ཕྱི་ལོ་ ༢༠༡༩ ཟླ་ ༡༢ ཚེས་ ༡༦ རེས་གཟའ་ཟླ་བ།
༄༅། །འདི་གར་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཕྱི་ལོ་ ༢༠༡༩ ཟླ་ ༡༢ ཆེས་ ༡༦ ཉིན་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༩ ཚེས་ ༣ ནས་ཟླ་ ༡༢ ཚེས་ ༡༢ བར་ཟླ་གསུམ་རིང་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་སྐོར་གོ་རྟོགས་ལས་རིམ་ཐེངས་གསུམ་པ་ལེགས་གྲུབ་ཟིན་པ་དང་། དེའང་ཆོས་ལུགས་ལ་མ་བརྟེན་པའི་བཟང་སྤྱོད་ཀྱི་རྒྱུས་སྟོན་པ་དགེ་བཤེས་ལྷ་རམས་པ་ཡེ་ཤེས་རྒྱལ་མཚན་ལགས་ནས་ཟླ་གསུམ་རིང་རྒྱ་གར་ལྷོ་ཕྱོགས་ཁུལ་གྱི་བོད་པའི་སློབ་ཁག་བརྒྱད་ནང་ཕེབས་ཏེ་སློབ་གྲྭ་རེའི་ནང་བདུན་ཕྲག་གཅིག་ནས་གསུམ་བར་བཞུགས་ནས་འཛིན་གྲྭ་སོ་སོའི་སློབ་ཕྲུག་གི་གནས་ཚད་དང་འཚམས་པའི་སློབ་ཁྲིད་དང་། སློབ་ཕྲུག་ཐུན་མོང་ལ་གསུང་བཤད་དང་དྲི་བ་དྲིས་ལན། དགེ་རྒན་ཐུན་མོང་ལ་གསུང་བཤད་དང་དྲི་བ་དྲིས་ལན། དགེ་སློབ་ཐུན་མོང་ལ་གསུང་བཤད་དང་དྲི་བ་དྲིས་ལན་བཅས་ཐབས་ལམ་འདྲ་མིན་གྱི་ཐོག་ནས་དགེ་རྒན་གྲངས་ ༢༧༢ དང་། སློབ་ཕྲུག་གྲངས་ ༢༤༥༠། ཕ་མ་ ༡༧༠ བཅས་ལ་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གོ་རྟོགས་གཏིང་ཟབ་སྤེལ་གནང་ཐུབ་པ་བྱུང་ཡོད།
བོད་མིའི་སྒྲིག་འཛུགས་ཀྱི་ཤེས་རིག་ལས་ཁུངས་ཀྱི་གོ་སྒྲིག་འོག་ཆོས་ལུགས་ལ་མ་བརྟེན་པའི་བཟང་སྤྱོད་སློབ་སྤེལ་གྱི་རྒྱུས་སྟོན་པ་དགེ་བཤེས་ལྷ་རམས་པ་ཡེ་ཤེས་རྒྱལ་མཚན་ལགས་ནས་ཕྱི་ལོ་ ༢༠༡༧ ལོར་རྒྱ་གར་དང་བོད་པའི་མཐོ་སློབ་ཁག་ཏུ་སློབ་གཉེར་གནང་བཞིན་པའི་བོད་པའི་སློབ་ཕྲུག་ཚོར་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གོ་རྟོགས་སྤེལ་གནང་ཡོད་པ་དང་། དེ་བཞིན་ཕྱི་ལོ་ ༢༠༡༨ ལོར་ཟླ་གྲངས་དྲུག་གི་རིང་རྒྱུས་སྟོན་པ་མཆོག་རྒྱ་བལ་གཉིས་སུ་ཡོད་པའི་བོད་པའི་སློབ་ཁག་དང་གཞིས་ཆགས་ཡོངས་ལ་དངོས་སུ་ཕེབས་ཏེ་དགེ་སློབ་དང་མང་ཚོགས་ཡོངས་ལ་ཆོས་ལུགས་ལ་མ་བརྟེན་པའི་བཟང་སྤྱོད་སྐོར་གོ་རྟོགས་རྒྱ་གང་ཆེ་སྤེལ་གནང་ཡོད། དེའི་སྐབས་སློབ་ཁག་དང་མང་ཚོགས་ནས་གོ་རྟོགས་ལས་རིམ་དེར་དོ་སྣང་ཧ་ཅང་ཆེན་པོ་དང་ཕན་ཐོགས་ཆེན་པོ་བྱུང་ཡོད་པའི་སྐོར་གསུངས་ཡོད་ལ། མ་འོངས་པར་ས་གནས་དང་སློབ་ཁག་ལ་གོ་རྟོགས་ལས་རིམ་འདི་རིགས་དུས་ཡུན་རིང་ཙམ་ཡང་ཡང་སྤེལ་རྒྱུ་སོགས་ཀྱི་འབོད་སྐུལ་དང་དགོངས་ཚུལ་ཤུགས་ཆེ་གནང་བར་བརྟེན། འདི་ལོ་ལྷོ་ཕྱོགས་གཞིས་ཆགས་ལྔའི་ནང་ཡོད་པའི་བོད་པའི་སློབ་ཁག་བརྒྱད་ཀྱི་ནང་རྒྱུས་སྟོན་པ་མཆོག་སློབ་གྲྭ་རེ་རེའི་ནང་བདུན་ཕྲག་གཅིག་ནས་གསུམ་བར་བཞུགས་ནས་དགེ་སློབ་ཡོངས་ལ་བརྗོད་གཞི་འདིའི་ཐོག་གོ་རྟོགས་གཏིང་ཟབ་སྤེལ་གནང་ཐུབ་པ་བྱུང་ཡོད།
དེ་ཡང་ཕྱི་ལོ་ ༢༠༡༩ ཟླ་ ༩ ཚེས་ ༣ ནས་ ༢༡ བར་བདུན་ཕྲག་གསུམ་གྱི་རིང་མོན་གྷོ་སཾབྷོ་ཊ་གཞི་གོང་སློབ་གྲྭ་དང་། ཟླ་ ༡༠ ཚེས་ ༡ ནས་ ༡༡ བར་བདུན་ཕྲག་གཉིས་ཀྱི་རིང་མོན་གྷོ་སཾབྷོ་ཊ་གཞི་འོག་སློབ་གྲྭ་དང་། ཟླ་ ༡༠ ཚེས་ ༡༤ ནས་ ༢༦ བར་བདུན་ཕྲག་གཉིས་ཀྱི་རིང་མོན་གྷོ་སཾབྷོ་ཊ་གཞི་བར་སློབ་གྲྭ་བཅས་སོ་སོར་ཕེབས་ནས་དགེ་སློབ་ཡོངས་ལ་གོ་རྟོགས་གཏིང་ཟབ་སྤེལ་གནང་ཡོད་པ་མ་ཟད། ཟླ་ ༡༠ ཚེས་ ༡༩ ཉིན་སྔ་དྲོ་ཆུ་ཚོད་གཉིས་ཀྱི་རིང་མོན་གྷོ་གཞིས་ཆགས་ཀྱི་ཕ་མ་གྲངས་ ༩༠ ཙམ་ལའང་གསུང་བཤད་དང་དྲི་བ་དྲིས་ལན་བཅས་གནང་ཡོད།
དེ་ནས་ཟླ་ ༡༡ ཚེས་ ༡ ནས་ ༨ བར་བདུན་ཕྲག་གཅིག་གི་རིང་སྦེལ་ཀོབ་བོད་ཁྱིམ་སློབ་གྲྭར་དགེ་སློབ་དང་ཁྱིམ་ཚང་མ་མ་ཡོངས་ལ་གོ་རྟོགས་སྤེལ་གནང་ཡོད་པ་དང་། ཟླ་ ༡༡ ཚེས་ ༡༡ ནས་ ༡༦ བར་སྦེལ་ཀོབ་སཾབྷོ་ཊ་ཉིན་སློབ་དང་དེའི་ཁྱབ་ཁོངས་ཀྱི་སློབ་ཁག་གསུམ་བཅས་ལ་གོ་རྟོགས་རིམ་པ་སྤེལ་གནང་ཡོད་པ་དང་། དེ་ནས་ཟླ་ ༡༡ ཚེས་ ༡༨ ནས་ ༢༣ བར་སྦེལ་ཀོབ་སི་ཝི་པི་སཾབྷོ་ཊ་སློབ་གྲྭའི་ནང་ལའང་གོ་རྟོགས་རྒྱ་གང་ཆེ་སྤེལ་གནང་ཡོད། ཕྱི་ཚེས་ ༡༧ རེས་གཟའ་ཉི་མའི་སྔ་དྲོ་ཆུ་ཚོད་གཅིག་དང་ཕྱེད་ཀའི་རིང་ལུགས་བསམ་དང་བདེ་སླར་གཞིས་ཆགས་གཉིས་ཀྱི་ནང་ཡོད་པའི་ཕྲུ་གུའི་ཕ་མ་གྲངས་ ༨༠ ཙམ་ལ་ཕྲུ་གུ་གསོ་སྐྱོང་བྱེད་སྟངས་དང་ཡ་རབས་བཟང་སྤྱོད་སློབ་གསོ་དགོས་གལ་སྐོར་གསུང་བཤད་དང་དྲི་བ་དྲིས་ལན་བཅས་ཀྱི་བརྒྱུད་ནས་གོ་རྟོགས་གང་ལེགས་སྤེལ་གནང་ཐུབ་པ་བྱུང་ཡོད།
ཟླ་ ༡༡ ཚེས་ ༢༥ ནས་ ༣༠ བར་ཧུན་སུར་རབ་རྒྱས་གླིང་གི་སཾབྷོ་ཊ་སློབ་གྲྭར་བཞུགས་ནས་དགེ་སློབ་ཡོངས་ལ་གོ་རྟོགས་སྤེལ་གནང་ཡོད་པ་དང་། ཟླ་ ༡༢ ཚེས་ ༢ ནས་ ༧ བར་ཀོ་ལེ་གྷལ་དོན་ལྡན་གླིང་གི་སཾབྷོ་ཊ་སློབ་གྲྭར་གོ་རྟོགས་སྤེལ་རྒྱུའི་འཆར་གཞི་ཡོད་ཀྱང་སློབ་གྲྭའི་ཡིག་རྒྱུགས་འཁེལ་ཡོད་སྟབས་ཟླ་ ༡༢ ཚེས་ ༡༡ དང་ ༡༢ ཉིན་གཉིས་རིང་དགེ་སློབ་ཡོངས་ལ་གོ་རྟོགས་གང་ལེགས་སྤེལ་གནང་ཡོད།
སློབ་ཁག་བརྒྱད་ནས་སློབ་གྲྭ་བཞི་ནས་བསམ་ཚུལ་འགེངས་ཤོག་བསྡུ་རུབ་ཞུས་པར། གོ་རྟོགས་ལས་རིམ་འདིས་སློབ་ཕྲུག་གི་ནུས་པ་སྐྱེས་འཕེལ་དང་གསོ་སྐྱོང་ཙམ་གྱི་ཆེད་དུ་མིན་པར་དགེ་རྒན་རང་ཉིད་ཀྱི་བསམ་བློ་འཁྱེར་སོའམ་སྒོ་གསུམ་གྱི་སྤྱོད་པ་ཉམས་ལེན་བྱེད་སྟངས་སོགས་ལ་ཕན་རླབས་ཆེན་པོ་བྱུང་ཡོད་པ་དང་། དེ་བཞིན་སློབ་ཕྲུག་ཚོ་ལའང་ཕན་ཐོགས་ཆེན་པོ་བྱུང་ཡོད་པ་གསལ་འདོན་གནང་འདུག
གོ་རྟོགས་ལས་རིམ་འདི་ལ་ཕཱ་རེཎ་སིའི་རོགས་ཚོགས་ Fonds De Dotation Mon Kontan Ou ནས་རོགས་དངུལ་མཐུན་འགྱུར་གནང་ཡོད་པ་བཅས། །
