ཕྱི་ལོ་ ༢༠༡༩ ཟླ་ ༡༡ ཚེས་ ༢༧ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་བ་ ༡༡ ཚེས་ ༢༧ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཝི་ཏི་ནམ་དད་ལྡན་སེར་སྐྱ་ཕོ་མོ་མི་གྲངས་ ༤༠ ཙམ་ལ་མཇལ་ཁ་དང་སྤྱན་རས་གཟིགས་ཀྱི་གཟུངས་སྔགས་མ་ཎི་ཡིག་དྲུག་གི་ལྗགས་ལུང་སྩལ་དོན། ཨ། ཨུ། མ། ཡི་གེ་གསུམ་ཡོད། དེ་གསུམ་གྱིས་ལུས་ངག་ཡིད་གསུམ་མཚོན་བཞིན་ཡོད། གང་ཟག་ཟེར་བ་དེ་ལུས་ངག་ཡིད་གསུམ་ལ་བརྟེན་ནས་བཏགས་པ་ཞིག་ལ་ཟེར་བ་རེད། ཝི་ཏི་ནམ་ལུས་པོར་བརྟེན་པར་བརྟེན་ཝི་ཏི་ནམ་གྱི་མི་རེད་ཅེས་ཟེར་བ་རེད། ངོས་རང་བོད་པ་རེད། བོད་པའི་ལུས་ལ་བརྟེན་པ་དེར་བོད་པ་ཟེར་བ་རེད། དེར་བརྟེན་ངའམ་གང་ཟག་ཟེར་བའི་གང་ལ་བརྟེན་ནས་བཏགས་པའི་གཞི་འདི་ལུས་ངག་ཡིད་གསུམ་པོ་དེ་རེད། ལུས་ངག་ཡིད་གསུམ་དང་། ལྷག་པར་ཡིད་ཀྱི་སྟེང་ནས་ཉོན་མོངས་པའི་གཞན་དབང་དུ་གྱུར་བ་དེ་སྲིད་དུ་ཁོར་བ་པ་ཟེར་བ་རེད། ཉོན་མོངས་ལ་གཉེན་པོ་བསྟེན་ནས་སྤངས་པའི་རྗེས་སུ་ཐར་པ་ཐོབ་པ་ཟེར་བ་རེད། བྱང་ཆུབ་སེམས་ཀྱིས་བཟུང་ཡོད་ན་འཕགས་པའི་གང་ཟག་གམ་བྱང་སེམས་འཕགས་པ་ཟེར་བ་རེད།
དེར་བརྟེན་མ་དག་པའི་ལུས་ངག་ཡིད་གསུམ་པོ་དེ་ལམ་བསྒོམས་ནས་དག་པའི་ལུས་ངག་ཡིད་གསུམ་འགྱུར་ཡག་ལ་མ་ཎི་པདྨེ་རེད། མ་ཎིས་བྱང་ཆུབ་སེམས་མཚོན་བཞིན་ཡོད། པདྨེས་སྟོང་ཉིད་རྟོགས་པའི་རྟེན་འབྱུང་གི་ལྟ་བ་བཤད་ཀྱི་ཡོད། ཧཱུྃ་ཟེར་བས་དེ་ཉིད་དབྱེར་མི་ཕྱེ་བ་མཚོན། ཐབས་ཀྱིས་ཟིན་པའི་ཤེས་རབ། ཤེས་རབ་ཀྱིས་ཟིན་པའི་ཐབས་བཤད་ཀྱི་ཡོད། དེ་ལྟ་བུའི་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཟུང་དུ་འབྲེལ་ནས་ཉམས་ལེན་བྱས་པ་ཡིན་ན་མཐར་མ་དག་པའི་ལུས་ངག་ཡིད་གསུམ་པོ་དེ་འགྱུར་ནས་སངས་རྒྱས་ཀྱི་སྐུ་གསུང་ཐུགས་གསུམ་ཆགས་པ་རེད། དེར་བརྟེན་ཨོཾ་མ་ཎི་པདྨེ་ཧཱུྃ་ཟེར་བའི་དོན་འདི་རེད། ཁྱེད་ཚོས་མ་ཎི་གསོག་སྐབས་གཙོ་བོ་སྟོང་ཉིད་ལྟ་བ་དང་བྱང་ཆུབ་སེམས་དེར་གང་ཐུབ་བསམ་བློ་གཏོང་དགོས། དེའི་ལམ་ནས་མ་ཎི་བགྲངས་པ་ཡིན་ན་དོན་དང་ལྡན་པ་ཞིག་ཆགས་རྒྱུ་རེད། དེ་མིན་ནེ་ཙོས་ཀྱང་མ་ཎི་བཏོན་པ་རེད། སྔ་མོ་ངོས་རང་ལྷ་སར་ཡོད་སྐབས་ནེ་ཙོ་ཞིག་ཡོད་པ་དེས་མ་ཎི་ཡག་པོ་བཏོན་པ་རེད། འོན་ཀྱང་དོན་དག་ཤེས་རྒྱུ་མ་རེད། ཅེས་བཀའ་སློབ་སྩལ་འདུག །
