ཕྱི་ལོ་ ༢༠༡༩ ཟླ་ ༡༡ ཚེས་ ༡༢ རེས་གཟའ་མིག་དམར། 

༄༅། །ཨ་རིའི་སྲིད་འཛིན་ཟུར་པ་སྐུ་ཞབས་ཇིམ་མི་ཀར་ཊར་ Jimmy Carter མཆོག་ཉེ་ཆར་ཁོང་གི་གཟིམ་ཤག་ནས་མར་ལྷུང་བའི་རྐྱེན་གྱིས་སྨན་ཁང་དུ་བཞུགས་དགོས་བྱུང་བར་བརྟེན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དེ་མ་ཐག་སྲིད་འཛིན་ཟུར་པ་མཆོག་ལ་ཐུགས་གསོའི་གསུང་འཕྲིན་ཞིག་སྩལ་བའི་ནང་འཁོད་དོན། སྐུ་ཉིད་ནས་མི་ཚེ་དོན་དང་ལྡན་པ་ཞིག་བསྐྱལ་ཡོད། ངོས་ཀྱིས་སྐུ་ཉིད་ནས་ལོ་མང་རིང་མི་མང་ཉམ་ཐག་རྣམས་ཀྱི་ཆེད་དུ་བློས་བཏང་གིས་རླབས་ཆེན་གྱི་ཕྱག་ལས་ཧུར་ཐག་གནང་བར་རྗེས་སུ་ཡི་རངས་དང་བསྔགས་བརྗོད་ཞུ་རྒྱུ་ཡིན། སྐུ་ཉིད་ནས་ང་ཚོར་གཞན་ཕན་གྱི་ཕྱག་ལས་ཇི་ལྟར་གནང་དགོས་པའི་སྐོར་མིག་དཔེ་བཟང་པོ་བསྟན་ཡོད། སྐུ་ཉིད་མགྱོགས་མྱུར་དྲག་སྐྱེད་ཡོང་བའི་སྨོན་ལམ་དང་བཅས། །