ཕྱི་ལོ་ ༢༠༡༩ ཟླ་ ༡༡ ཚེས་ ༡༡ རེས་གཟའ་ཟླ་བ།
༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༡༡ སྔ་དྲོ་ཆུ་ཚོད་ ༨ ནས་ ༩ ཡོལ་ཙམ་བར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཞུགས་སྒར་༸རྒྱལ་བའི་ཕོ་བྲང་དུ་ཨ་རིའི་རྒྱལ་ས་ཝ་ཤིང་ཊོན་ནས་ཡིན་པའི་བྱམས་བརྩེ་གོང་སྤེལ་ཚོགས་པའི་ཚོགས་མི་ཁག་གཅིག་ལ་བཀའ་སློབ་སྩལ་བ་མ་ཟད། བརྙན་འཕྲིན་བརྒྱུད་ཉིན་བརྒྱ་དུས་གཅིག་ཏུ་ཨ་རིའི་མཐོ་སློབ་སོགས་ནས་བཀའ་སློབ་གསན་གཟིགས་གནང་འདུག
སྐབས་དེར་ཐོག་མར་ཚོགས་ཆུང་གི་ཚོགས་གཙོ་ཝ་ཤིང་ཊོན་མངའ་སྡེའི་སྲིད་སྐྱོང་གཞོན་པ་སྐུ་ཞབས་ Cyrus Habib མཆོག་གིས་ཐེངས་འདིར་བཞུགས་སྒར་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་མཇལ་བཅར་ཞུ་དགོས་དོན་སྐོར་ངོ་སྤྲོད་ཞུ་དོན། དེ་རིང་སྐུ་ཉིད་མཆོག་དང་སླར་ཡང་མཇལ་རྒྱུའི་གོ་སྐབས་བྱུང་བར་ཧ་ཅང་དགའ་པོ་བྱུང་། ངས་དེ་རིང་བྱམས་བརྩེ་གོང་འཕེལ་གྱི་སྐུ་ཚབ་ཚོགས་ཆུང་གི་ཚོགས་མི་ཁག་གཅིག་བཞུགས་སྒར་རྡ་རམ་ས་ལར་ཁྲིད་ཡོད། ཁོང་རྣམས་ཝ་ཤིང་ཊོན་མངའ་སྡེ་ནས་རེད། གཞན་ཡང་བརྙན་འཕྲིན་བརྒྱུད་མཐོ་སློབ་དང་བྱམས་བརྩེ་གོང་འཕེལ་བསྟི་གནས་ཁང་ནས་སློབ་ཕྲུག་དང་ལས་འགུལ་བ་སོགས་ཁྱོན་མི་གྲངས་ ༡༥༠༠ ལྷག་གིས་ཐད་ཀར་གསན་གཟིགས་གནང་བཞིན་ཡོད།
ན་ནིང་ལོར་ངས་༸གོང་ས་ཏཱ་ལའི་བླ་མ་སྐུ་ཉིད་མཆོག་མཇལ་བཅར་ཞུ་སྐབས་ཝ་ཤིང་ཊོན་མངའ་སྡེའི་ནང་སྐུ་ཉིད་ཀྱི་བྱམས་བརྩེ་དང་དེང་དུས་ཤེས་ཡོན་ལམ་ལུགས་ནང་བདེ་སྐྱིང་གོང་མཐོར་གཏོང་རྒྱུའི་སློབ་ཚན་འཇོག་དགོས་པའི་ལམ་སྟོན་མཛད་པ་མ་ཟད། ཕྱི་ལོ་ ༢༠༠༨ ལོར་སྐུ་ཉིད་ཝ་ཤིང་ཊོན་དུ་ཆིབས་སྒྱུར་བསྐྱངས་ཡོད། དུས་སྐབས་དེ་ནས་བཟུང་ཝ་ཤིང་ཊོན་མངའ་སྡེའི་ནང་བཟང་ཕྱོགས་ཀྱི་ཤུགས་རྐྱེན་ཧ་ཅང་ཐེབས་ཡོད། སྐུ་ཉིད་མཆོག་གི་བཀའ་སློབ་དགོངས་དོན་ལྟར་ད་ཆ་མངའ་སྡེའི་ནང་བྱམས་བརྩེའི་ཉམས་ལེན་ཐོག་སློབ་སྦྱོང་བྱ་རྒྱུའི་སློབ་ཡོན་གསར་གཏོད་ཀྱིས་སློབ་ཕྲུག་དྲུག་ལ་སློབ་ཡོན་ཐོབ་པ་དང་། ཁོང་རྣམས་འདིར་ཚོགས་བཅར་བའི་གྲས་སུ་བཅར་ཡོད།
ཕྱོགས་མཚུགས་མགོན་པོ་གང་ཉིད་ཀྱི་དབུ་ཁྲིད་ལམ་སྟོན་འོག སི་ཡ་ཊལ་ Seatle ནང་གི་ཌེ་ནི་སློབ་འབྲིང་ Denny International Middle School ནང་སྤྱི་ཚོགས་དང་། སེམས་མྱོང་། བཟང་སྤྱོད་ Social, Emotional and Ethical Learning བཅས་ཀྱི་ཤེས་ཡོན་སློབ་གསོ་སློབ་ཚན་དུ་བཞག་ཡོད། ཅེས་སོགས་ངོ་སྤྲོད་ཞུས་འདུག
དེ་རྗེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས། ང་ཚོ་ཆུང་བྱིས་པ་ལོ་ན་དྲུག་བདུན་སྐབས་མིའི་ལྷན་སྐྱེས་བྱམས་བརྩེའི་རང་བཞིན་དེ་ཧ་ཅང་མངོན་གསལ་དོད་པོ་ཡོད་ཀྱང་། རིམ་བཞིན་ནར་སོན་ནས་སློབ་གྲྭར་འགྲོ་སྐབས་མི་ཚེ་བདེ་སྐྱིད་ལྡན་པ་ཞིག་དང་སྤྱི་ཚོགས་བདེ་ཞིང་སྐྱིད་པ་ཞིག་དགོས་ན།གཙོ་བོ་སེམས་པ་བཟང་པོ་བྱེད་དགོས་རྒྱུ་ཧ་ཅང་གལ་ཆེན་པོ་ཡིན་པའི་བསླབ་བྱ་དེ་དག་མ་ལྡེང་པ་དང་། ད་ཆ་ཚན་རིག་པས་ཀྱང་བྱམས་བརྩེ་དང་སེམས་ཀྱི་ཞི་བདེ་ནི་ལུས་པོའི་ནད་འགོག་བྱེད་ཀྱི་ལུས་ཟུངས་སྐྱེ་འཕེལ་ལའང་འབྲེལ་བ་ཧ་ཅང་ཡོད་པ་དང་། སྔོན་འགྲོ་དང་སློབ་གྲྭའི་ནང་ལུས་པོའི་འཕྲོད་བསྟེན་ཧ་ཅང་གལ་ཆེན་པོ་ཡིན་པའི་སློབ་གསོ་སྤྲད་པ་དང་ཆབས་ཅིག ད་ཆ་སེམས་མྱོང་དང་འབྲེལ་བའི་བསམ་བློའི་འཕྲོད་བསྟེན་ཐོག་ལའང་དོ་སྣང་བྱེད་དགོས་པ་ཧ་ཅང་གལ་ཆེན་པོ་ཡིན་སྐོར་སོགས་ཀྱི་རླབས་ཆེན་གྱི་མཛད་ཁུར་དང་པོའི་སྐོར་བཀའ་སློབ་སྩལ།
དེ་ནས་ཆོས་ལུགས་མཐུན་སྒྲིལ་སྐོར་བཀའ་སློབ་སྩོལ་སྐབས། ཆོས་ལུགས་ཕན་ཚུན་ལྟ་གྲུབ་ཡོད་མེད་ཁྱད་ཡོད་ཀྱང་གཞི་རྩའི་བྱམས་པ་དང་བརྩེ་བ། བཟོད་བསྲན། རང་ཁྲིམས་རང་སྲུང་། ཆོག་ཤེས་སོགས་བཟང་པོའི་བསླབ་བྱ་དེ་དག་གཅིག་མཚུངས་སུ་ཡོད་སྐོར་སོགས་ཀྱི་བཀའ་སློབ་སྩལ།
ཕྱོགས་མཚུངས་བོད་ཀྱི་ཆོས་དང་རིག་གཞུང་། སྐད་ཡིག ཁོར་ཡུག་སྲུང་སྐྱོབ་སྐོར་བཀའ་སློབ་སྩལ། དེ་ནས་མགོན་པོ་གང་ཉིད་མཆོག་གིས་རྒྱ་གར་ནང་དཔལ་ནཱ་ལེནྡྲ་ནས་དར་བའི་སེམས་ཁམས་རིག་པ་དང་ལྟ་གྲུབ་སྐོར་བཀའ་སློབ་སྩལ་བ་དང་སྦྲགས། ད་ཆ་རྒྱ་གར་རང་གི་ནང་སྲོལ་རྒྱུན་རིག་གནས་དེ་དག་བསྐྱར་གསོ་མཛད་ཐབས་མཛད་པའི་སྐོར་བཀའ་སློབ་སྩལ་འདུག
ཐེངས་འདིར་བཀའ་སློབ་ཁག་སི་ཡ་ཊལ་མཐོ་སློབ་ Seattle University དང་། ཝིཌ་མེན་མཐོ་སློབ། Whitman College དེ་བཞིན་Evergreen State College (Tacoma) མཐོ་སློབ་སོགས་དང་། ཕྱོགས་མཚུངས་སྒྱུ་རྩལ་བསྟི་གནས་ཁང་ Edmonds Center for the Arts དང་། ཊེམ་པལ་ཌི་ཧིརཤི་སི་ན་ཡི་ Temple De Hirsch Sinai བཅས་ནས་ཐད་གཏོང་གནང་འདུག །
