ཕྱི་ལོ་ ༢༠༢༠ ཟླ་ ༡ ཚེས་ ༢༧ རེས་གཟའ་ཟླ་བ།
༄༅། །རྒྱ་གར་གྱི་སྲིད་འཛིན་སྐུ་ཞབས་རཱམ་ནཱཐ་ཀོ་ཝིནྜ་ Ram Nath Kovind མཆོག་གིས་རྒྱ་གར་མང་གཙོའི་དུས་ཆེན་ཐེངས་ ༧༡ ཐོག་ཨ་རི་ཀོ་ལམ་བྷི་ཡ་གཙུག་ལག་སློབ་ཁང་གི་འཕགས་བོད་ནང་པའི་རིག་གཞུང་ཉམས་ཞིབ་བསྟི་གནས་ཁང་གི་སློབ་དཔོན་ཆེན་མོ་སྐུ་ཞབས་རོ་བྷཌ་ཐུར་མན་ Professor Robert Thurman མཆོག་ལ་པདྨ་ཤྲཱི་གཟེངས་རྟགས་ Padma Shri award གནང་རྒྱུའི་ཐག་གཅོད་གནང་འདུག ཐེངས་འདིར་རྒྱ་གར་གཞུང་གིས་ ༢༠༢༠ ལོའི་གཟེངས་རྟགས་འབུལ་ཡུལ་མི་སྣ་ ༡༡༨ ཡོད་ཁོངས་ནས་སློབ་དཔོན་ཆེན་མོ་སྐུ་ཞབས་རོ་བྷཌ་ཐུར་མན་ Professor Robert Thurman མཆོག་གཅིག་ཡིན་འདུག སྤྱིར་གཟེངས་རྟགས་དངོས་སུ་འབུལ་རྒྱུའི་མཛད་སྒོ་དེ་བཞིན་ལོ་ལྟར་ཕྱི་ཟླ་གསུམ་པའམ་བཞི་པའི་ནང་ཚོགས་སྲོལ་ཡོད་འདུག
དེ་ཡང་སློབ་དཔོན་ཆེན་མོ་སྐུ་ཞབས་རོ་བྷཌ་ཐུར་མན་ Professor Robert Thurman མཆོག་ནི་ནང་པའི་གཞུང་ཆེན་ཀ་པོད་ལྔར་སྦྱངས་པ་མཐར་ཕྱིན་བ་དང་། ཁོང་གིས་ནང་ཆོས་ཀྱི་དེབ་མང་པོ་འབྲི་རྩོམ་དང་ཕྱོགས་སྒྲིག་སོགས་གནང་འདུག ཁོང་ལ་བུ་མོ་གཅིག་ཡོད་པ་དེ་ནི་ཨིན་ཇིའི་གློག་བརྙན་འཁྲབ་སྟོན་པ་གྲགས་ཅན་དབུ་མ་ཐུར་མན་ Uma Thurman ལགས་ཡིན་འདུག ཁོང་གིས་བཀའ་འགྱུར་ཁོངས་ནས་དྲི་མེད་གྲགས་པའི་མདོ་བོད་ཡིག་ནས་ཨིན་སྐད་ནང་ཕན་སྒྱུར་ཞུས་ཡོད་འདུག ཕྱི་ལོ་ ༡༩༩༧ ལོར་ཨ་རིའི་ནང་གི་མང་ཚོགས་ལ་སེམས་འགུལ་ཆེ་ཤོས་གཏོང་མཁན་གྱི་མི་སྣ་གྲགས་གྲས་ ༢༥ ནས་གཅིག་ཡིན་འདུག ༢༠༠༦ ལོར་ནིའུ་ཡོག་དུས་དེབ་ནང་ཁོང་ནི་ཆོས་ཕྱོགས་ཐོག་ནས་སེམས་འགུལ་ཆེ་ཤོས་གཏོང་མཁན་ཞིག་ཡིན་པར་ངོས་འཛིན་ཞུས་འདུག
ཕྱོགས་མཚུངས་བོད་ཀྱི་རྩ་དོན་ལ་རྒྱབ་སྐྱོར་གནང་མཁན་རྒྱ་གར་གྱི་བདེ་སྲུང་བློན་ཆེན་ཞིང་གཤེགས་སྐུ་ཞབས་ཇོར་རྗེ་ཕར་ནནྜེ་སི་ George Fernandes མཆོག་ལ་པདྨ་ཝི་བྷུ་ཤན་གཟེངས་རྟགས་ Padma Vibhushan དེ་ཕུལ་ཡོད་པ་བརྒྱུད་ལམ་ཁག་ཏུ་གྲགས། དམ་པ་ཁོང་ནི་ཕྱི་ལོ་ ༢༠༡༩ ལོར་འདས་གྲོངས་སུ་གྱུར་ཡོད། སྐུ་འཚོ་བཞུགས་རིང་བོད་མི་དང་བོད་དོན་ལ་ཁ་ཞེ་གཉིས་མེད་ཐོག་ནས་རྒྱབ་སྐྱོར་ཤུགས་ཆེ་གནང་མཁན་ཞིག་ཡིན། པདྨ་ཝི་བྷུ་ཤན་གཟེངས་རྟགས་དེ་ནི་རྒྱ་གར་མི་སེར་གཟེངས་རྟགས་མཐོ་ཤོས་གཉིས་པ་ཡིན་ཞིང་། རྒྱ་གར་མི་སེར་གྱི་གཟེངས་རྟགས་མཐོ་ཤོས་དེ་ནི་བྷཱརཐ་རཏྣ་ Bharat Ratna ཞེས་པ་ཡིན་འདུག །
