ཕྱི་ལོ་ ༢༠༡༩ ཟླ་ ༡༢ ཚེས་ ༡༠ རེས་གཟའ་མིག་དམར།

༄༅། །ཕྱི་ལོ་ ༢༠༡༩ ཟླ་ ༡༢ ཚེས་ ༡༠ ཉིན་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་རྒྱ་གར་གྱི་རྒྱལ་ས་ལྡི་ལི་ནས་མཁའ་ལམ་བརྒྱུད་རྒྱ་གར་ལྷོ་ཕྱོགས་གྷོ་བར་༸ཞབས་སོར་བདེ་བར་འཁོད་སོང་།

དེ་ཡང་མགོན་པོ་གང་ཉིད་མཆོག་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༢།༡༥ ཙམ་ལ་ཧ་ཡ་ཏི་གསོལ་མགྲོན་ཁང་ Grand Hyatt དུ་༸ཞབས་སོར་བདེ་བར་འཁོད་སྐབས་ན་ལེནྡྲ་ཤི་ཀི་ཤ་ Nalanda Shiksha ཞེས་པའི་རྒྱ་གར་ནང་པའི་ཆོས་ཚོགས་ཀྱི་ Dr.Anita Dudhane ལགས་དང་། གསོལ་མགྲོན་ཁང་གི་སྤྱི་ཁྱབ་འགན་འཛིན་ Jaco Le Roux ལགས་ཀྱིས་གཙོས་མགྲོན་ཁང་གི་ལས་བྱེད་སོགས་ནས་ཕེབས་བསུའི་སྣེ་ལེན་གཟབ་རྒྱས་ཞུས་ཡོད།

དེ་ཡང་མགོན་པོ་གང་ཉིད་མཆོག་ལ་གྷོ་བ་མཐོ་སློབ་ཀྱིས་ཇི་ལྟར་སྔོན་ནས་གདན་ཞུ་གསོལ་འདེབས་ཞུ་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ཚེས་ ༡༡ ཉིན་ Kala Academy ཞེས་པའི་རིག་གཞུང་བསྟི་གནས་ཁང་དུ་དཔལ་ནཱ་ལེནྡྲའི་ཆོས་བརྒྱུད་ལས་དེང་དུས་དང་འབྲེལ་ཡོད་སྐོར་ལ་བཀའ་སློབ་བསྩལ་རྒྱུ་ཡིན་པ་བཅས། །