ཕྱི་ལོ་ ༢༠༢༠ ཟླ་ ༡ ཚེས་ ༢༤ རེས་གཟའ་པ་སངས། 

༄༅། །རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་འགོ་ལས་ཁུངས་ཀྱི་གོ་སྒྲིག་འོག བོད་མི་སོ་ནམ་པ་མི་གྲངས་བཞི་བཅུ་ལ་ཉེ་འཁོར་དར་ཝར་ Dharwad གྲོང་ཁྱེར་དུ་རྟེན་གཞི་བྱས་པའི་དར་ཝར་སོ་ནམ་གཙུག་ལག་སློབ་གཉེར་ཁང་དུ་དེང་དུས་སོ་ནམ་འདེབས་ལས་ཀྱི་རིག་གསར་འཕྲུལ་འཁོར་བཀོལ་སྤྱོད་བྱེད་སྟངས་ཐོག་ཉིན་གཅིག་གི་སྐོར་སྐྱོད་ཟབ་སྦྱོང་ལེགས་གྲུབ་བྱུང་འདུག  

སྐབས་དེར་མཐོ་སློབ་ཏུ་སོ་ནམ་པའི་འགྲེམས་སྟོན་ Krishi Mela ཞེས་པ་ཞིག་ཚོགས་སྟབས་བོད་མི་སོ་ནམ་པ་ཚོས་དེར་རྟོག་ཞིབ་གནང་འདུག  

ཐེངས་འདིའི་སྐོར་སྐྱོད་ལས་རིམ་གྱི་དམིགས་ཡུལ་གཙོ་བོ་ནི། སོ་ནམ་འདེབས་འཛུགས་བྱེད་ཐབས་འདྲ་མིན་ཁག་ངོ་སྤྲོད་ཐུབ་པ་དང་།  རྫས་ལུད་དང་འབྲུ་རིགས་གསར་པ་ངོ་སྤྲོད།  སྨན་རྩ་འདེབས་ལས་བྱེད་སྟངས།  སྨན་རྩ་ངོ་སྤྲོད།  ཞིང་ལས་འཕྲུལ་ཆས་གསར་པ་རྒྱུས་ལོན། ཟ་འབྲུ་བདག་གཅེས། སོ་ནམ་འཐོན་སྐྱེད་ཚོང་ལས་བྱེད་ཕྱོགས་སྐོར། དེ་བཞིན་རྒྱ་གར་ཞིང་པ་རྣམས་དང་ལྷན་དུ་བསམ་ཚུལ་བརྗེ་ལེན་དང་། མཐོ་སློབ་གྱི་མཁས་དབང་རྣམས་ཀྱིས་གཏམ་བཤད་གནང་འདུག   

ལས་རིམ་གྱི་ཐོག་མར་མཐོ་སློབ་འགན་འཛིན་ Dr Usha Malagi ལགས་ཀྱིས་སྣེ་ལེན་ཞུས་པ་དང་བསྟུན་མཐོ་སློབ་ཀྱི་ངོ་སྤྲོད་གནང་རྗེས་རིམ་པར་མཐོ་སློབ་ཀྱི་མཁས་དབང་ནས་སོ་ནམ་འདེབས་ལས་སྐོར་ལམ་སྟོན་གནང་འདུག ཕྱོགས་མཚུངས་ཞིང་ལས་དང་འབྲེལ་བའི་གློག་བརྙན་ཡང་གཟིགས་འབུལ་ཞུས་འདུག་པ་བཅས། །