༢༠༢༠ ཟླ་ ༡ ཚེས་ ༣༠ རེས་གཟའ་ཕུར་བུ།
༄༅། །དེང་སྐབས་ཏོག་དབྱིབས་ཅན་གྱི་ནད་ཡམས་གློ་བའི་གཉན་ཚད་ཆེས་ཁྱབ་གདལ་འགྲོ་བཞིན་པ་དེ་དག་སྤྱིར་འཛམ་བུ་གླིང་དང་། སྒོས་སུ་འཕགས་ཡུལ་གངས་ལྗོངས་བཅས་པར་སྔོན་འགོག་འབྱུང་བཅོས་ལ་སྨན་སླད། བླ་ལྷའི་ཐུགས་དམ་དགོངས་དོན། ཐུབ་པའི་མཚན་སྔགས་འགྲོ་གང་ཆེ་དང་། མ་ཎི་དུང་ཕྱུར། སྒྲོལ་མའི་མཚན་སྔགས་ཡི་གེ་བཅུ་པ། བཀའ་འགྱུར་དག་སྒྲོག རྡོ་རྗེ་རྣམ་འཇོམས་མའི་སྒོ་ནས་རྟེན་ཁྲུས་ཡུལ་ཁྲུས། འདོད་ཁམས་བདག་མོའི་བསྐང་བ་དང་འབྲེལ་བའི་མ་མོའི་འཁྲུགས་སྐོང་། པདྨའི་མནོལ་བསངས་བཅས་འཕྲལ་དུ་བསྒྲུབ་དགོས་ཕེབས་བྱུང་ན། གཟུངས་སྔགས་ཁག་མང་ཚོགས་རང་རང་སོ་སོ་ནས་དང་། གཞན་རྣམས་དགོན་སྡེ་དང་། གྲོང་སྡེ་སྤྱི་ཚོགས་བཅས་ནས་རང་དོན་རང་གཅེས་ཀྱིས་འཕྲལ་དུ་བསྒྲུབ་གལ་ཆེ་བའི་འབོད་སྐུལ་དུ། དགའ་ལྡན་ཕོ་བྲང་ཡིག་ཚང་ནས། ཕྱི་ལོ་ ༢༠༢༠ ཟླ་ ༡ ཚེས་ ༣༠ ལ།
འདི་གར་ཆོས་རིག་ལས་ཁུངས་ནས་དད་ལྡན་སེར་སྐྱ་མང་ཚོགས་ཐུན་མོང་ལ་ཛ་དྲག་བརྡ་ཁྱབ་བཏང་གནས་ནང་འཁོད་དོན།
འཛམ་གླིང་གང་སར་ཁྱབ་གདལ་འགྲོ་བཞིན་པའི་ནད་ཡམས་སྔོན་འགོག་དང་བཅོས་ཐབས་སུ། དཔལ་ལྡན་དགའ་ལྡན་ཕོ་བྲང་ཡིག་ཚང་ནས་གོང་བཀོད་གསལ་བསྒྲགས་དགོངས་དོན་བཞིན། ཐུབ་པའི་མཚན་སྔགས་དང་། མ་ཎི། སྒྲོལ་མའི་གཟུངས་སྔགས་ཡི་གེ་བཅུ་པ་བཅས་མི་མང་ཚོགས་སྒེར་སོ་སོ་ནས་རང་དོན་རང་གཅེས་ཀྱིས་འཕྲལ་དུ་སྒྲུབ་གསོག་གནང་གལ་ཆེ་ཞིང་། དགོན་སྡེ་ཁག་ནས་བསྒྲུབ་དགོས་སྤྱི་རིམ་ཁག་འདི་ག་ནས་མཆོད་དོད་དང་སྦྲགས་འཕྲལ་འགྲེམས་ཞུ་རྒྱུ་ཡིན་པའི་གསལ་བསྒྲགས་དང་འབོད་སྐུལ་ཆབས་ཅིག་ཏུ། བོད་མིའི་སྒྲིག་འཛུགས་ཆོས་རིག་ལས་ཁུངས་ནས། ཕྱི་ལོ་ ༢༠༢༠ ཟླ་ ༡ ཚེས་ ༣༠ ཉིན།
