ཕྱི་ལོ་ ༢༠༡༩ ཟླ་ ༡༢ ཚེས་ ༣༡ རེས་གཟའ་མིག་དམར། 

༄༅། །འདི་གའི་ཆེད་གཉེར་གསར་འགོད་པ་སྐལ་བཟང་རྒྱ་མཚོ་ལགས་ཀྱིས་ས་གནས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༢ ཚེས་ ༣༡ རེས་གཟའ་ལྷག་པའི་ཉིན་འདི་གའི་གསར་འགོད་པས་དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་མཆོག་ལ་འཇམ་དབྱངས་ཆོས་སྐོར་ཞུ་བ་ཅི་ཡིན་སྐོར་བཅར་འདྲི་ཞུ་སྐབས་རིན་པོ་ཆེ་མཆོག་གིས་གསུང་དོན། འཇམ་དབྱངས་ཆོས་སྐོར་ཞུ་བ་རྗེ་བཙུན་འཇམ་དཔལ་དབྱངས་དང་འབྲེལ་བ་ཡོད་པའི་ཆོས་ཚན་མི་འདྲ་བ་ཡོད་པ་དེ་ཚོ་ཕྱོགས་གཅིག་ཏུ་བསྡུས་པ་ཞིག་ཆགས་ཡོད། ཆོས་སྐོར་ཞུ་བ་དེའི་ཆོས་ཚན་ལྟ་བུ་རེད། གཙོ་བོོ་རྗེ་བདག་ཉིད་ཆེན་པོ་ལ་རྗེ་བཙུན་འཇམ་དཔལ་དབྱངས་ཀྱི་ཞལ་གཟིགས་དང་དག་པའི་སྣང་བ་བྱུང་བ་དེ་ཆོས་ཀྱི་རྒྱུད་པ་ཞིག་ཆགས་ཡོད།

སྤྱིར་བཏང་དབང་དང་། རྗེས་གནང་། ཁྲིད་སོགས་ག་རེ་གནང་བ་ཡིན་ནའང་རིགས་མི་འདྲ་བ་གཙོ་བོ་གཉིས་ཆགས་ཡོད། ལོ་༢༥༠༠ གོང་རྒྱ་གར་འཕགས་པའི་ཡུལ་ནས་སྟོན་པ་སངས་རྒྱས་བཅོམ་ལྡན་ཕེབས་པ་ཁོང་ནས་རིམ་གྱིས་བརྒྱུད་ནས་ཕེབས་པའི་སྡེ་ཚན་གཅིག  ད་ལྟའི་འདི་རྗེ་བདག་ཉིད་ཆེན་པོ་དང་ཁོང་གི་རྩ་བའི་བླ་མ་དབུ་མ་པ་གཉིས་ལ་རྗེ་བཙུན་འཇམ་དཔལ་དབྱངས་ཀྱིས་ཞལ་དངོས་སུ་གཟིགས་ནས་བླ་མ་དབུ་མ་པ་དཔའ་བོ་རྡོ་རྗེ་དང་རྗེ་བདག་ཉིད་ཆེན་པོ་གཉིས་ལ་དངོས་སུ་གནང་བའི་ཉེ་བརྒྱུད་དག་སྣང་ལས་བྱུང་བ་ཞིག་ཆགས་ཡོད། སྐབས་དེ་དུས་དངོས་སུ་རྗེ་བཙུན་འཇམ་དཔལ་དབྱངས་ཞལ་གཟིགས་ནས་གསུངས་པའི་ཆོས་སྐོར་དེ་གྲས་ཕྱོགས་གཅིག་ཏུ་བསྡུས་པའི་ཆོས་ཚན་ཞིག་ལ་འཇམ་དབྱངས་ཆོས་སྐོར་ཞེས་ཞུ་ཡི་ཡོད། སྤྱིར་བཏང་རྗེ་བཙུན་འཇམ་དཔལ་དབྱངས་དང་འབྲེལ་བ་ཡོད་པའི་ཆོས་ཚན་ཕྱོགས་གཅིག་ཏུ་བསྡུས་པ་དབང་དང་རྗེས་གནང་ཞེས་ཆོས་ཚན་ ༡༠ ནས་ ༡༡ ཙམ་ཡོད།

འདི་གའི་གསར་འགོད་པས་མུ་མཐུད་འཇམ་དབྱངས་ཆོས་སྐོར་ཞུ་ན་ཕན་ཡོན་ཅི་ཡོད་བཀའ་འདྲི་ཞུ་སྐབས་རིན་པོ་ཆེ་མཆོག་གིས་གསུང་དོན། རྗེ་བཙུན་འཇམ་དཔལ་དབྱངས་ཤེས་རབ་ཀྱི་ལྷ་ཆགས་ཡོད་པ་མ་ཟད། ཤེས་རབ་གོང་ནས་གོང་དུ་འཕེལ་རྒྱུའི་འབྲེལ་བ་ཐུན་མོང་མ་ཡིན་པ་ཞིག་ཆགས་བསྡད་ཡོད། ང་ཚོ་ཆོས་སྒྲུབ་པ་པོ་ཐར་པ་དང་ཐབས་ཅད་མཁྱེན་པ་ཐོབ་པར་མི་ཤེས་པའི་རྨོངས་པ་གསལ་བར་ཕྱིའི་རྐྱེན་དང་ལྷག་པའི་ལྷ་ལ་བརྟེན་དགོས། རྗེ་བཙུན་འཇམ་དཔལ་དབྱངས་ལ་བརྟེན་ནས་ཤེས་རབ་སྒྲུབ་རྒྱུ་དེ་ཐུན་མོང་མ་ཡིན་པ་ཞིག་ཆགས་ཡོད།

འཇམ་དབྱངས་ཆོས་སྐོར་ཞུས་ནས་ཉམས་སུ་བླངས་པ་ཡིན་ན་ཤེས་རབ་གོང་དུ་འཕེལ་རྒྱུའི་ཐུན་མོང་མ་ཡིན་པའི་ཁྱད་ཆོས་ཡོད། ན་ནིང་ལོར་འཇམ་དབྱངས་ཆོས་སྐོར་ཁྱོན་ཆོས་ཚན་ ༡༡ ཙམ་ཡོད་པའི་ཁོངས་ནས་༤ གསུངས་གྲུབ་པ་རེད། ཅེས་གསུངས། །