ཕྱི་ལོ་ ༢༠༡༩ ཟླ་ ༡༡ ཚེས་ ༡༤ རེས་གཟའ་ཕུར་བུ།

༄༅། །ཕྱི་ལོ་ ༢༠༡༩ ཟླ་ ༡༡ ཚེས་ ༡༣ ཉིན་གྱི་སྔ་དྲོ་བལ་ཡུལ་ནང་རྟེན་གཞི་བྱས་པའི་གཞོན་སྐྱེས་འགོ་ཁྲིད་ཚོགས་པའི་    Young Presidents’ Organization ཚོགས་མི་གྲངས་ ༣༠ ཙམ་གྱིས་བཞུགས་སྒར་༸རྒྱལ་བའི་ཕོ་བྲང་དུ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་ཁ་ཞུས་འདུག་པ་དང་། སྐབས་དེར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བལ་ཡུལ་གྱི་གཞོན་སྐྱེས་འགོ་ཁྲིད་ཚོགས་པའི་ཚོགས་མི་རྣམས་ལ་བཀའ་སློབ་སྩལ་དོན། དུས་རབས་བདུན་པའི་ནང་ཆོས་རྒྱལ་སྲོང་བཙན་སྒམ་པོས་བལ་བཟའ་ཁྲི་བཙུན་དང་རྒྱ་བཟའ་ཀོང་ཇོ་གཉིས་ཁབ་ཏུ་བཞེས་པ་རེད། དེ་ནས་ཁོང་གིས་ལྷ་སར་ལྷ་ལྡན་གཙུག་ལག་ཁང་བཞེངས་ཡོད།

སྐབས་དེར་བལ་ཡུལ་གྱི་ལག་ཤེས་པ་མང་པོ་མཉམ་ཞུགས་གནང་བ་རེད། ད་ལྟ་དུས་རབས་ ༢༡ ལ་སླེབས་ཡོད། སྔར་དུས་རབས་བརྒྱད་པའི་ནང་དཔལ་ནཱ་ལེནྡྲའི་ཆོས་བརྒྱུད་བོད་ནང་དར་བ་དེ་ད་ལྟ་ང་ཚོ་བོད་མི་ཚོས་བདག་པོ་བརྒྱབ་ནས་བསྡད་ཡོད།

པཱ་ལིའི་ཆོས་བརྒྱུད་ནང་བདེན་བཞི་མི་རྟག་སོགས་བཅུ་དྲུག་དང་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་སངས་རྒྱས་ཀྱི་ལུང་ལ་སྟེན་གྱི་ཡོད།  འོན་ཀྱང་དཔལ་ནཱ་ལེནྡྲའི་ཆོས་བརྒྱུད་དེ་ལུང་ཙམ་མ་ཡིན་པར་གཙོ་བོ་ཚད་མ་དང་རྒྱུ་མཚན་ལ་བསམ་བློ་བཏང་ནས་འགྲོ་གི་ཡོད།
དཔལ་ནཱ་ལེནྡྲའི་མཁས་པ་དེ་ཚོས་ཐ་ན་སངས་རྒྱས་ཀྱི་བཀའ་ལ་ཡིན་ནའང་བརྟག་དཔྱད་བྱས་ཡོད། དེ་རིང་ཁ་སང་རྒྱ་ནག་ནང་གི་མཐོ་སློབ་ཁག་གི་དགེ་རྒན་ཆེན་མོ་དང་མཁས་པ་ཚོས་འདི་ནས་པར་སྐྲུན་བྱས་པའི་ནང་པའི་ཚན་རིག་དང་ལྟ་གྲུབ་ཀུན་བཏུས་ཞེས་པའི་དེབ་ཕྲེང་ཁག་ལ་དོ་སྣང་དང་ལྟ་ཀློག་བྱེད་ཀྱི་ཡོད། ཁོང་ཚོས་བོད་ཀྱི་ནང་པ་སངས་རྒྱས་པའི་ཆོས་བརྒྱུད་དེ་དཔལ་ནཱ་ལེནྡྲའི་ཆོས་བརྒྱུད་དྲི་མ་མེད་པ་དང་། ཚན་རིག་དང་མཐུན་པ་རེད། ཅེས་རྗོད་ཀྱི་འདུག

ནང་པ་སངས་རྒྱས་པའི་སེམས་ཁམས་རིག་པ་དང་། ནང་པ་སངས་རྒྱས་པའི་ཚན་རིག ནང་པ་སངས་རྒྱས་པའི་ལྟ་གྲུབ། ནང་པ་སངས་རྒྱས་པའི་ཆོས་ལུགས་དེ་དག་ནང་ཆོས་ཀྱི་གཞུང་ནས་གསུང་གི་ཡོད་ཀྱང་། ནང་པ་སངས་རྒྱས་པའི་སེམས་ཁམས་རིག་པ་དང་། ནང་པ་སངས་རྒྱས་པའི་ཚན་རིག ནང་པ་སངས་རྒྱས་པའི་ལྟ་གྲུབ་དེ་དག་ཤེས་ཡོན་གྱི་སྡེ་ཚན་ནང་བཞག་སྟེ་སློབ་སྦྱོང་བྱེད་དགོས།

བོད་སྐད་དུ་བཀའ་འགྱུར་དང་བསྟན་འགྱུར་སོགས་པོ་ཏི་ ༣༠༠ ལྷག་ཡོད། རྒྱ་སྐད་དང་བལ་ཡུལ་གྱི་སྐད་དུ་ནང་པའི་གཞུང་གི་དཔེ་ཆ་ག་ཚོད་ཡོད་མེད་ཞིབ་འཇུག་དེ་འདྲ་བྱས་ཡོད་དམ་མེད། བལ་ཡུལ་གྱི་སྐད་ནས་བོད་སྐད་དུ་ནང་པའི་དཔེ་ཆ་མ་བསྒྱུར་བ་དེ་འདྲ་ཡོད་དམ། ཞེས་སོགས་ཀྱི་བཀའ་སློབ་སྩལ་རྗེས་དྲི་བ་ཁག་ལ་བཀའ་ལན་སྩལ་ཡོད་པ་བཅས། །