ཕྱི་ལོ་ ༢༠༢༠ ཟླ་ ༡ ཚེས་ ༢༧ རེས་གཟའ་ཟླ་བ།
༄༅།།བོད་མིའི་སྒྲིག་འཛུགས་ཀྱི་འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག་རྒྱ་གར་འབྲས་ལྗོངས་མངའ་སྡེའི་བྱང་ཕྱོགས་ལ་ཆེན་དང་ལ་ཆུང་ཁུལ་གྱི་བོད་མིའི་གཞིས་ཆགས་ཁག་གི་གནས་སྟངས་རྒྱུས་ལོན་ཆེད་གཞུང་འབྲེལ་ཕྱོགས་ཕེབས་གནང་ཡོད། འཕྲོད་བསྟེན་བཀའ་བློན་མཆོག་དང་ལྷན་སྒང་ཏོག་ས་གནས་འགོ་འཛིན་ལས་ཁུངས་ཀྱི་ལས་བྱེད་ཀརྨ་རྣམ་རྒྱལ་ལགས་དང་བསྟན་འཛིན་བསམ་གཏན་ལགས་བཅས་ལ་ཆེན་ཁུལ་དུ་ཕེབས་འབྱོར་སྐབས་ས་གནས་སྐུ་ཚབ་རྣམ་པས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།
དེ་ཡང་འཕྲོད་བསྟེན་བཀའ་བློན་མཆོག་གིས་ས་གནས་འཛིན་དང་ས་གནས་བོད་མིའི་སྐུ་ཚབ་རྣམ་པ་ཚོ་དང་ལྷན་ཚོགས་འདུ་འཚོགས་སྐབས་ཐོག་མར་བོད་མིའི་སྒྲིག་འཛུགས་ཀྱི་བཀའ་ཤག་སྐབས་༡༥ པའི་ཚབ་ཞུས་ཏེ་འཚམས་འདྲི་གནང་བ་དང་སྦྲགས། ས་གནས་བོད་མི་ཚོར་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ངོས་ནས་སྨན་བཅོས་ལྟ་སྐྱོང་ལས་གཞི་དང་འཕྲོད་བསྟེན་ཤེས་ཡོན་སོགས་ཀྱི་སླད་ལས་གཞི་སྤེལ་དང་སྤེལ་མུས་ཡིན་པས་ས་གནས་བོད་མི་ཚོས་ལས་གཞི་དེ་དག་གི་ནང་འཛུལ་ཞུགས་གནང་དགོས་པའི་ལམ་སྟོན་གནང་ཡོད།
གཞན་ཡང་འཕྲོད་བསྟེན་བཀའ་བློན་མཆོག་གིས་བོད་མིའི་སྒྲིག་འཛུགས་ཀྱི་ངོས་ནས་ཁ་ཐོར་དང་ས་ཁུལ་ཁུག་ཀྱོག་བཅས་སུ་གནས་པའི་དགོས་ངེས་ཅན་གྱི་བོད་མི་ཚོར་བོད་མིའི་རིག་གཞུང་དང་། སྐད་ཡིག ངོ་བོ་སོགས་མི་ཉམས་རྒྱུན་འཛིན་གྱི་ཆེད་དཔལ་འབྱོར་གྱི་མཐུན་འགྱུར་གནང་དང་གནང་བཞིན་ཡོད་པ་སོགས་ཀྱི་སྐོར་གསུངས། ཚོགས་འདུའི་སྐབས་མུ་ཤི་ཐང་དང་། ལ་ཆུང་། ཆུང་ཐང་། སྤ་གོང་བཅས་ཀྱི་ས་གནས་བོད་མི་ཚོས་གཞིས་ཆགས་ཀྱི་ལས་གཞི་ཁག་གང་མགྱོགས་ལག་བསྟར་ཡོང་བའི་འབོད་སྐུལ་ཞུས་འདུག་པ་བཅས།།
