༢༠༡༩ ཟླ་ ༡༢ ཚེས་ ༢༥ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ལོའི་བོད་རྒྱ་ཞི་མོལ། ཞེས་པའི་བརྗོད་གཞིའི་འོག རྒྱ་རིགས་ཤེས་ལྡན་མི་སྣ་དང་མང་གཙོ་དོན་གཉེར་བ་སོགས་ཀྱི་གཙོས་རྒྱ་རིགས་འཐུས་ཚབ་པ་སུམ་ཅུ་ཙམ་མཉམ་འཛོམས་ཐོག་གསར་འགོད་གསལ་བསྒྲགས་ཤིག་སྤེལ་བ་དང་། རྒྱ་ནག་གཞུང་གིས་༸གོང་ས་ཏཱ་ལའི་བླ་མི་མཆོག་གི་༸སྐུའི་ཡང་སྲིད་ཀྱི་གནད་དོན་ཐག་གཅོད་ཞུ་རྒྱུའི་ཐད་ཐེ་ཇུས་བྱེད་བཞིན་པ་དེར་ངོས་ལེན་མེད་པའི་དོན་ཚན་བཞི་ཅན་གྱི་གསལ་བསྒྲགས་སྤེལ་འདུག
ཨ་རིའི་གྲོང་ཁྱེར་ནིའུ་ཡོག་ཏུ་ཚོགས་པའི་ལས་རིམ་དེའི་སྐབས། རྒྱ་ནག་གི་དཔྱིད་ཀ་དུས་དེབ་ཀྱི་རྩོམ་སྒྲིག་པ་ཟུར་བ་སྐུ་ཞབས་ཧཱོ་ཕཱེན་དང་། རྒྱ་རིགས་མང་གཙོ་དོན་གཉེར་བའི་ཚོགས་གཙོ་སྐུ་ཞབས་ཁྲིན་པོ་ཁཱོང་སོགས་ཀྱིས་གཙོས་རྒྱ་རིགས་ཀྱི་ཤེས་ལྡན་མི་སྣ་སུམ་ཅུ་ཙམ་ལྷན་འཛོམས་ཐོག བོད་ཀྱི་༸གོང་ས་༸སྐྱབས་མགོན་ཏཱ་ལའི་བླ་མི་མཆོག་གི་སྐུའི་ཡང་སྲིད་ཀྱི་གནད་དོན་དེ་ནི་ཆོས་ལུགས་ཀྱི་བྱེད་སྒོ་དང་འབྲེལ་བ་ཡོད་པ་ཞིག་ཡིན་པར་བརྟེན། གནད་དོན་དེ་ནི་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་སྐུ་སྒེར་དང་། བོད་མི་མང་ཚོགས་ཀྱིས་ཐག་གཅོད་ཞུ་རྒྱུ་ལས་རྒྱ་ནག་དམར་ཤོག་སྲིད་གཞུང་ལ་ཐེ་བྱུས་རྩ་བ་ནས་མེད་སྐོར་བསྒྲགས་འདུག
རྒྱ་ནག་དམར་ཤོག་སྲིད་གཞུང་གིས་ཆོས་དད་ནི་རྨོངས་ཞེན་དུ་བརྩི་བ་མ་ཟད། ༸གོང་ས་ཏཱ་ལའི་བླ་མ་མཆོག་བདུད་རེད། ཅེས་མཚན་དམས་ཧ་ཅང་ཞུ་བཞིན་དུ་ཁོང་གི་ཡང་སྲིད་ལ་ཐེ་བྱུས་བྱེད་བཞིན་པ་དེ་ནི་རྒྱུ་མཚན་དང་རྩ་བ་ནས་མི་ལྡན་ཞིང་བཞད་གད་སློང་བའི་བྱ་སྤྱོད་ཁོ་ན་ཡིན་པ་དང་། ལྷག་པར་རྒྱ་ནག་གཞུང་གིས་༸རྒྱལ་བའི་ཡང་སྲིད་ལ་ཐེ་བྱུས་བྱས་པ་དེས་བོད་མིའི་ཆོས་དད་རང་དབང་གི་ཐོབ་ཐང་ལ་བརྩི་མེད་རྡོག་རོལ་བཏང་བ་ཞིག་ཡིན་སྟབས་རྒྱ་ནག་གཞུང་གིས་༸རྒྱལ་བའི་ཡང་སྲིད་ཀྱི་གནད་དོན་ལ་ཐེ་གཏོགས་བྱས་པ་ནི་ཁྲིམས་འགལ་ཡིན་པ་འཁོད་འདུག
གཞན་ཡང་ཐེངས་འདིར་རྒྱ་རིགས་ཚོས་བོད་མིའི་གཞི་རྩའི་འགྲོ་བ་མིའི་ཐོབ་དང་རིག་གཞུང་སྲུང་སྐྱོབ། ཆོས་ལུགས་དད་མོས་རང་དབང་། ཁོར་ཡུག་སྲུང་སྐྱོབ་བཅས་ལ་རྒྱབ་སྐྱོར་གནང་བ་མ་ཟད། དེ་བཞིན་སྤྱི་ནོར་༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གི་དགོངས་དོན་ལྟར། བོད་རྒྱ་གཉིས་ཕན་གྱི་དབུ་མའི་ལམ་གྱི་སྲིད་བྱུས་ལ་རྒྱབ་སྐྱོར་ཡོད་པ་འཁོད་འདུག ༸གོང་ས་༸སྐྱབས་མགོན་ཏཱ་ལའི་བླ་མ་མཆོག་གིས་དགོངས་བཞེད་ལྟར། བོད་རྒྱ་མཛའ་འབྲེལ་གོང་འཕེལ་གཏོང་རྒྱུའི་ལས་གཞིར་རྒྱབ་སྐྱོར་དང་གུས་བརྩི་ཞུ་བཞིན་ཡོད་པ་དང་། བོད་རྒྱ་གཉིས་ནི་ལོ་རྒྱུས་ཐོག་ནས་མཛའ་འབྲེལ་དམ་ཟབ་ཡོད་སྟབས་ཚོགས་ཞུགས་པ་ཚོས་ལོ་རྒྱུས་ཀྱི་མཛའ་འབྲེལ་དེ་མུ་མཐུད་རྒྱུན་སྲིང་ཐོག་འབད་བརྩོན་ཞུ་རྒྱུ་ཡིན་པ་སོགས་ཀྱི་དོན་ཚན་བཞི་ཡོད་འདུག
སྐབས་དེར་བྱང་ཨ་རི་སྐུ་ཚབ་དོན་གཅོད་དངོས་གྲུབ་ཚེ་རིང་ལགས་ཀྱིས། རྒྱ་ནག་དམར་པོའི་གདུག་རྩུབ་ཅན་གྱི་སྲིད་བྱུས་འོག་དཀའ་སྡུག་ཧ་ཅང་མྱངས་དང་མྱོང་བཞིན་པའི་བོད་མི་དང་ཡུ་གུར་མི་རིགས། དེ་བཞིན་ཧོང་ཀོང་མི་མང་སོགས་ཀྱིས་མཉམ་རུབ་ཐོག་ནས་ལས་འགུལ་མང་ཙམ་སྤེལ་དགོས་པ་མ་ཟད། སྔར་བས་འབད་བརྩོན་ཤུགས་ཆེ་རུ་བཏང་ནས་མུ་མཐུད་གདོང་ལེན་བྱེད་དགོས་པ་དང་། ལྷག་པར་རྒྱལ་སྤྱིའི་སྡིངས་ཆའི་སྟེང་འཐབ་རྩོད་ལ་རྒྱལ་ཁ་ཐོབ་ཐབས་བྱས་ནས་གུང་ཁྲན་སྲིད་གཞུང་ལ་ཁ་གཏད་གཅོག་དགོས་གལ་དང་། དེ་བཞིན་བོད་མིའི་སྒྲིག་འཛུགས་ཀྱི་ངོས་ནས་མི་ལོ་བཞི་བཅུའི་རིང་ལ་དབུ་མའི་ལམ་གྱི་སྲིད་བྱུས་ཐོག་ནས་བོད་རྒྱའི་དཀའ་རྙོག་སེལ་ཐབས་གནང་ཡོད་ཀྱང་རྒྱ་ནག་དམར་ཤོག་སྲིད་གཞུང་གིས་དེར་ཡ་ལན་རྩ་བ་ནས་མ་བྱས་པ་དང་། ད་ཆ་བོད་རྒྱ་མཛའ་འབྲེལ་ཚོགས་པ་དེ་ཤུགས་ཆེ་རུ་གཏོང་དགོས་བའི་འབོད་སྐུལ་ཡང་གནང་འདུག ལྷག་པར་ཉེ་ལམ་རྒྱ་ནག་ནང་གི་ཧྥོ་ཊན་གཙུལ་ལག་སློབ་གྲྭའི་ Fudan University ནང་བསམ་བློའི་རང་དབང་དགོས་པའི་ལས་འགུལ་དེ་ལུང་འདྲེན་གནང་ནས་རྒྱ་ནག་གི་གནས་སྟངས་སྐོར་ཡང་གསུང་པ་བཅས།།
