ཕྱི་ལོ་ ༢༠༡༩ ཟླ་ ༡༢ ཚེས་ ༩ རེས་གཟའ་ཟླ་བ།
༄༅། །བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་གོ་སྒྲིག་འོག་ལོ་ལྟར་སྲི་ཞུ་བ་ཕོ་མོ་ནང་ཁུལ་སིལ་སྤོལ་རྩེད་འགྲན་གནང་སྲོལ་ཡོད་པ་ལྟར། ཕྱི་ལོ་ ༢༠༡༩ ཟླ་ ༡༠ ཚེས་ ༡༥ ཉིན་འདི་ལོའི་སིལ་སྤོལ་རྩེད་འགྲན་ཐེངས་གཉིས་པ་དབུ་འཛུགས་ཀྱིས་ཕྱི་ཟླ་ ༡༢ ཚེས་ ༧ རེས་གཟའ་སྤེན་པ་ཉིན་རྩེད་འགྲན་མཐའ་མ་ལེགས་གྲུབ་བྱུང་ཡོད།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣།༣༠ ཐོག་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་ཆོས་རིག་བཀའ་བློན་གཡུ་ཐོག་རྐམ་དགེ་ལེགས་མཆོག། འཕྲོད་བསྟེན་བཀའ་བློན་ཆོས་སྐྱོང་དབང་ཕྱུག་མཆོག སྤྱི་འཐུས་རྒྱུན་ལས་རྣམ་པ། ལས་ཁུངས་ཁག་གི་དྲུང་ཆེ་ཆུང་རྣམ་པ། སྲི་ཞུའི་ལས་བྱེད་རྣམ་པ། གཞན་ཡང་གཟིགས་མོ་བ་བཅས་གངས་སྐྱིད་སིལ་སྤོལ་རྩེད་ཐང་དུ་འདུ་འཛོམས་བྱུང་ཡོད།
སྐབས་དེར་རྩེད་འགྲན་ཚོགས་ཆུང་བསྟན་འཛིན་དབང་རྒྱལ་ལགས་ཀྱིས་རྩེད་འགྲན་བརྒྱུད་རིམ་སྐོར་ངོ་སྤྲོད་གསུང་བཤད་གནང་བ་དང་བསྟུན། དཔལ་ལྡན་སྲིད་སྐྱོང་མཆོག་གིས་རྩེད་འགྲན་འདི་ནི་དམིགས་བསལ་སྲི་ཞུའི་ལས་བྱེད་རྣམས་ཀྱི་འཕྲོད་བསྟེན་དང་། གཙོ་བོ་སྲི་ཞུའི་ལས་བྱེད་ཕན་ཚུན་དབར་མཐུན་ལམ་དང་འབྲེལ་བ་བཟང་དུ་གཏོང་ཆེད་ཡིན་སྐོར་དང་། ལོ་ལྟར་རྩེད་འགྲན་སྲི་ཞུ་བ་མཉམ་ཞུགས་གནང་མཁན་ཇེ་མང་དུ་འགྲོ་བཞིན་པ་དང་། ཐེངས་འདིར་གོ་སྒྲིག་ཚོགས་ཆུང་ནས་གོ་སྒྲིག་ཧ་ཅང་ཡག་པོ་ཡོད་སྐོར་སོགས་གསུང་བཤད་གནང་སྟེ་ཐོག་མར་དཔལ་འབྱོར་ལས་ཁུངས་དང་ཕྱི་དྲིལ་ལས་ཁུངས་ཀྱི་བུད་མེད་རུ་ཁག་དབར་རྩེད་འགྲན་གནང་སྟེ་དཔལ་འབྱོར་རུ་ཁག་ལ་ཨང་ ༡༤ དང་ཕྱི་དྲིལ་རུ་ཁག་ལ་ཨང་ ༡༥ ཐོབ་སྟེ་ཕྱི་དྲིལ་རུ་ཁག་ལ་རྒྱལ་ཁ་ཐོབ་ཡོད།
དེ་ནས་སྐྱེས་པའི་རྩེད་འགྲན་དབུ་འཛུགས་གནང་སྟེ་བདེ་སྲུང་ལས་ཁུངས་རུ་ཁག་ལ་ཨང་ ༣༢ དང་། ཕྱི་དྲིལ་ལས་ཁུངས་རུ་ཁག་ལ་ཨང་ ༥༠ ཐོབ་སྟེ་ཕྱི་དྲིལ་ལས་ཁུངས་རུ་ཁག་ལ་རྒྱལ་ཁ་ཐོབ་ཡོད།
ཐེངས་འདིའི་རྩེད་འགྲན་ཐོག་སྐྱེས་པའི་རུ་ཁག་ ༡༡ དང་བུད་མེད་ཀྱི་རུ་ཁག་ ༦ མཉམ་ཞུགས་གནང་འདུག་པ་བཅས། །
