ཕྱི་ལོ་ ༢༠༡༩ ཟླ་ ༡༢ ཚེས་ ༢༠ རེས་གཟའ་པ་སངས།
༄༅། །འདི་གའི་ཆེད་གཉེར་གསར་འགོད་པ་ཡེ་ཤེས་ཀུན་གྲགས་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༢ ཚེས་ ༢༠ ཉིན་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཝི་མ་ལ་མཐུན་ཚོགས་ Vimala Association དང་། ཨི་ཊ་ལིར་རྟེན་གཞི་བྱས་པའི་ Italian Buddhist Union བཅས་ཐུན་མོང་ནས་དཔལ་འབྱོར་མཐུན་འགྱུར་རོགས་རམ་འོག་མོན་གྷོ་འདོད་རྒུ་གླིང་བོད་མིའི་གཞིས་ཆགས་ཀྱི་ས་གནས་འཕྲོད་བསྟེན་སྨན་ཁང་གི་ལས་བྱེད་རྣམས་ཀྱི་ཆེད་ཁང་མིག་དྲུག་ཅན་གྱི་ལས་ཤག་གསར་པ་དབུ་འབྱེད་གནང་སོང་།
དེ་ཡང་གོང་ཚེས་ཉིན་གྱི་ཕྱེད་ཡོལ་ཆུ་ཚོད་ ༣།༡༥ ཙམ་ལ་དབུ་འབྱེད་མཛད་སྒོའི་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་བློ་བཟང་སེངྒེ་མཆོག་དང་། ཆོས་རིག་བཀའ་བློན་གཡུ་ཐོག་ཀརྨ་དགེ་ལེགས་མཆོག བོད་མི་མང་སྤྱི་འཐུས་ཨ་ཀྲུག་ཚེ་བརྟན་ལགས་དང་གོ་བོ་བློ་བཟང་ཕན་བདེ་ལགས། ལྷོ་སྤྱིས་གཙོས་རྒྱ་གར་ལྷོ་ཕྱོགས་ཁུལ་གྱི་བོད་མིའི་གཞིས་ཆགས་ཁག་ལྔའི་ས་གནས་འགོ་འཛིན་རྣམ་པ། ས་གནས་འཐུས་ཚོགས་ཀྱི་ཚོགས་གཙོ། གདན་ས་ཆོས་སྒར་ཁག་གི་ཕྱག་མཛོད་རྣམ་པ། ས་གནས་འཕྲོད་བསྟེན་སྨན་ཁང་གི་འགན་འཛིན་གྱིས་གཙོས་འབྲེལ་ཡོད་ལས་བྱེད་སོགས་ཚང་འཛོམས་ཀྱིས་ཐོག་མར་བཙུན་དགོན་བྱང་ཆུབ་ཆོས་གླིང་གི་བཙུན་མ་བཞི་གྲས་ཤིས་བརྗོད་གསུང་འདོན་གནང་གྲུབ་མཚམས་དཔལ་ལྡན་སྲིད་སྐྱོང་མཆོག་གིས་༸རྒྱལ་བའི་སྐུ་པར་མཐོང་གྲོལ་རིན་པོ་ཆེའི་སྐུ་མདུན་དུ་སྣང་གསལ་མར་མེ་ཞལ་ཕྱེ་དང་།
དེ་བཞིན་དར་མཚོན་གཅོད་འབྲེག་དང་འབྲེལ་པང་རྡོ་ཞལ་ཕྱེ་གནང་སྟེ་ལས་ཤག་གསར་པའི་ལས་གཞི་ལེགས་གྲུབ་བྱུང་བ་དེ་ཉིད་དབུ་འབྱེད་གནང་སོང་།
དེ་ནས་མོན་གྷོ་འདོད་རྒུ་གླིང་གི་ས་གནས་འགོ་འཛིན་ལྷག་པ་ཚེ་རིང་ལགས་ཀྱིས་ཕེབས་བསུ་དང་མཛད་སྒོའི་ངོ་སྤྲོད་གསུང་བཤད་གནང་གྲུབ་བསྟུན་ལྕམ་སྐུ་ཌེ་བྷི་ Debbie Carrani ལགས་ཀྱིས་གསུང་བཤད་གནང་།
དེ་ནས་སྐུ་མགྲོན་གཙོ་བོ་དཔལ་ལྡན་སྲིད་སྐྱོང་མཆོག་གིས་འཚམས་འདྲི་དང་འབྲེལ་གསུང་བཤད་གནང་དོན། ད་རེས་ Debbie ལགས་ཀྱིས་ས་གནས་འཕྲོད་བསྟེན་སྨན་ཁང་གི་ལས་ཤག་གསར་རྒྱག་སླད་སྐུ་ལས་ཧ་ཅང་བསྐྱོན་འདུག ལྷག་པར་ཨི་ཊ་ལིར་རྟེན་གཞི་བྱས་པའི་ནང་པའི་ཆོས་ཚོགས་ནས་རོགས་དངུལ་བརྒྱ་ཆ་ ༧༥ གནང་བར་ཐུགས་རྗེ་ཆེ་ཞེས་ཞུ་རྒྱུ་ཡིན། དེ་རིང་དགེ་འཕེལ་གླིང་ཆོས་ཚོགས་ཀྱི་སྐུ་ཚབ་རྣམ་པ་འདིར་ཕེབས་འདུག
སྤྱིར་དེ་སྔ་ཡུ་རོབ་ཡུལ་གྲུ་ཁག་གི་ནང་ཡུ་ཤུའི་ལྷ་ཁང་ཡིན་ན། གཞུང་གིས་ངོས་འཛིན་གནང་སྟེ་དངུལ་མང་པོ་ཐོབ་ཀྱི་ཡོད། ཨི་ཊ་ལིར་བྱས་རྗེས་ཆེ་ཤོས་གང་རེད་ཅེ་ན། ནང་པའི་དགོན་པ་ཡོད་པ་ཁག་ཚང་མས་ཚོགས་པ་བཙུགས་ཏེ་གཞུང་གིས་ངོས་འཛིན་གནང་ཐུབ་པ་བྱུང་ཡོད། གལ་ཏེ་གཞུང་གིས་ངོས་འཛིན་གནང་བ་ཡིན་ན་གཞུང་གི་རོགས་དངུལ་ཐད་ཀར་ཐོབ་ཀྱི་ཡོད། དེ་ཡང་ཚོགས་པའི་ཚོགས་གཙོ་དང་ཚོགས་གཞོན་གཉིས་ཀ་བོད་བརྒྱུད་ནང་བསྟན་ཉམས་ལེན་གནང་མཁན་རེད། ཨི་ཊ་ལིར་ཡོད་པའི་ནང་པའི་ཆོས་ཚོགས་ཁག་གི་ཚོགས་པ་བཙུགས་ཐུབ་པ་མ་ཟད། གཞུང་གིས་ངོས་འཛིན་གནང་བ། ལྷག་པར་ཆོས་ལུགས་གཞན་ལྟར་རོགས་དངུལ་ཐོབ་ཐུབ་པ་འདི་ཁྲིམས་མཐུན་ཆགས་པ་རེད། དེ་ལྟར་བྱུང་བ་ནི་བྱས་རྗེས་ཧ་ཅང་ཆེན་པོ་རེད། འདིར་རོགས་དངུལ་གནང་བར་ཐུགས་རྗེ་ཆེ།
Debbie ལགས་ཀྱིས་བཙན་བྱོལ་བོད་མིའི་གཞིས་ཆགས་ཁག་གི་ནང་ཕྱག་ལས་གནང་སྟེ་ལོ་ངོ་ ༣༤ ལྷག་ཙམ་ཕྱིན་ཡོད། ད་བར་བཙན་བྱོལ་བོད་མིའི་བདེ་དོན་སླད་ཕྱག་ལས་གནང་བར་ཐུགས་རྗེ་ཆེ་ཞུ་རྒྱུ་དང་། ད་དུང་ཡིན་ནའང་མུ་མཐུད་གནང་རོགས། ད་བར་ཕན་ཐོགས་ཧ་ཅང་བྱུང་འདུག ལྷག་པར་ཝི་མ་ལ་མཐུན་ཚོགས་བརྒྱུད་རྡ་སར་བོད་མི་ཚབ་སྲིད་བཙོན་ཟུར་སླད་སྡོད་ཁང་གསར་རྒྱག་དང་། དེ་བཞིན་ལས་གཞི་གཞན་ཁག་ལའང་མཐུན་འགྱུར་མང་པོ་གནང་བར་ཐུགས་རྗེ་ཆེ་ཞུ་རྒྱུ་ཡིན།
དེ་རིང་འདིར་བཅར་རྒྱུ་བྱུང་བ་ཧ་ཅང་དགའ་པོ་བྱུང་། ལས་ཤག་འདིའི་ནང་བཞུགས་པའི་རིང་ལུས་སེམས་གཉིས་ཀ་སྤྲོ་བོའི་ངང་མང་ཚོགས་ཀྱི་འཕྲོད་བསྟེན་སླད་ཞབས་འདེགས་ཡག་པོ་ཞུ་པའི་རེ་བ་དང་། དེ་ལྟར་གནང་མུས་ཡིན་པའི་ཡིད་ཆེས་ཀྱང་ཡོད། ལས་བྱེད་རྣམས་ནས་ཕྱག་ལས་ཧ་ཅང་ཡག་པོ་གནང་བཞིན་པར་བསྔགས་བརྗོད་དང་། མཛད་སྒོར་ཕེབས་མི་ཡོངས་ལ་བཀའ་དྲིན་ཆེ་ཞེས་ཞུ་རྒྱུ་ཡིན། ཞེས་གསུང་བཤད་གནང་སྟེ། མཐུན་འགྱུར་གནང་མཁན་རྣམས་ལ་ཐུགས་རྗེ་ཆེ་ཞུའི་དྲན་རྟེན་ཕྱག་རྟགས་དང་མགུལ་དར་གནང་།
མཐར་ས་གནས་འཕྲོད་བསྟེན་སྨན་ཁང་གི་འགན་འཛིན་གྱིས་ཐུགས་རྗེ་ཆེ་ཞུའི་གསུང་བཤད་གནང་སྟེ་མཛད་སྒོ་རྒྱལ་ཁའི་ངང་གྲོལ་ཡོད་པ་བཅས། །
