་ཐབས་ལམ། དེ་བཞིན་ཡ་རབས་བཟང་སྤྱོད་སོགས་ཀྱི་གལ་གནད་སྐོར་གསུང་བཤད་གནང་བ་མ་ཟད། དགེ་རྒན་ཚོས་སློབ་ཕྲུག་རྣམས་རུ་ཁག་བཟོས་ཏེ་སློབ་སྦྱོང་སྤྲོད་དགོས་པའི་གལ་གནད་སྐོར་དང་། དེ་བཞིན་དགེ་རྒན་རྣམ་པ་ཚོས་དགེ་རྒན་ཆེད་ལས་ཡར་རྒྱས་ཀྱི་ལས་འགུལ་གང་མང་སྤེལ་དགོས་པ་སོགས་ཀྱི་སྐོར་གསུང་། ཕྱི་ཚེས་ ༢༨ ཉིན་བཀའ་བློན་མཆོག་གིས་ཀོ་ལེ་གྷལ་དོན་ལྡན་གླིང་གཞིས་ཆགས་ཀྱི་བོད་མི་གྲངས་ ༡༥༠ ལྷག་ལ་མི་རབས་རྒན་པ་ཚོས་སོ་སོའི་ཕྲུ་གུའི་ཤེས་ཡོན་གྱི་ཆེད་དུ་སྐུ་ལས་ཧ་ཅང་བསྐྱོན་ཡོད་པའི་སྐོར་དང་། བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ནས་སློབ་ཡོན་དང་སློབ་སྦྱོང་གི་མཐུན་རྐྱེན་གནང་དང་གནང་བཞིན་པ་ཁག་ལ་མང་ཚོགས་ནས་ཀྱང་དོ་སྣང་བྱེད་དགོས་པ་དང་། ཕ་མ་ཚོས་ཀྱང་ཕྲུ་གུའི་ཤེས་ཡོན་འཕེལ་རྒྱས་སུ་འགྲོ་བར་འགན་མཉམ་འཁུར་གནང་དགོས་པ་སོགས་ཀྱི་སྐོར་གསུངས།།
