ཕྱི་ལོ་ ༢༠༡༩ ཟླ་ ༡༡ ཚེས་ ༥ རེས་གཟའ་མིག་དམར།
༄༅། །སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀོ་རི་ཡའི་དད་ལྡན་ཆོས་ཞུ་བ་ཁག་གཅིག་གིས་ཇི་ལྟར་སྔོན་ནས་གསོལ་འདེབས་ཞུས་དོན་ལྟར་བཀའ་བཞེས་བཟང་པོ་སྨིན་སྩལ་ཐོབ་སྟེ། ཕྱི་ལོ་ ༢༠༡༩ ཟླ་ ༡༡ ཚེས་ ༤ ནས་ ༦ བར་ཉིན་གྲངས་གསུམ་རིང་མགོན་པོ་གང་ཉིད་མཆོག་གིས་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་ཀོ་རི་ཡ་གཙོ་བོར་གྱུར་བའི་ཕྱི་ནང་གི་དད་ལྡན་མི་མང་རྣམས་ལ་ཤེས་རབ་སྙིང་པོ་དང་ལམ་གཙོ་རྣམ་གསུམ་གྱི་ཆོས་འབྲེལ་ཉིན་གཉིས་པ་དབུ་འཛུགས་མ་མཛད་གོང་བཀའ་སློབ་སྩལ་དོན།
དེ་རིང་ཀོ་རི་ཡའི་ཆོས་གྲོགས་ཚོ་ལ་ཆོས་འབྲེལ་ཉིན་གཉིས་པ་དེ་ཞུ་རྒྱུ་རེད། ཤྲི་ལངྐ་དང་། འབར་མ། ཐའི་ལེནྜི། ཁེམ་བྷོ་ཌི་ཡ། རྒྱ་ནག ཉི་ཧོང་། ཀོ་རི་ཡ། སོག་པོ། བོད། ཨུ་རུ་སུའི་ཁོངས་ནས་ཨུ་རུ་སུ་སྤྱི་མཐུན་རྒྱལ་ཁབ་ཁ་ཤས་ཡོད་པའི་ཤར་ཕྱོགས་ལུང་པ་དེ་དག་ཧ་ལམ་ཡོངས་སུ་རྫོགས་པ་ནང་པའི་ཆོས་བྱེད་མཁན་རེད། ང་ཚོས་ནང་པ་གསར་དུ་བྱས་པའི་སྐད་ཆ་མ་རེད། ཕ་མེས་ནས་ནང་པ་ཆགས་ཡོད། གལ་ཆེ་ཤེས་ནི་སངས་རྒྱས་པའི་ཆོས་ནི་རྒྱུ་མཚན་ལ་བརྟེན་ནས་སེམས་ལ་བསྒྱུར་བ་གཏོང་རྒྱུ་རེད།
དེར་བརྟེན་སངས་རྒྱས་པའི་ཆོས་ཉམས་ལེན་བྱེད་མཁན་ཞིག་གིས་སློབ་སྦྱོང་བྱེད་དགོས་རྒྱུ་ཧ་ཅང་གལ་ཆེན་པོ་རེད་འདུག ཤར་ཕྱོགས་ལུང་པ་དེ་དག་ཕ་མེས་ནས་ནང་པ་ཡིན་ནའང་ནང་ཆོས་དེ་གཙོ་ཆེར་སྨོན་ལམ་རྒྱག་རྒྱུ་གཙོ་བོ་བྱས་པ་མ་གཏོགས་ནང་པའི་གཞུང་ལ་སློབ་སྦྱོང་བྱེད་རྒྱུའི་ཐོག་དེ་ཙམ་དོ་སྣང་མེད་པ་ལྟ་བུ་ཞིག་འདུག
ངོས་ཀྱིས་དུས་རྒྱུན་དུ་ད་ཆ་ང་ཚོས་དུས་རབས་ཉེར་གཅིག་པའི་ནང་པ་ཞིག་བྱེད་དགོས། ཞེས་ཤོད་ཀྱི་ཡོད། དུས་རབས་ཉེར་གཅིག་པའི་ནང་པ་ཟེར་ན་ནང་ཆོས་ལ་དད་པ་ཙམ་མ་ཡིན་པར་སློབ་སྦྱོང་བྱས་ནས་ཤེས་ནས་དད་པ་ཐོབ་པ་ཞིག་བྱ་རྒྱུ་རེད། དཔེར་ན་མི་ཞིག་གིས། ཁྱེད་རང་སངས་རྒྱས་པའི་ཆོས་ལ་དད་པ་བྱེད་ཀྱི་ཡོད་སྟབས། སངས་རྒྱས་པའི་ཆོས་འདི་ག་འདྲ་རེད། ཅེས་དྲིས་པ་ཡིན་ན། སངས་རྒྱས་པའི་ཆོས་ནས་གསུངས་པའི་གཞིའི་རྣམ་གཞག་དང་། ལམ་གྱི་རྣམ་གཞག འབྲས་བུའི་རྣམ་གཞག་དེ་དག་རྒྱས་བཤད་ཐོག་ནས་གཞི་བདེན་པ་གཉིས་དང་། ལམ་ཐབས་ཤེས་གཉིས། འབྲས་བུ་སྐུ་གཉིས་བཅས་དེ་ལྟར་འགྲེལ་བཤད་རྒྱག་རྒྱུ་ཡོད་པ་བྱ་རྒྱུ་ཧ་ཅང་གལ་ཆེན་པོ་རེད་འདུག
བཅོམ་ལྡན་འདས་ཀྱིས་ཆོས་འཁོར་དང་པོ་གསུང་པའི་སྐབས་བདེན་བཞི་ཆོས་འཁོར་གསུངས་ནས་མི་རྟག སྡུག་བསྔལ། སྟོང་བ། བདག་མེད་བཅས་བཞི་དང་། རྒྱུ། ཀུན་འབྱུང་། རབ་སྐྱེ། རྐྱེན་བཞི་ལ་སོགས་བདེན་བཞི་མི་རྟག་སོགས་བཅུ་དྲུག་དེ་ལྟར་གསུངས་པ་རེད། དེ་གསུང་དགོས་དོན་ནི་དཔེར་ན་བཅོམ་ལྡན་འདས་ལ་མཚོན་ན། ང་ཚོའི་སྐྱབས་སྟོན་པ་པོ་ཞེས་མ་གཏོགས་སྐྱབས་དངོས་རེད་ཅེས་ཟེར་གྱི་མ་རེད། སྐྱབས་དངོས་ནི་ཆོས་དཀོན་མཆོག་རེད། དགེ་འདུན་དཀོན་མཆོག་ནི་སྐྱབས་སྒྲུབ་པའི་ཟླ་གྲོགས་རེད། སྐྱབས་དངོས་ཆོས་དཀོན་མཆོག་དེའང་ལུང་གི་ཆོས་དཀོན་མཆོག་གི་སྐད་ཆ་མ་རེད། བཅོམ་ལྡན་འདས་ཀྱིས་འགོག་བདེན་དང་ལམ་བདེན་ཞེས་བདེན་བཞི་གསུང་པའི་སྐབས་བདེན་པ་གསུམ་པ་དང་བཞི་པ་ཞེས་འགོག་པའི་བདེན་པ་ཟེར་རྒྱུ་ཞིག་གསུངས་འདུག འདི་སྐྱབས་དངོས་ཆགས་ཡོད།
སྐྱབས་དངོས་འགོག་པའི་བདེན་པ་ཟེར་རྒྱུ་འདི་ངོ་ཤེས་པ་ཞིག་མ་བྱུང་ན། ཆོས་ལ་སྐྱབས་སུ་མཆིའོ་ཟེར་དུས་ཕལ་ཆེར་ཚིག་སྐམ་པོ་ཙམ་རེད་མ་གཏོགས་ཧ་ཅང་མེད་པའི་བཟོ་འདྲ་ཞིག་འདུག དེར་བརྟེན་འགོག་བདེན་ངོ་ཤེས་པར་བཅོམ་ལྡན་འདས་ཀྱིས་བདག་མེད་པ་ཞེས་གསུང་པ་འདི་དང་། མི་རྟག་སྡུག་བསྔལ་སྟོང་བདག་མེད་ཅེས་གསུང་པ་འདི་རྩད་གཅོད་བྱ་རྒྱུ་ཧ་ཅང་གལ་ཆེན་པོ་རེད་འདུག དེའི་ཐོག་ནས་འགོག་པ། ཞི་བ། གྱ་ནོམ། ངེས་འབྱུང་དེ་དག་གཞི་ནས་གོ་བ་སླེབ་རྒྱུ་ཞིག་དང་། སངས་རྒྱས་པའི་ཆོས་པ་དེ་དག་བདེན་བཞི་མི་རྟག་སོགས་བཅུ་དྲུག་དེ་དག་གི་ཐོག་ནས་འགོག་ལམ་གཉིས་པོ་འདི་ཡག་པོ་ངོ་ཤེས་པ་ཞིག་དང་། ལམ་སང་བརྒྱུད་ལ་རྟོགས་པ་སྐྱེ་རྒྱུ་ཁག་པོ་རེད། འོན་ཀྱང་གོ་བ་ཡག་པོ་ཞིག་ཆགས་པ་ཞིག་དང་གོ་བ་ཆགས་པ་ལ་བརྟེན་ནས་ཉིན་རེ་བཞིན་དཔྱད་འཇོག་ཟུང་འབྲེལ་གྱི་ཐོག་ནས་སྒོམ་བརྒྱབ་ནས་འགོག་བདེན་དང་། དེ་སྒྲུབ་བྱེད་ཀྱི་ལམ་བདེན་བདག་མེད་པ་ཟེར་རྒྱུ་དེ་ཚོའི་གྲས་གཞི་ནས་སེམས་ནང་ཚོར་བ་སླེབ་ཐུབ་པ་ཞིག་དགོས།
བདག་མེད་པའི་དོན་ལ་རྒྱལ་བའི་དགོངས་པ་བཀྲལ་ཡོང་དུས་བྱེ་བྲག་སྨྲ་བ་དང་མདོ་སྡེ་པ། སེམས་ཙམ་པ། དབུ་མ་པ་བཅས་དཔལ་ནཱ་ལེནྡྲའི་སློབ་གཉེར་ཁང་ནས་ལྟ་གྲུབ་མི་འདྲ་བའི་འགྲེལ་བཤད་ཡོད། དེ་བཞི་པོ་གཙོ་བོ་རེད། དེ་ལ་ནང་གསེས་སྡེ་ཚན་མང་པོ་འདུག བཅོམ་ལྡན་འདས་ཀྱི་རྗེས་འབྲང་གང་ཟག་བྱེ་བྲག་པ་སོ་སོས་བཅོམ་ལྡན་འདས་ཀྱི་དགོངས་པར་དཔྱད་པ་བྱེད་སྐབས། དགོངས་པ་ལེན་སྟངས་མི་འདྲ་བ་ཡོད། དེ་དག་ཚང་མ་གུང་བསྒྲིགས་ནས་དཔྱད་པ་བྱས་ཡོང་སྐབས་བྱེ་བྲག་སྨྲ་བའི་འདོད་པར་མདོ་སྡེ་པས་སྐྱོན་མཐོང་ཐུབ་པ། མདོ་སྡེ་པའི་འདོད་པར་སེམས་ཙམ་པས་སྐྱོན་མཐོང་བ། སེམས་ཙམ་པའི་འདོད་པར་དབུ་མ་པས་སྐྱོན་མཐོང་བ་བཅས་གོང་མའི་གོང་མས་འདི་ལྟར་ཞིབ་ཚགས་པོ་བྱས་ནས་དཔྱད་ཡོང་དུས་གྲུབ་མཐའ་འོག་མ་འོག་མའི་བདག་མེད་པ་དང་། སྟོང་པ་ཉིད་ཟེར་རྒྱུའི་གོ་བ་རགས་པ་དེ་དག་ལ་གྲུབ་མཐའ་གོང་མ་གོང་མས་ཞིབ་ཚགས་པོར་དཔྱད་ནས་སྟོང་བདག་མེད་ཀྱི་གོ་བ་གཏིང་ཟབ་ཏུ་ཕྱིན་པ་དེ་ལྟར་རེད། དེར་བརྟེན་འདི་ཚོའི་གྲས་སློབ་སྦྱོང་བྱས་ནས་ཤེས་དགོས་རྒྱུ་ཧ་ཅང་གལ་ཆེན་པོ་རེད་འདུག དེ་རིང་སྔོན་ལ་ཤེས་རབ་སྙིང་པོ་འདོན་རྒྱུ་དང་། དེ་རྗེས་ལམ་གཙོ་ཡིན། ཞེས་སོགས་ཀྱི་སྔོན་འགྲོའི་བཀའ་སློབ་སྩལ་གྲུབ་མཚམས་བཀའ་ཆོས་སྩལ་ཡོད་པ་བཅས། །
