ཕྱི་ལོ་ ༢༠༡༩ ཟླ་ ༡༢ ཚེས་ ༡༦ རེས་གཟའ་ཟླ་བ།
༄༅། །འདི་གར་མོན་གྷོ་འདོད་རྒུ་གླིང་འཕྲོད་བསྟེན་སྨན་ཁང་ནས་གནས་ཚུལ་བཏང་གནས་ནང་འཁོད་དོན། བོད་མིའི་སྒྲིག་འཛུགས་འཕྲོད་བསྟེན་ལས་ཁུངས་ཀྱི་ལམ་སྟོན་འོག འདི་ག་མོན་གྷོ་འདོད་རྒུ་གླིང་བོད་མིའི་གཞིས་ཆགས་སུ་བོད་མིའི་མགོན་སྐྱབས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཆིབས་བསྒྱུར་དང་བསྟུན། དད་ལྡན་ཆོས་ཞུ་བ་རྣམས་ལ་རིན་མེད་བརྟག་དཔྱད་ཀྱི་སྨན་སྒར་ཆེད་དམིགས་བསལ་བརྟག་དཔྱད་འཕྲུལ་ཆས་ HealthCube གྲངས་ ༢༠ དང་གཞིས་ཆགས་ཁག་ ༨ ནས་སྨན་ཞབས་གྲངས་ ༡༡ དང་ས་གནས་སྨན་ཞབས་ཐུན་མོངས་ནས་ཕྱི་ལོ་ ༢༠༡༩ ཟླ་ ༡༢ ཚེས་ ༡༤ ནས་ཚེས་ ༢༠ བར་ཉིན་གྲངས་ ༧ རིང་རིན་མེད་སྨན་སྒར་ལས་རིམ་འགོ་བཙུགས་གནང་གཏན་འཁེལ་བ་ལྟར། ཕྱི་ཆེས་ ༡༤ ཉིན་རྒྱབ་ཆུ་ཚོད་ ༡ ཐོག་ལྷོ་སྤྱི་ཆོས་འཕེལ་ཐུབ་བསྟན་ལགས་ཀྱིས་གཙོས་གཞིས་ཁག་ལྔའི་ས་གནས་འགོ་འཛིན་རྣམ་པ་དང་། གཞིས་གྲོང་ཁག་གི་སྤྱི་མི་དང་ཕྱག་མཛོད། དེ་བཞིན་ཕྱོགས་མཐའ་ཁག་ནས་ཕེབས་པའི་སྨན་ཞབས་ཚང་འཛོམས་ཐོག་མཛད་སྒོའི་སྐུ་མགྲོན་གཙོ་བོ་དཔལ་ལྡན་འབྲས་སྤུངས་བློ་གསལ་གླིང་མཁན་རིན་པོ་ཆེ་དགེ་བཤེས་བློ་བཟང་ལགས་ཀྱི་རིན་མེད་སྨན་བཅོས་ལས་རིམ་དེ་བཞིན་དབུ་འབྱེད་གནང་སོང་།
དེ་ནས་ས་གནས་འཕྲོད་བསྟེན་འགན་འཛིན་གྱིས་གོང་འཁོད་ལས་འཆར་གྱི་ངོ་སྤྲོད་སྙིང་བསྔུས་གནང་རྗེས་སྐུ་མགྲོན་གཙོ་བོ་མཆོག་གིས་གསུང་བཤད་གནང་དོན། ཀུན་སློང་བཟང་པོ་ཐོག་ནས་འཕྲོད་བསྟེན་ཞབས་ཞུ་གནང་ཐུབ་ཚེ་ཕན་རླབས་བསམ་གྱི་མི་ཁྱབ་ཡོད་སྐོར་དང་། ནད་མནར་རྣམས་ལ་བྱམས་སྙིང་རྗེའི་ཐོག་ནས་ལྟ་སྐྱོང་བྱ་རྒྱུའི་གལ་འགངས་ཆེན་པོའི་སྐོར་དང་སྦྲགས། མང་ཚོགས་ཀྱི་ཆེད་རིན་མེད་སྨན་སྒར་བརྟག་དཔྱད་དང་སྨན་བཅོས་མཐུན་རྐྱེན་སྐྲུན་པར་དབུས་ས་གཉིས་ལ་ཐུགས་རྗེ་ཆེ་ཞུས་པ་དང་འབྲེལ། དགོན་པའི་ངོས་ནས་མཐུན་རྐྱེན་གང་ཐུབ་གནང་རྒྱུའི་ཞལ་བཞེས་གནང་ཡོད། ཅེས་གསུངས། དེ་རྗེས་རྟེན་འབྲེལ་མཚོན་བྱེད་གསོལ་ཇ་དང་འབྲས་སིལ་འདེགས་འབུལ་ཞུས་ཡོད་པ་བཅས། །
