ཕྱི་ལོ་ ༢༠༡༩ ཟླ་ ༡༡ ཚེས་ ༢༡ རེས་གཟའ་ཕུར་བུ།
༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༨ ཉིན་ཨ་རིའི་གྲོས་ཚོགས་འཐུས་མི་སྐུ་ཞབས་ཇེམ་སི་པི་མེཀ་གོ་ཝན་ James P. McGovern མཆོག་དང་ཨ་རིའི་གྲོས་ཚོགས་འཐུས་མི་སྐུ་ཞབས་ཁི་རི་སི་ཊོ་ཕར་སི་མི་ཐི་ Christopher H. Smith མཆོག་གིས་ཨ་རིའི་རྒྱལ་ས་ཝ་ཤིན་ཊོན་དུ་རྟེན་གཞི་བྱས་པའི་བལ་ཡུལ་གཞུང་ཚབ་ཁང་གི་གཞུང་ཚབ་ཆེན་མོ་ཨར་ཇུན་ཀུ་མར་ཀར་ཀི་ H.E.Dr. Arjun Kumar Karki ལགས་ཀྱི་མཚན་ཐོག་ཏུ་ཡི་གེ་ཞིག་ཕུལ་ཡོད་པ་དང་། ཡི་གེ་དེའི་ནང་དོན་གཙོ་བོ་ནི། བལ་ཡུལ་གཞུང་གིས་བལ་ཡུལ་ནང་གནས་སྡོད་བོད་མི་ཚོའི་འགྲོ་བ་མིའི་ཐོབ་ཐང་ལ་སྲུང་སྐྱོབ་བྱེད་དགོས་པ་མ་ཟད། འདི་ལོ་ཕྱི་ཟླ་ ༩ ནང་བོད་ནས་བོད་མི་དྲུག་བལ་ཡུལ་བརྒྱུད་བཙན་བྱོལ་དུ་ཕེབས་སྐབས། བལ་ཡུལ་གཞུང་གིས་རྒྱ་ནག་ལ་ཕྱིར་སློག་བཏང་བ་དེ་ནི་བལ་ཡུལ་གྱི་རྒྱལ་སྤྱིའི་སྐྱབས་བཅོལ་བའི་ཁྲིམས་ལ་རྩིས་མེད་རྡོག་རོལ་བཏང་བ་ཞིག་ཡིན་སྟབས་ཐུགས་འཚབ་ཡོད་སྐོར་དང་།
གཞན་ཡང་འདི་ལོ་ཕྱི་ཟླ་ ༡༠ ནང་རྒྱ་ནག་གི་སྲིད་འཛིན་ཞི་ཅིན་ཕིང་ Xi Jinping བལ་ཡུལ་ནང་ཡོང་སྐབས། བལ་ཡུལ་གཞུང་གིས་བལ་ཡུལ་ནང་གི་བོད་མིའི་ཐོག་དམ་བསྒྲགས་དང་། བལ་ཡུལ་དང་རྒྱ་ནག་དབར་ཉེས་འཛུགས་མི་སྣ་ཕྱིར་སྤྲོད་བྱ་རྒྱུའི་ཆིངས་ཡིག་མི་འཇོག་པའི་སྐོར། དེ་བཞིན་བལ་ཡུལ་ནང་གི་བོད་མི་ཚོའི་འདུ་འཛོམས་རང་དབང་དང་སྨྲ་བརྗོད་རང་དབང་སོགས་ཀྱི་ཐད་ལ་བལ་ཡུལ་གཞུང་གིས་དམ་བསྒྲགས་བྱས་དང་བྱེད་བཞིན་པར་ཐུགས་འཚབ་ཡོད་སྐོར། ཨ་རིའི་གྲོས་ཚོགས་འཐུས་མི་རྣམ་པས་བལ་ཡལ་གཞུང་ལ་བལ་ཡུལ་གཞུང་གིས་བལ་ཡུལ་གྱི་རྒྱལ་སྤྱིའི་སྐྱབས་བཅོལ་བའི་ཁྲིམས་ལ་རྩི་སྲུང་གནང་སྟེ་བལ་ཡུལ་ནང་གི་བོད་མི་ཚོ་རྒྱ་ནག་ལ་ཕྱིར་སློག་མི་བྱ་རྒྱའི་འབོད་སྐུལ་ཞུས་འདུག
སྐུ་ཞབས་ཇེམ་སི་པི་མེཀ་གོ་ཝན་མཆོག་དང་སྐུ་ཞབས་ཁི་རི་སི་ཊོ་ཕར་སི་མི་ཐི་མཆོག་རྣམ་གཉིས་ཨ་རིའི་གྲོས་ཚོགས་འོག་མའི་ཊོམ་ལན་ཊོ་སི་འགྲོ་བ་མིའི་ཐོབ་ཐང་རྟོག་ཞིབ་ཚོགས་ཆུང་ Tom Lantos Human Rights Commission གི་ཟུང་སྦྲེལ་ཚོགས་གཙོ་ཡིན་ཞིང་། ཁོང་རྣམ་གཉིས་དང་ལྷན་ཨ་རིའི་གྲོས་ཚོགས་འཐུས་མི་སྐུ་ཞབས་ཨི་ལོ་ཡི་ཊི་ཨེལ་ཨེན་ཇེལ་ Eliot L. Engel མཆོག་དང་། ཨ་རིའི་གྲོས་ཚོགས་འཐུས་མི་ཝན་བྷུ་ཁ་ནན་ Vern Buchanan མཆོག ཨ་རིའི་གྲོས་ཚོགས་འཐུས་མི་མ་ཡི་ཁེལ་ Michael T. McCaul མཆོག ཨ་རིའི་གྲོས་ཚོགས་འཐུས་མི་ལྕམ་སྐུ་པར་མི་ལཇ་ཡ་པཱལ་ Pramila Jayapal མཆོག
ཨ་རིའི་གྲོས་ཚོགས་འཐུས་མི་སྐུ་ཞབས་སི་ཊི་ཝི་ཅཱ་བྷོ་ཊ་ Steve Chabot མཆོག ཨ་རིའི་གྲོས་ཚོགས་འཐུས་མི་སྐུ་ཞབས་ཌེ་ཝི་ཌི་པི་ར་ཡི་སི་ David Price མཆོག་བཅས་ནས་མཚན་རྟགས་བཀོད་དེ་རྒྱབ་སྐྱོར་གནང་ཡོད་པ་བཅས། །
