ཕྱི་ལོ་ ༢༠༢༠ ཟླ་ ༡ ཚེས་ ༦ རེས་གཟའ་ཟླ་བ།
༄༅། །ཕྱི་ལོ་ ༢༠༢༠ ཟླ་ ༡ ཚེས་ ༦ ནས་ ༨ བར་ཉིན་གྲངས་གསུམ་རིང་རྡ་ས་བོོད་ཀྱི་དཔེ་མཛོད་ཁང་གི་ཚོགས་ཁང་དུ་བོད་ཀྱི་དཔེ་མཛོད་ཁང་གི་ཚན་རིག་ཚན་པས་ ༼ དེང་དུས་ཚན་རིག་དང་ནང་ཆོས། ༽ ཞེས་པའི་བརྗོད་གཞིའི་ཐོག་གཏམ་བཤད་ལས་རིམ་ཞིག་གོ་སྒྲིག་གནང་འདུག
དེ་ཡང་གོང་ཚེས་རེས་གཟའ་ཟླ་བ་ཉིན་གྱི་སྔ་དྲོ་ཆུ་ཚོད་ ༡༠ ཐོག་གཏམ་བཤད་གནང་མཁན་ཕ་རན་སིའི་མི་སེར་ཡིན་པ་སྐྱེས་དངོས་དངོས་ཁམས་རིག་པའི་ཚན་རིག་པ་སྐུ་ཞབས་མི་ཤལ་ Michael Bitbol ལགས་དང་། བོད་ཀྱི་དཔེ་མཛོད་ཁང་གི་དྲུང་ཆེ་གཞོན་པ་བསྟན་འཛིན་ལྷ་དབང་ལགས་ཀྱིས་གཙོས་ལས་བྱེད་དང་། གཏམ་བཤད་ལས་རིམ་དུ་མཉམ་ཞུགས་གནང་མཁན་ཁྱོན་མི་གྲངས་ ༢༠ ལྷག་ཙམ་ཚང་འཛོམས་ཀྱིས་ཐོག་མར་བསྟན་འཛིན་ལྷ་དབང་ལགས་ཀྱིས་སྐུ་ཞབས་མི་ཤལ་ Michael Bitbol ལགས་ཀྱི་ངོ་སྤྲོད་སྙིང་བསྡུས་ཤིག་གནང་སྐབས། ཐེངས་འདིར་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་ཀྱིས་མགྲོན་འབོད་གནང་བ་ལྟར་སྐུ་ཞབས་མི་ཤལ་ Michael Bitbol ལགས་ཆེད་ཕེབས་གནང་བར་ཐུགས་རྗེ་ཞུས་པ་དང་ཐུགས་རྗེ་ཆེ་ཞུའི་མཇལ་དར་ཞིག་འབུལ་སོང་།
དེ་རྗེས་སྐུ་ཞབས་ཁོང་གིས་གཏམ་བཤད་ལས་རིམ་དབུ་འཛུགས་གནང་བ་དང་། སྐབས་དེར་ཁོང་གིས་དེང་དུས་ཚན་རིག་དང་ནང་ཆོས་ཞེས་པའི་བརྗོད་གཞིའི་ཐོག་ནས་ཚན་རིག་ཞེས་པ་གང་ཡིན་པ་དང་། དངོས་པོའི་ཆོས་ཉིད། ནང་ཆོས་དང་ཚན་རིག་བར་འདྲ་ཆོས་དང་མི་འདྲ་བའི་ཁྱད་པར། ཚད་རྡུལ་དངོས་ཁམས་རིག་པ་བཅས་ཀྱི་སྐོར་ལ་གཏམ་བཤད་གནང་རྒྱུ་ཡིན་འདུག
སྤྱིར་སྐུ་ཞབས་ཁོང་ནི་ཚན་རིག་པ་ཞིག་ཡིན་པ་མ་ཟད། དེ་སྔ་ཕྱི་ལོ་ ༢༠༡༣ ཟླ་ ༡ ཚེས་ ༡༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དབུ་བཞུགས་ཐོག་རྒྱ་གར་ལྷོ་ཕྱོགས་མོན་གྷོ་འདོད་རྒྱུ་གླིང་དུ་སེམས་དང་སྲོག་གི་བགྲོ་གླེང་ལྷན་ཚོགས་ཐེངས་ ༢༦ ཐོག་ལས་རིམ་གཙོ་སྐྱོང་ཞུས་པ་མ་ཟད། གཏམ་བཤད་ཀྱང་ཞུས་འདུག །
