ཕྱི་ལོ་ ༢༠༡༩ ཟླ་ ༡༡ ཚེས་ ༢༠ རེས་གཟའ་ལྷག་པ།
༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༡༩ ཉིན་གྱི་སྔ་དྲོ་ཆུ་ཚོད་ ༧།༣༠ ཙམ་ལ་བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་༸རྒྱལ་བའི་གཟིམ་ཆུང་ཕོ་བྲང་ནས་སྟོན་འཁོར་ཧྲག་བསྡུས་བཅས་རྒྱ་གར་གྱི་རྒྱལ་ས་ལྡི་ལི་དང་། དེ་རྗེས་མཧཱ་ར་ཤི་ཀྲ་མངའ་སྡེའི་གྲོང་ཁྱེར་ཨོ་རང་གྷ་བྷཌ་ནང་རླབས་ཆེན་གྱི་མཛད་འཕྲིན་བསྐྱང་ཆེད་ག་གྷལ་གནམ་ཐང་བརྒྱུད་ལྡི་ལིར་ཆིབས་སྒྱུར་བསྐྱངས་ཡོད།
དེ་ཡང་མཛད་འཆར་ལྟར་ན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཊུ་ཞི་ཌཱ་སྒོམ་སྒྲུབ་བསྟི་གནས་ཁང་ Tushita Mahayana Meditation Center གིས་ཇི་ལྟར་སྔོན་ནས་གསོལ་བ་བཏབ་པ་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༩ ཟླ་ ༡༡ ཚེས་ ༢༠ ཉིན་གྱི་སྔ་དྲོར་རྒྱ་གར་གྱི་རྒྱལ་ས་ལྡི་ལིར་རྟེན་གཞི་བྱས་པའི་ཀོ་ལམ་བྷ་ St. Columba’s School སློབ་གྲྭ་རུ་ཁོང་ཁྲོ་དང་སེམས་ཁྲལ་ལས་ཐར་བར་བྱེད་པ་ Overcoming Anger and Anxiety ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ་དང་། དེ་བཞིན་ཕྱི་ཚེས་ ༢༡ ཉིན་རྒྱ་གར་གྱི་རྒྱལ་ས་ལྡི་ལིའི་རྒྱ་གར་རྒྱལ་སྤྱིའི་བསྟི་གནས་ཁང་ India International Center དུ་དེ་སྔ་རྒྱ་གར་གྱི་སྲིད་འཛིན་ཨེས་རཱ་དྷ་ཀི་རི་ཤི་ནན་ Dr.S Radhakrishna མཆོག་གི་དྲན་རྟེན་འགྲེམས་སྟོན་མཛད་སྒོ་ཐེངས་ ༢༤ དང་འབྲེལ་ Indian Institute of Advanced Studies ཞེས་པའི་བསྟི་གནས་ཁང་གི་གོ་སྒྲིག་འོག་ཀུན་ཁྱབ་བཟང་སྤྱོད་ Universal Ethics ཞེས་པའི་བརྗོད་གཞིའི་ཐོག་བཀའ་སློབ་སྩལ་རྒྱུ།
ཕྱོགས་མཚུངས་ཕྱི་ཚེས་ ༢༤ ཉིན་རྒྱ་གར་མཧཱ་ར་ཤི་ཀྲ་ Maharashtra མངའ་སྡེའི་གྲོང་ཁྱེར་ཨོ་རང་གྷ་བྷཌ་ Aurangabad ནང་རྟེན་གཞི་བྱས་པའི་ལོ་ཀུ་ཏ་ར་དགེ་སློང་གི་སྡོམ་པའི་སྦྱོང་བརྡར་བསྟི་གནས་ Lokuttara International Bhikkhu Training Center ཞེས་པས་ཇི་ལྟར་གསོལ་འདེབས་ཞུས་དོན་ལྟར་ཁུལ་དེའི་ལུས་སྦྱོང་མཐོ་རིམ་སློབ་གྲྭའི་རྩེད་ཐང་དུ་ནང་ཆོས་སྤྱི་བཤད་ཀྱི་གསུང་ཆོས་བཀའ་དྲིན་སྩལ་རྒྱུ་ཡིན་འདུག་པ་བཅས། །
