ཕྱི་ལོ་ ༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ་ཉིན་གྱི་སྔ་དྲོ་ཆུ་ཚོད་ ༡༡།༥༠ ཐོག་བོད་མིའི་སྒྲིག་འཛུགས་ཀྱི་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ་དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་དང་། ལྔ་དང་ལྔ་བཅུའི་གཞོན་སྐྱེས་མགྲིན་ཚབ་པ་ལྷ་རོང་ལགས། ཚོགས་ཆེན་གྱི་སྐུ་ཚབ་བསྟན་འཛིན་སྒྲོལ་མ་ལགས། དེ་བཞིན་ཕྱི་ནང་གི་གསར་འགོད་པ་ཁག་གཅིག་ཚང་འཛོམས་ཀྱིས་ལྔ་དང་ལྔ་བཅུའི་གཞོན་སྐྱེས་གླེང་སྟེགས་ཀྱི་དྲ་ཚིགས་ www.fivefiftyyouthforum.net དང་མཉེན་ཆས་རེ་ཝར་གཉིས་ Ryver གཉིས་དབུ་འབྱེད་ཀྱི་ཐོག་ལ་གསར་འགོད་གསལ་བསྒྲགས་ཤིག་སྤེལ་གནང་སོང་།
དེ་ཡང་སྐབས་དེར་ལྷ་རོང་ལགས་ཀྱིས་ངོ་སྤྲོད་གསུང་བཤད་གནང་རྗེས་དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་ཀྱིས་དྲ་ཚིགས་དང་མཉེན་ཆས་དབུ་འབྱེད་གནང་མཚམས་གསུང་དོན། བོད་མིའི་སྒྲིག་འཛུགས་ཀྱི་ལྔ་དང་ལྔ་བཅུའི་སྲིད་བྱུས་དེ་བཞིན་བོད་མིའི་སྒྲིག་འཛུགས་ནས་བོད་ཀྱི་རྩ་དོན་ཆེད་འབྱུང་འགྱུར་ལོ་ལྔའི་ནང་གང་བྱེད་དགོས་པ་དང་། གང་བྱེད་ཐུབ་པ། དེ་བཞིན་ལོ་ལྔ་བཅུའི་འཆར་གཞི་ཞིག་ལ་གོ་དགོས། བོད་མིའི་འཐབ་རྩོད་སླད་གཞོན་སྐྱེས་ཚོར་འགན་ཁྲིད་ཆེན་པོ་ཡོད་པ་དང་།
ཕྱོགས་མཚུངས་དྲ་ཚིགས་དང་མཉེན་ཆས་དེ་དག་བརྒྱུད་ནས་གཞོན་སྐྱེས་གང་མང་ཞིག་བོད་ཀྱི་རྩ་དོན་སྒྲུབ་ཐབས་སླད་ནུས་པ་མཉམ་སྤུངས་བྱེད་ཐུབ་རྒྱུ་ཡིན་སྐོར་སོགས་གསུངས། གཞན་ཡང་དྲུང་ཆེས་ལྔ་དང་ལྔ་བཅུ་གཞོན་སྐྱེས་ཐེངས་གཉིས་པའི་ཚོགས་བཅར་བ་མི་གྲངས་ ༡༤ ནས་མ་སྐུལ་དང་བླངས་ཀྱིས་དྲ་ཚིགས་དང་མཉེན་ཆས་གསར་བཟོ་གནང་བར་ཐུགས་རྗེ་ཆེ་ཞུ་རྒྱུ་ཡིན། ཞེས་གསུངས།
དེ་རྗེས་བསྟན་འཛིན་སྒྲོལ་མ་ལགས་ཀྱི་དྲ་ཚིགས་དང་གཉེན་ཆས་ཀྱི་འགྲོ་སྟངས་བརྒྱུད་རིམ་སོགས་ངོ་སྤྲོད་གནང་གྲུབ་མཚམས་ཁོང་རྣམ་པས་གསར་འགོད་པའི་དྲི་བར་ལན་འདེབས་གནང་སྟེ་གསར་འགོད་གསལ་བསྒྲགས་གྲོལ་ཡོད།
གོང་ཚེས་ཉིིན་གྱི་གསར་འགོད་གསལ་བསྒྲགས་ནང་འཁོད་དོན།
འདི་ལོ་ཕྱི་ཟླ་༨པའི་ནང་འཛམ་གླིང་ས་ཕྱོགས་གང་ས་ནས་ཤེས་ཡོན་དང་ལྷག་བསམ་ཅན་གྱི་བོད་རིགས་གཞོན་སྐྱེས་བརྒྱ་ཙམ་རྡ་སར་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པར་བཅར་བ་དང་།
སྐབས་དེའི་ཚོགས་འདུའི་དམིགས་ཡུལ་དང་འཆར་སྣང་གང་ལེགས་སྒྲུབ་ཐབས་སུ་བོད་མིའི་སྒྲིག་འཛུགས་ཁོ་ནར་མ་བསྙེས་པར་གཞོན་སྐྱེས་རང་ནས་བོད་སྤྱི་བའི་རྩ་དོན་ཐོག་འགན་ཁུར་བཞེས་རྒྱུ་གལ་ཆེ་ཡིན་པའི་བསམ་ཚུལ་བྱུང་ཡོད། སྐབས་དེའི་གྲོས་ཆོད་དགོངས་དོན་ལྟར་ལྔ་དང་ལྔ་བཅུའི་དྲ་རྒྱ་ཞིག་དང་གཞོན་སྐྱེས་ཕན་ཚུན་འབྲེལ་ལམ་དང་བགྲོ་གླེང་ཆེད་དྲ་རྒྱའི་གླེང་སྟེགས་ཞིག་བཟོ་སྒྲིག་ཞུས་པ་བཞིན།
དེ་རིང་ཕྱི་ལོ་༢༠༡༩ ཟླ་ ༡༢ ཚེས་ ༡༡ ཉིན་ཡོངས་ཁྱབ་གསལ་བསྒྲགས་དང་དབུ་འབྱེད་ཞུ་རྒྱུ་ཡིན།
མཉེན་ཆས་རེ་ཝར་ Ryver འདི་ནི་ཚོགས་བཅར་བ་རྣམས་ཕན་ཚུན་བོད་དོན་དང་འབྲེལ་བའི་བརྗོད་གཞི་འདྲ་མིན་ཐོག་བསམ་ཚུལ་བགྲོ་གླེང་བྱེད་སའི་དྲྭ་ཐོག་གླེང་སྟེགས་ཤིག་ཡོང་ཐབས་དང་། ལྔ་དང་ལྔ་བཅུ་དང་འབྲེལ་བའི་བསམ་ཚུལ་བརྗེ་ལེན་དང་ལས་གཞི་ཁག་མུ་མཐུད་རྒྱུན་འཁྱོངས་དང་ལག་བསྟར་ཡོང་ཐབས་ཙམ་དུ་མ་ཟད་ལྔ་དང་ལྔ་བཅུའི་ཚོགས་འདུའི་དམིགས་ཡུལ་སྒྲུབ་ཐབས་སུ་དམིགས་པ་ཞིག་ཡིན།
དེའི་ཕྱིར་ལྔ་དང་ལྔ་བཅུའི་གཞོན་སྐྱེས་གླེང་སྟེགས་ཀྱི་དྲྭ་རྒྱ་དང་དྲ་ཐོག་གླེང་སྟེགས་འདི་བཞིན་ལྔ་དང་ལྔ་བཅུའི་གཞོན་སྐྱེས་ཚོགས་འདུ་ཐེངས་གཉིས་པའི་ཚོགས་བཅར་བ་ཁག་ཅིག་གིས་མ་སྐུལ་དང་བླངས་ཐོག་ནས་གསར་བཟོ་ཞུས་པ་ཞིག་ཡིན། དྲ་རྒྱའི་འགྲོ་གྲོན་ཆ་ཚང་ཚོགས་བཅར་བ་རང་ངོས་ནས་ཐབས་ཤེས་ཞུས་པ་དང་དེའི་དམིགས་ཡུལ་གཙོ་བོ་རང་ཁ་རང་གསོའི་ངོ་བོ་དང་གཞན་རྟེན་མ་ཡིན་པའི་མིག་དཔེ་སྟོན་ཐབས་ཡིན། དྲ་རྒྱའི་སྟངས་འཛིན་གྱི་འགན་དབང་ཆ་ཚང་ཚོགས་བཅར་བའི་དྲ་རྒྱའི་རུ་ཁག་ཁོ་ནར་ཡོད།
དམིགས་ཡུལ།
༡༽ བོད་མི་གཞོན་སྐྱེས་སྤྱི་དང་བྱེ་བྲག་ལྔ་དང་ལྔ་བཅུའི་གཞོན་སྐྱེས་ཚོགས་བཅར་བ་རྣམས་ཕན་ཚུན་མུ་མཐུད་འབྲེལ་བ་ཡོང་ཐབས་དང་བསམ་ཚུལ་བརྗེ་ལེན་བྱེད་སའི་སྡིངས་ཆ་བསྐྲུན་ཐབས་བྱ་རྒྱུ་དང་།
༢༽ ལྔ་དང་ལྔ་བཅུའི་གཞོན་སྐྱེས་ཚོགས་འདུ་དང་འབྲེལ་བའི་ཡིག་ཆ་དང་ལས་འཆར། ཚོགས་བཅར་བ་དང་གཞོན་སྐྱེས་ཀྱི་མགྲིན་ཚབ་པ་ངོ་སྤྲོད། གཞུང་འབྲེལ་བརྙན་པར། ཚོགས་བཅར་བ་ཁག་གིས་སྤེལ་བའི་ལས་གཞི་སོགས་སྟབས་བདེའི་ངང་མང་ཚོགས་དང་འབྲེལ་ཡོད་རྣམས་ཀྱི་ཕྱག་ཏུ་སོན་ཐབས་ཞུ་རྒྱུ་དང་།
༣༽ འབྱུང་འགྱུར་ལྔ་དང་ལྔ་བཅུའི་ཚོགས་འདུའི་ནང་གཞོན་སྐྱེས་གང་མང་ཆ་ཤས་ལེན་རྒྱུའི་སེམས་འགུལ་ཐེབས་ཐབས་དང་ལྔ་དང་ལྔ་བཅུའི་སྔ་ཕྱི་བར་གསུམ་གྱི་ཚོགས་འདུའི་ཚོགས་བཅར་བ་རྣམས་འཛམ་གླིང་ས་ཕྱོགས་གང་དུ་བཞུགས་ཡོད་ཀྱང་ཚང་མས་ནུས་པ་མཉམ་སྤུངས་དང་སྟོབས་ཤུགས་མཉམ་བསྒྲིལ་ཐོག་ལས་འཆར་གང་མང་བརྩམ་རྒྱུའི་བློ་སྟོབས་རྒྱུན་བསྲིང་གནས་ཐབས་བཅས་ཡིན།
གསར་འགོད་ལྷན་ཚོགས་འདིའི་གོ་སྐབས་བཟུང་ནས་ལྔ་དང་ལྔ་བཅུའི་གཞོན་སྐྱེས་གླེང་སྟེགས་ཀྱི་དྲ་ཚིགས་གསར་བཟོའི་ལས་གཞི་འདི་ལ་ཕྱར་བ་གྲུ་འདེགས་གནང་མཁན་གྱི་འབྲེལ་ཡོད་ཚོགས་སྒེར་ཡོངས་ལ་བཀའ་དྲིན་ཆེ་ཞུ་རྒྱུ་དང་། ལྷག་པར་དུ་བོད་མིའི་སྒྲིག་འཛུགས་ནས་འདི་ལྟ་བུའི་ཚོགས་འདུ་གོ་སྒྲིག་གནང་བར་རྗེས་སུ་ཡི་རངས་ཞུ་བ་དང་སྦྲགས། ཆེད་དུ་བཟོས་པའི་དྲ་རྒྱ་འདི་ཉིད་དང་དྲྭ་ཐོག་གླེང་སྟེགས་འདི་གཉིས་བརྒྱུད་གཞོན་སྐྱེས་ཚོའི་ནུས་པ་གོང་འཕེལ་གཏོང་ཐབས་ཀྱི་སྡིངས་ཆ་ཞིག་བསྐྲུན་པའི་ཐོག་བོད་ཕྱི་ནང་གི་བོད་མི་ཚོའི་ཆབ་སྲིད་དང་། སྤྱི་ཚོགས། དཔལ་འབྱོར། རིག་གཞུང་བཅས་པའི་ནུས་ཤུགས་མཉམ་སྤུངས་དང་མི་ཉམས་གོང་འཕེལ་ཐོག་བརྒྱུད་འཛིན་ཐུབ་པའི་ཞབས་འདེགས་སྒྲུབ་པའི་རེ་བ་ཅི་ཆེ་ཞུ་བཞིན་ཡོད་པ་བཅས། །
