ཕྱི་ལོ་ ༢༠༢༠ ཟླ་ ༡ ཚེས་ ༢༨ རེས་གཟའ་མིག་དམར།
༄༅། །བོད་ཀྱི་བརྙན་འཕྲིན་ཚན་པའི་གསར་འགོད་པ་བསྟན་འཛིན་འཆི་མེད་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༢༠ ཟླ་ ༡ ཚེས་ ༢༨ ཉིན་ནས་བཟུང་ཉིན་གྲངས་གསུམ་རིང་གནས་མཆོག་རྡོ་རྗེ་གདན་གྱི་བཀའ་བརྒྱུད་སྨོན་ལམ་ཆེན་མོའི་ཆོས་རྭའི་ནང་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་ཐེངས་ ༣༧ པའི་སྔོན་འགྲོའི་གསུང་ཆོས་དབུ་འཛུགས་ཀྱིས་ཕྱི་ཟླ་ ༢ ཚེས་ ༩ བར་དངོས་གཞི་འཚོགས་གནང་གི་ཡོད་པ་རེད།
དེ་ཡང་རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་གོ་སྒྲིག་ཚོགས་ཆུང་གི་སྤྱི་ཁྱབ་འགན་འཛིན་ཀརྨ་ཆོས་གྲགས་ལགས་ཀྱིས་གསུང་དོན། ཐེངས་འདིའི་བཀའ་བརྒྱུད་སྨོན་ལམ་ཆེན་མོའི་ཐོག་རྒྱལ་བལ་འབྲུག་གསུམ་ནང་གི་དགོན་སྡེ་ཁག་གི་གྲྭ་བཙུན་ལྔ་སྟོང་ཡས་མས་ཤིག་དང་། དེ་བཞིན་ཕྱི་རྒྱལ་ཡུལ་གྲུ་ཁག་ ༥༠ ལྷག་ནས་དད་ལྡད་པ་མང་པོ་འདུ་འཛོམས་གནང་ཡོད། རྒྱལ་ཡོངས་བཀའ་བརྒྱུད་སྨོན་ལམ་ཆེན་མོ་འདི་བཞིན་རྒྱ་གར་ཙམ་མ་ཡིན་པར་བོད་གཙོ་བོར་གྱུར་བའི་རྒྱལ་ཁབ་ཁག་འདྲ་མིན་ནང་སྨོན་ལམ་འཚོགས་ཀྱི་ཡོད། སྨོན་ལམ་འཚོགས་བཞིན་པའི་སྐབས་གོ་སྒྲིག་ཚོགས་ཆུང་ནས་སྤྱི་ཚོགས་ཞབས་ཞུའི་ལས་དོན་འདྲ་མིན་བསྒྲུབས་དང་སྒྲུབ་མུས་རེད།
