ཕྱི་ལོ་ ༢༠༡༩ ཟླ་ ༡༢ ཚེས་ ༡༡ རེས་གཟའ་ལྷག་པ། 

༄༅། །འདི་གར་རྡོར་གླིང་ས་གནས་འགོ་འཛིན་ལས་ཁུངས་ནས་བཏང་གནས་ནང་འཁོད་དོན། ཕྱི་ལོ་ ༢༠༡༩ ཟླ་ ༡༢ ཚེས་ ༡༠ རེས་གཟའ་མིག་དམར་ཉིན་ལྷར་བཅས་སྲི་ཞིའི་གཙུག་རྒྱན་ཁམས་གསུམ་ཆོས་ཀྱི་རྒྱལ་པོ།  བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་སྦེལ་ཞི་བདེའི་གཟེངས་རྟགས་འབུལ་བཞེས་མཛད་ནས་ལོ་ངོ་ ༣༠ འཁོར་བའི་དུས་ཆེན་ཁྱད་པར་ཅན་རྡོར་གླིང་ས་གནས་སུ་སྲུང་བརྩི་ཞུས་འདུག 

སྐབས་དེར་མཛད་སྒོའི་སྐུ་མགྲོན་གཙོ་བོར་སམ་བྷོ་ཊའི་སྤྱི་ཁྱབ་འགན་འཛིན་རྣམ་རྒྱལ་ཡར་འཕེལ་ལགས་ཕེབས་པ་དང་།  དེ་ཡང་གོང་ཚེས་ཉིན་གྱི་སྔ་དྲོར་ས་གནས་མི་མང་བརྟན་ཁང་ནས་འབྲུག་གསང་སྔགས་ཆོས་གླིང་དགོན་པའི་བར་དགེ་འདུན་པ་ཚོས་སེར་སྦྲེངས་བསྟར་སྒྲིགས་ཀྱིས་སྐུ་པར་མཐོང་གྲོལ་རིན་པོ་ཆེ་རྡོར་གླིང་ཁྲོམ་སྒོ་ལ་མཆིས་པའི་ཆོ་ར་སི་ཏ་ Chawrasta བར་བཞུགས་ཁྲིར་མངའ་གསོལ་ཞུས་ཏེ་མཛད་སྒོ་དངོས་གཞི་འགོ་འཛུགས་གནང༌།

མཛད་སྒོའི་སྐབས་ས་གནས་འགོ་འཛིན་བསྟན་འཛིན་ནོར་ལྡན་ལགས་ཀྱིས་དཔལ་ལྡན་བཀའ་ཤག་གི་གསུང་འཕྲིན་དང་ས་གནས་རང་བདེན་ཚོགས་དྲུང་ཡེ་ཤེས་ལགས་ནས་དཔལ་ལྡན་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་སྒྲོགས་སྦྱང་གནང་རྗེས་སྐུ་མགྲོན་གཙོ་བོ་སམ་བྷོ་ཊ་སྤྱི་ཁྱབ་འགན་འཛིན་ལགས་ཀྱིས་མང་ཚོགས་ལ་བོད་ཀྱི་སྐད་ཡིག་དང་རིག་གཞུང་སྲུང་སྐྱོབ་གནང་དགོས་སྐོར་སོགས་ཀྱི་གསུང་བཤད་གནང་། ས་གནས་བོད་རིགས་མི་མང་ཡོངས་ནས་རྟེན་འབྲེལ་མཚོན་བྱེད་གཞས་སྣ་ཁག་གཟིགས་འབུལ་ཞུས་ཡོད།

དེ་ཉིན་མི་མང་ཁྱོན་བསྡོམས་ཁྲི་གཅིག་ལྷག་མཉམ་ཞུགས་གནང་ཡོད། ཉིན་རྒྱབ་རྡོར་གླིང་བོད་ཀྱི་འཇམ་དབྱངས་རིག་གཞུང་གཅེས་འཛིན་ཁང་གི་མཐུན་འགྱུར་འོག་ཡུལ་སྐོར་སྤྲོ་འཆམ་པ་སྟོང་ཙམ་ལ་༸གོང་ས་༸སྐྱབས་མགོན་ཆེན་པོ་མཆོག་གི་མཛད་རྣམ་དང་རྒྱ་གར་གཞུང་མང་ལ་ཐུགས་རྗེ་ཆེ་ཞུའི་བརྙན་འཕྲིན་བསྟན་འདུག་པ་བཅས། །