༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ།
༄༅། །འདི་གར་བལ་ཡུལ་སྐུ་ཚབ་དོན་ཁང་ནས་ཕྱི་ལོ་ ༢༠༡༩ ཟླ་ ༡༢ ཚེས་ ༡༠ ཉིན་བཏང་གནས་ནང་འཁོད་དོན། ད་རིང་ཕྱི་ལོ་ ༢༠༡༩ ཟླ་ ༡༢ ཚེས་ ༡༠ རེས་གཟའ་མིག་དམར་ཉིན་བོད་མིའི་བླ་ན་མེད་པའི་དབུ་འཁྲིད་ལྷར་བཅས་སྲིད་ཞིའི་གཙུག་རྒྱན་འཇིག་རྟེན་ཞི་བདེའི་དེད་དཔོན་ཆེན་པོ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ནོ་བེལ་ཞི་བདེའི་གཟེངས་རྟགས་འབུལ་བཞེས་མཛད་ནས་མི་ལོ་ ༣༠ ཧྲིལ་པོ་འཁོར་བའི་རྟེན་འབྱུང་དགའ་སྟོན་གྱི་བསྐལ་བཟང་གི་ཉིན་མོ་དང་། རྒྱལ་སྤྱིའི་འགྲོ་བ་མིའི་ཐོབ་ཐང་གི་ཉིན་མོ་བཅས་དུས་ཆེན་གཉིས་འཛོམས་ཐོག་བོད་མི་ཡོངས་ཀྱིས་འཛམ་གླིང་ས་ཕྱོགས་གང་སར་དགའ་དད་སྤྲོ་གསུམ་སྒོ་ནས་མཛད་སྒོ་སྲུང་བརྩི་ཞུས་དང་ཞུ་མུས་ལྟར། འདི་ག་བལ་ཡུལ་ཀཱཋ་མཱཎ་ཌུ་ནང་བལ་ཡུལ་དོན་གཅོད་ཁང་གི་གོ་སྒྲིག་འོག་འཕགས་པ་ཤིང་ཀུན་མཆོད་རྟེན་གྱི་ཉེ་འགྲམ་བྲག་དཀར་དགོན་པའི་ཚོམས་ཆེན་དུ་ད་རིང་སྔ་དྲོའི་ཆུ་ཚོད་ ༩ ཐོག་གཞུང་འབྲེལ་མཛད་སྒོ་ཚོགས་པ་དང་།
སྐབས་དེར་སྐུ་མགྲོན་གཙོ་བོར་བལ་ཡུལ་ཤེལ་དཀར་ཆོས་སྡེ་གྲྭ་ཚང་གི་མཁན་ཪིན་པོ་ཆེ་མཆོག་དབུས་པའི་བལ་ཡུལ་སྐུ་ཚབ་དོན་གཅོད་དང་། ཕྱོགས་བཞུགས་སྤྱི་འཐུས་རྣམ་པ་དང་སྤྱི་ཟུར་རྣམ་པ། བལ་ཡུལ་འགྲོ་བ་མིའི་ཐོབ་ཐང་ཚོགས་པའི་ཚོགས་གཙོ་སྐུ་ཞབས་བ་ཝཱ་ནཱི་ཁ་རེལ་མཆོག དགོན་སྡེ་ཁག་གི་འགན་འཛིན་ནམ་སྐུ་ཚབ། ས་འཐུས་ཁག་གི་ཚོགས་གཙོ་རྣམ་པ། ས་གནས་འགོ་འཛིན་རྣམ་པ། གཞན་ཡང་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་པ་སྐྱིད་སྡུག་ཁག་གི་ཚོགས་གཙོ་འགན་འཛིན་རྣམ་པ། རྣམ་རྒྱལ་འབྲིང་སློབ་གྲྭའི་དགེ་ལས་སློབ་ཕྲུག སེར་སྐྱ་མི་མང་སྟོང་ཕྲག་ཕྱེད་ལྷག་འདུ་འཛོམས་གནང་ཡོད་འདུག
དེ་བཞིན་བལ་གཞུང་གི་ས་གནས་ཉེན་རྟོག་པ་མཛད་སྒོ་ཚོགས་གནས་སུ་སླེབས་ནས་རྟོག་ཞིབ་བྱས་པ་དང་། གསང་བའི་ལས་བྱེད་པ་མི་ཉུང་བ་ཞིག་ཆེད་མངགས་འགྲེམ་འཇོག་ཀྱིས་ཆབ་སྲིད་ལས་འགུལ་སྤེལ་མིན་སོ་མྱུལ་དོ་ནན་བྱས་འདུག དམ་བསྒྲགས་དེ་ལྟར་ཡོད་བཞིན་དུ་དགོན་པའི་ནང་གཞུང་འབྲེལ་མཛད་སྒོ་རྣམས་མཛད་རིམ་ལྟར་གང་ལེགས་བྱུང་ཡོད་པ་བཅས།།
