ཕྱི་ལོ་ ༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ།
པར་པ། བསྟན་འཛིན་འཇིག་མེད་ལགས།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཚོག་ལ་རྒྱ་གར་ལྷོ་ཕྱོགས་གྷོ་བ་མཐོ་སློབ་ཀྱིས་ཇི་ལྟར་སྔོན་ནས་གདན་ཞུ་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༩ ཟླ་ ༡༢ ཚེས་ ༡༡ ཉིན་ Kala Academy ཞེས་པའི་རིག་གཞུང་བསྟི་གནས་ཁང་དུ་དཔལ་ནཱ་ལེནྡྲའི་ཆོས་བརྒྱུད་ལས་དེང་དུས་དང་འབྲེལ་ཡོད་སྐོར་ལ་བཀའ་སློབ་སྩལ་སོང་།
པར་པ། བསྟན་འཛིན་འཇིག་མེད་ལགས།
དེ་ཡང་གོང་ཚེས་ཉིན་གྱི་སྔ་དྲོ་ ༡༠ ཙམ་ལ་མགོན་པོ་གང་ཉིད་མཆོག་ Kala Academy ཞེས་པའི་རིག་གཞུང་བསྟི་གནས་ཁང་དུ་༸ཞབས་སོར་འཁོད་སྐབས་གྷོ་བ་མཐོ་སློབ་ཀྱི་ཉེ་བའི་རིགས་བདག་སྐུ་ཞབས་ཝ་རུན་སེ་ནི་ Varun Sahni ལགས་དང་རིགས་དྲུང་སོགས་ཀྱིས་ཕེབས་སྒོའི་མཚམས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཏེ་ཚོགས་ཁང་ནང་མི་གྲངས་སྟོང་ཕྲག་བརྒལ་བ་འདུ་འཛོམས་ཐོག་སྡིངས་ཆའི་སྟེང་༸ཞབས་སོར་བདེ་བར་འཁོད་བསྟུན། ཉེ་བའི་རིགས་བདག་སྐུ་ཞབས་ཝ་རུན་སེ་ནི་ལགས་ཀྱིས་ཕེབས་བསུའི་གསུང་བཤད་དང་། ཏཱ་ལའི་བླ་མ་ཀུན་ཕན་བདེ་རྩའི་འགན་འཛིན་སྐུ་ཞབས་ར་ཇིབ་མེ་རོ་ཏྲ་ Rajiv Mehrotra ལགས་ཀྱིས་གསུང་བཤད་གནང་།
པར་པ། བསྟན་འཛིན་འཇིག་མེད་ལགས།
དེ་ནས་སྤྱི་ནོར་༸གོང་ས་༸སྐྱབསམགོན་ཆེན་པོ་མཆོག་གིས་བཀའ་སློབ་སྩལ་དོན། འཛམ་གླིང་ནང་གི་འགྲོ་བ་མི་རིགས་ཐེར་འབུམ་བདུན་ཡོད་པ་རྣམས་སྤུན་མཆེད་ཕོ་མོ་ཡིན། ང་ཚོ་ཐོག་མར་མའི་མངལ་ནས་སྐྱེ་ཚུལ་དང་། མཐར་འཆི་སྟངས་ཚང་མ་གཅིག་པ་རེད། འཚོ་བའི་རིང་དེར་སེམས་པ་བཟང་པོ་བྱ་རྒྱུ་དེ་གལ་ཆེ་ཤོས་རེད། སེམས་པ་བཟང་པོ་ཞིག་བྱོས་དང་སེམས་ནང་སྙིང་སྟོབས་དེས་འཕེལ་ཐུབ། སྤྱི་ཚོགས་ནང་ཞི་བདེའི་ཁོར་ཡུག་དེས་བསྐྲུན་ཐུབ། དོན་དམ་བདེ་སྐྱིད་ཀྱི་འབྱུང་ཁུངས་དེ་ང་རང་ཚོའི་སེམས་རྒྱུད་དུལ་མིན་ལ་རག་ལས་ཡོད་པ་མ་གཏོགས་ཕྱི་དངོས་པོའི་དངུལ་དང་སྙན་གྲགས་སོགས་ལས་དོན་དམ་བདེ་སྐྱིད་སྐྲུན་ཐུབ་རྒྱུ་མ་རེད། ང་ཚོས་དུས་རྟག་ཏུ་འགྲོ་བ་མི་རིགས་ཐེར་འབུམ་བདུན་ཡོད་པ་ཐམས་ཅད་མི་གཅིག་གྱུར་ཡིན་བསམ་པའི་འདུ་ཤེས་རྒྱུན་འཛིན་བྱེད་དགོས་པ་བརྗོད་ཀྱི་ཡོད། ཆོས་ལུགས་དང་རྒྱལ་ཁབ། ཤ་མདོག དབུལ་ཕྱུག་སོགས་ཁྱད་པར་དེ་དག་རིམ་པ་གཉིས་པའི་གནས་སྟངས་རེད།
པར་པ། བསྟན་འཛིན་འཇིག་མེད་ལགས།
གཞི་རྩའི་ཆ་ནས་ང་ཚོ་ཚང་མ་འགྲོ་བ་མི་གཅིག་གྱུར་རེད། དེང་སྐབས་ངོས་ལ་འགན་ཁུར་གཙོ་བོ་བཞི་ཡོད། དང་པོ་དེར་འགྲོ་བ་མིའི་བཟང་སྤྱོད་གོང་མཐོར་གཏོང་རྒྱུ་དང་། དེའང་ཚན་རིག་པའི་གྲུབ་དོན་ལ་གཞི་བཅོལ་ནས་འགྲོ་བཞིན་ཡོད། ཚན་རིག་པ་མང་པོ་ཞིག་གིས་ཡང་ཡང་ཁོང་ཁྲོ་ལངས་པ་དང་། ཆགས་སྡང་གི་བསམ་བློ་དེས་མིའི་ནད་འགོག་བྱེད་ཀྱི་ལུས་པོའི་ཟུངས་ཤུགས་ཉམས་པ་བརྗོད་ཀྱི་ཡོད། འགྲོ་བ་མིའི་རིགས་ནི་སྤྱི་ཚོགས་ལ་བརྟེན་པའི་སྲོག་ཆགས་ཡིན་སྟབས་གཞི་རྩའི་ལྷན་སྐྱེས་བྱམས་བརྩེའི་རང་བཞིན་ཡིན་པ་བརྗོད་ཀྱི་ཡོད། ང་ཚོས་རེ་བ་རྒྱག་ས་དེ་རེད། བྱམས་བརྩེའི་བློ་སྐྱེ་བར་དད་པ་ཙམ་ལ་མ་བརྟེན་པར་ཤེས་རབ་ཀྱི་གྲོགས་དང་བཅས་པ་དགོས།
པར་པ། བསྟན་འཛིན་འཇིག་མེད་ལགས།
གོང་དུ་བརྗོད་པ་ལྟར་ཚན་རིག་པ་མང་པོས་མིའི་ལྷན་སྐྱེས་རང་བཞིན་བྱམས་བརྩེ་ལྡན་པ་ཡིན་པ་བརྗོད་ཀྱི་ཡོད། ང་ཚོས་སྐྱེ་བ་ཕྱི་མ་དང་ལྷ་ཡུལ། ཐར་པའི་གོ་འཕང་སྐོར་བཤད་ཀྱི་མེད། ཚང་མས་ཉིན་རེའི་མི་ཚེའི་ནང་བདེ་སྐྱིད་འདོད་པ་རེད། སེམས་པ་བཟང་པོ་བྱོས་དང་བདེ་སྐྱིད་ཀྱི་རྩ་བ་དེ་རེད། ཇི་ཙམ་སེམས་པ་བཟང་པོ་བྱས་པ་དེ་ཚོད་ཀྱིས་མི་དེར་རེ་དོགས་ཀྱི་བསམ་བློ་དང་། སེམས་ནང་དངངས་སྐྲག གཞན་ལ་ཆགས་སྡང་གི་བློ་ཤུགས་ཆུང་དུ་འགྲོ་རྒྱུ་རེད།
པར་པ། བསྟན་འཛིན་འཇིག་མེད་ལགས།
ད་ཆ་དེང་དུས་ཤེས་ཡོན་ལམ་ལུགས་ནང་དུ་ནང་གི་བསམ་བློ་ཇེ་བཟང་དུ་གཏོང་ཐབས་ཐོག་སློབ་གསོ་སྤྲད་དགོས། རྒྱ་གར་ནང་ལ་མཚོན་ན་ལོ་ངོ་ ༣༠༠༠ གོང་ནས་སྙིང་རྗེ་དང་འཚེ་མེད་ཞི་བའི་ལྟ་གྲུབ་ཉམས་བཞེས་གནང་སྲོལ་དར་ཡོད། རྒྱ་གར་ཨིན་ཇིའི་འོག་ལ་ཡོད་སྐབས་དེང་དུས་ཤེས་ཡོན་ལམ་ལུགས་གཏན་འབེབས་བྱས་པ་རེད། ཧ་ཅང་ཡག་པོ་རེད། འོན་ཀྱང་ཨིན་ཇིའི་ལམ་ལུགས་ནང་བསམ་བློ་ཇེ་བཟང་དུ་གཏོང་ཐབས་དང་། ཆགས་སྡང་གི་བློར་གཉེན་པོ་ཇི་ལྟར་བསྟེན་དགོས་མིན་ཐོག་གང་ཡང་བཤད་རྒྱུ་མེད། གཙོ་ཆེར་དད་པ་རྐྱང་རྐྱང་བྱས་ནས་འགྲོ་བ་རེད། ཕ་མེས་ནས་ཡེ་ཤུ་དང་ཇིའུ་ཆོས་ལུགས་རེད། དད་པ་ཙམ་བྱས་ནས་ཕྱིན་པ་ཡིན་ན་དེས་ལྡེང་ངེས་ཤིག་མེད།
པར་པ། བསྟན་འཛིན་འཇིག་མེད་ལགས།
བྱམས་བརྩེའི་བློ་སྐྱེ་བར་དད་པ་ཙམ་ལ་བརྟེན་ནས་ཡོང་ཐབས་མེད། མིའི་རྣམ་དཔྱོད་ཤེས་རབ་ལ་ངེས་པར་བརྟེན་དགོས། ཞེས་སོགས་བཀའ་སློབ་སྩལ་བ་དང་། དེ་ནས་ཆོས་ལུགས་མཐུན་སྒྲིལ་སྐོར་དང་། བོད་ཀྱི་ཆོས་དང་རིག་གཞུང་། དེ་བཞིན་རྒྱ་གར་གནའ་རབས་ཀྱི་སེམས་ཁམས་རིག་པ་དང་ཚད་མ་རིག་པ་སོགས་དཔལ་ནཱ་ལེནྜ་ནས་དར་བའི་ལེགས་བཤད་དེ་དག་རྒྱ་གར་ནང་བསྐྱར་གསོ་ཡོང་ཐབས་མཛད་བཞིན་པའི་སྐོར་བཀའ་སློབ་སྩལ། མཐར་རིགས་དྲུང་གིས་ཐུགས་རྗེ་ཆེ་ཞུའི་གསུང་བཤད་གནང་ཡོད་པ་བཅས།།
པར་པ། བསྟན་འཛིན་འཇིག་མེད་ལགས།
པར་པ། བསྟན་འཛིན་འཇིག་མེད་ལགས།
